 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY |
 |
| ERNIE C. TURLA, pres., Akademya ning Kapampangan Int'l, curator |
| ||||||
| PAGE 18 Contents: 1. Ninu 'Ta? - Rolando "Tiakbong" de Jesus 2. Rosa - Renato B. Alzadon 3. Isumbung Dakayu - Renato B. Alzadon 4. Burung Kapampangan - Tony M. Pena 5. Qng Marangle - Medel Mercado 6. Ing Bayung Estudyante - Monette Mallari 7. Ing Lasa nang Ninoy - Renato "Tiakbong" de Jesus 8. Ing Capas Kapampangan Ya - Renato B. Alzadon 9. Masayang Penendit - Rafael Maniago 10.Katawan - Monette Mallari NINU 'TA? (Nang Tiakbong) Maluat na'ng milabas, aganaka ku pa Pauli ku bale, menibat iskuela. Alabasan ku la at mipapagjunta Dening kabaryu ku, tumpuktumpukan la. "Nung ayalben miamu, nabengi, abe ko! Itang bisita ning Liberal Partido Pangumpanya ne y Kong Dandung kanu Para masambut ya itang ilokanu." "Ay, kayanakan na ita ping bisita Kasing idad ne mu ning kakung dalaga Pero nung dimdam mu ing kayang inatba Eka magkamali, enyu ya pin ata." "Ing makapakaili, keng keyang sinabi: 'Kalaban tamu, tutu yang bayani Medalya king salu, apulu kasapi Pakiabe no pa, pati tansan Pepsi'. " "Ninu wari iya, nanu ing lagyu na?" "Urud nang mataktak, militar ya ata?" "Ing balu ku kaya, Concepcion tau ya, Kanita reporter, giyera king Korea." "Aliwa mu ita, beinte dos anyus ya Balen ning Concepcion, 'yang meging Meyor na. Gobernador Tarlac keng idad na treinta Nanu pa'ng paintunan, tal kapampangan ya!" "O't y Dandung naman, eya migkamali? Ing tagapayo na, 'tin gatas labi Keng pali nang daya, e kaya malyari Keng kayanakan na, 'yang magari-ari." "E naman makanyan", anang Apung Kulas. "Lugud at tapang e makua keng idad Pablasang ing kulyo at kekong gulisak Melumud ing laman, sinabi ning anak. Atiu ku marayu, pagugumasdan ke Kabang magsalita, anak a metungge Kislap ning bombilya keng gulut nang buntuk Bigla yang meandap, saka ya memaltuk. Nanu buri sabian petangal nu Guinu? Pepakit yu kaku, daratang peligru Ingatan me sana, kaulan me rugu, E mepasakitan y Ninoy Aquino." "Aru, misamutan, pisasabian tamu!" Oitai'y Ingkung Kulas, tiu ne keng libutad Tungkud nang kuayan, saka wawasiwas. "Uli mong matua ku, e yuku sikasu!" Kulait nang Ima, "Mamalagwa na ka! Eka makisalud salita reng matua Mamomba kang danum, kaibat mamalis ka Wali mung mangaga, ingatan mu nala." ROSA Neng: Renato B. Alzadon King karsel nang salu ning paldas kung pusu, kakablas ing tabling a makipatlalu king kurug ning duldul king benging matuling: Rosa! Rosa! Rosa! Maki-lauk siguk ing matning saingsing a bala-balandra, manintun alsutan king sasagkang dingding! Balaku ku mo sana ngening mebura ne itang Rosang Tatu, meburang kagnan na, ing lugud ku kekang memale king salu: Rosa! Rosa! Rosa! O'bat angga ngeni, ing Rosang Malutu eya pa mebura king pangalimbag na king ubud ning pusu! ISUMBUNG DAKAYU Neng: Renato B. Alzadon Y Loling tajimik, kapapanganak na, makalunus neman migsabi-sabi ya; Ining pepanganak a Menilut, ngana Atukluan neng Loli ing pi-ulunan na. Lalto naman karing tawas Albularyu Atisuran nala ding Nunu king Pungsu; Ulina ning mua ra parusan de kanu Inia makanian deng guguluan animu. Ela tinalab ding in-ain tang manuk ketang pun ning kwayan a misna kasuksuk; Uling ustung sumpung ing pali nang buntuk Mamag-diskursu yang alang prenu asbuk. Nganang magdiskursu: " mamag-hukbu kayu Eyu pala agyu, suku-suku kayu; Ngeni mong ati ko panig ning gubyernu Pamaten yu kaming pepakan kekayu. Katuk ko keng pasbul benging kapitangan Atna ko karanup maintun kong pamangan; Limasan mi rugu ing ditak ming kanan yapag mi kekayu king bakayung mangan. Oini ing ablas yo king kekaming suyu Pemaglista yu la ding kekaming kagyu; Atsaka mo ngening hukbu kong sinuku Ikaming pepakan ding kekong panuldu. keng pamanggawan yo ala kong keliwan karing kama-malung taksil a ubingan; Nung ninu ding taung kekayu pepakan Ila pa ding ngeni buri yung tuktukan. Iniang ken kong kilual mamanyawad kayu Obat anggang ngeni eko pa migbayu; Libut-kibut kayu king kekaming baryu Manyawad kong kambing, manuk, ampon asu. Pikasa-kasa yo ding baril yung talan Birthday na ning CO gagawan yung sangkan; Rugo, king takut da ding taung keraklan Babie ra kekayu ing kekong pamitan. Dapot aku naman, nanu man gawan yu Eko katakutan balas deng baril yu; Ing gagawan yung yan pakatandanan yu King Kapitan Roldan, Isumbung da kayu. Balayu siguru ing tutung mete ne---- Ing Kapitan Roldan, mabie ya, e mete! Nung eye akakit, aku akakit ke Daratangan na ku akakasabi ke. Kabud abalu nang makanian ko dapat Damdaman yo detang amanung masampat; Ken ko mamagbidbid at magsalibatbat Uli ning birtud nang king banua menibat. Nung pamayapan na ning mal tang Kapitan Atin makalijim a buri kung daptan; Kabud akung mika baril a tatalnan Salikut na kayu, gisanan dako ngan." . Pamilia nang Loli maniad lang dispensa Karing maldang taung akakasabi ra; "Panupaya ye pu uling magnerbyus ya Ena rugu balu ing pamaniabyan na." Para kekatamung tanak na at subuk Atmu na kalino ing keang penasbuk; Mayap ya pa ining mikasakit buntuk Ing mua nang sisimpan apalual na asuk! Dapot ikatamung matinu kunwari Menatili tamung pakakabat labi; Ing mangapalyaring mali ding mali Nung atyu keng wanan lumawe tang kaili. Manakit tamu man bulag ta mu mata Maniabi ta mu man ding dila pipi la; Susulat tamu man pakli ta mu pluma Mag pasyuk tamu man ala lu king nota. At misan a aldo Y Doctora Bengal Tiki ne Y Loli, dela ne Hospital; Kaibat nang mesuri Hospital Probinsyal Tiglus da neng dela Mandaluyung Rizal. Maguing aral ya sa o magsilbing turu Ing milyaring ini karing bayung tubu: Nung ninu napin mang mamulang nang tutu O' bat ya na pin mang miniabing matinu. BURUNG KAPAMPANGAN (Nang Tony Mercado Peña) Ding bulig king buslu metima king playsdan tanggalan mo asang saka kaliskisan daingan mo kaybat saka patiktikan ketang miyanginan saka miyaslagan! Abang payangyangan ding asan mu kaka tumun nakang nasi itang medyu malpa parimlan mung agad potang menangnang na isaksak nong bulig kilub ning balanga! Bayang sumlam agad ing kekatang buru misan metung aldo kalken meng mapinu buburan meng angkak pangkulol malutu managkat ne nyaman kenapang lawe mu! Nung ala kang asan, paro metung tumpuk detang mabye-bye sagiwa pa asbuk piraglian balatan lako iki't buntuk saka mo basbasan asin a kapasyuk! Nasing peparimla makanyan mu naman karin mo isaksak ding parong belatan labi ning balanga masinup meng takpan katlu, kapat aldo malyari nong takman! Potang igisa me ing sinese buru manyaliksik arung ing bange nang banglu sinyang me paroba miras ya pangulu ligang balasenas kabage nang pihu! Miyaliwa yapin ing awus keng buru ketapu kakami tagilo mebalu balo-balo naman kasumangid baryu nanu yaman lagyu maslam yapin banglu! Obat piyaglon ya burung Kapampangan mamaslammaslam ya mamangemange man obat manyaman ya't babye panimanman king dilang mulagat tiktak ya linamnam! Ing banglu ning buru ibat ya king bange ing kislap ning batwin ibat ya king benge ing makasalikut malagung milage oyning kabaldugan k'ganaganang bage! QNG MARANGLE by Medel Mercado quing marangle, migkera kata kareng damuhan miyayagape gamat, makatingala queng asul a kaulapan, sisimsiman ing samut-samut a banglu ning puno, tanaman, bulaklak at hayop ning kabukiran kabang pakiramdaman tamu ing lagaslas da reng bulung king hihip ning hangin binulalas mu quing libutad ning katahimikan, "tatakut ku pero ini ing kakung paninap" pakibat ku: "pangarap ku ing kekang paninap sabe higpit quing pangatalan quing kekang gamat malambat katang migkera quing gabun, quing gabun a kakatang pipaghimlayan Ing Bayung Istudyante Nang Monette Mallari 8/15/05 Misan aldo mekabasa kung masanting a poesia Mika diwa ing isip ku at mika inspirasyun ya Megumpisa ke ping kitnan isip nanung isulat na Pamagat masanting gawan 'Ninu Aku?' amupaya. Kitnan ke ining sarili tutu ninu pin mo aku Isip ku memasyal bigla inyang aldo bait daku Karin megumpisa na ing istorya ning bie ku Angga nyang malati kupa ampo ngening matwa naku Primeru meka atlu kung parapo mituknang yamu Bisa nakung muli bale uling pin danupan naku Inyang miras ku king bale binasa king esposo ku Sinabi masanting yapin mangan tana at isundu Kaybat ming kinabusi king manyaman nilutung ulam Masaya kung tingkapan ing kekeng ibat pipanganan Kaybat minta kening luwal para magpating angin mu Kabud kabud dinatang king isip sundu poema ku Tiup tiupan angin pin kening malapit a Grottu Ing inspirasyun dinatang nanaman bigla kanaku Mika atlu pang parapo sabi ning kakung esposo Oras mag Adoracion bilis ume tanang mako Inyang ati na kami king pisamban gunam gunam ku Papasalamat king Ginu nung nanu ing asulat ku Abang mag Adoracion bigla menga pakyak naku Pasalamat ku king Dios Minyaklung para kanaku Tutu sinabi nang Atching Lynn ing kakung lwa tinulu Inyang susulat ke ining istorya naning bie ku Pupulisan king napkin lwa ku babalag alang patna Kening mayamu kung lupa e bisang tuknang kakung lwa Kaybat minuli binasa pekirandaman reng anak Ikit ku interesado lapin dening kekeng anak Sabi ku karela epa yari ning kakung kuwentu Sabi ra Ima kasanting na sige kekang isundu Mikagana kung bigla at pekyarian ing poema Balik balikan ke isip ku e makapaniwala Tutu pin ing sabi daring anak ampong asawa ku Tutu yang masanting linto istorya naning bie ku Pepadala Akademya ing poema king kuswelu Akademya Kapampangan metung yang masanting grupu Kening grupu tapung ini detang poetang batikan Masipag lang magmasabal sagipan 'manung sisuan Alang aliwa nune y koyang Ernie Koyang Paing Koyang Renato atsaka minantabe alang daing Y koyang Tony byasa yang turung maligwang sistema Nung makananu masanting igale ampong irima Tiru na nanam pitnan ing linya ning kekang poema Magsilbi yang pin tsa nam o kaya tsa walu silaba Nung makaba ya ing linya pwedeng ilako aliwa Pwedeng mu naman gumamit karetang impun kataya. Sana pin Koyang Gus mika inspirasyun at iyambag Munang poema king AKKAP kapanandaman mabagbag Darakal la reng Poeta, Y Rolly man minambag ne Ikaman kanyan poema susunod padala mune Kitnan muku ninung babye inspirasyon para kaku Nung ing Ginung Mayupaya O ing sisuan amanu Parehung babye masanting inspirasyun kening pusu Nung mawala ya ing metung poesia ku alayu Nya pasalamat ku ngan pu kekayung minye papuge King lugud at masabal yu kening bayung istudyante Pa-uli yu meka gawa kawatasan na ning bie King lugud ning Apung Ginu pluma ku midinan bie ING LASA NANG NINOY Renato "Tiakbong" de Jesus Keng pangakulung na, pitung banwa't kapitna Pakpak nang mepatpat, maina na inawa Katawan meimpis, mengaba na lupa Ikua na pang gewa ing magparanup ya Dungut a pamangan, emu man tagkilan Dagis ampong ipas, mengataba la ngan Mengaspak a labi, agyu miamung basan Misadsad ka sana, angga kabukasan Gewa nang makanyan, apat apulung aldo Neng kabengian naman, pane ing rosaryo At keng pagmuni na, asuat na king Guinu "Na'ng justicia ini, o't miparoro ku?" Ing tune masakit dakal ka kakuyug Kanita 'snong kainge, sikan da kalugkug Maili lang kayarap, itang "presidenti" "Masaya la kaya, neng ila mung dili?" Makitid, matarik dalan ning katutuan 'Ya mung kabud balu, 'yang diling delanan Dening mapanako, pati na malaram "Oba't ali Guinu, Keko pung kastiguan?" Keng panalangin mu, ala ka man dimdam Asnang katajimik, tudtud a malalam "Kagising mu Dios ko, siesta mung manyaman, Mabie ku pa kaya? Emu ku lalakuan!" Ketang pangadi mu, katlu neng misteryo Linito ka isip, balamu melilyu Tikpan mo reng mata, buntuk mu sepupu Kristong makapaku, tindus neng Longino Keng pangabaluktut, sabe ing ngulangul Anti ka mong anak, kabait a pungul "Karitak mu pala, kakung kasakitan Ala mang kapara, ing Kekong denasan!" Kaplas na ing dungus, anting gagamusan Sepu mung taliri, mangarimla no ngan Tatap na ning salu, inawang susunga E ata misadsad, pusu biglang matda? Mebisa'ng diktador at inayunan na Paulu ka pamu, munta Amerika Mabagut kanita, suksuk tagiliran Ing ena abalu, sundu mu pa'ng LABAN! ING CAPAS KAPAMPANGAN YA Neng: Renato B. Alzadon King punta ning dalan Capas, milungenge ya ing matua! Ketang pampang a mabatu, misubsub ya ing lupa na; Balamu dimdam na wari king ing gabun ginalgal ya A antimong kapakibat ning magagabak a banua! Makanian man, pinilit neng inatna itang kanuan na--- Itang kanuan nang mesugat ketang batung digpanan na. At kanian no abatyawan ding anak na ning sabana Memirapal deng pintalan ban keta saupan de sana. Kabud disnan de ing Matua dela de king masalilung Mayap na mu, bebe dalan, ating dutung a malabung; Ing Dutung atme kalapad, linadlad yang anting payung Sagisag ne ning amanung menialampak king kalabung! At ketang panga-andik na ning Matua king pun ning dutung Asilipan no ding ayup babo sanga pulung-pulung; Balamu wari Watas lang king pantuk-dila mamialung Uling atin lang amanung palsintan ning balang metung! Kabud sinubli ya diwa ing Matuang mipalungenge Binie na ing pasalamat karing supling ning marangle. At ngana pa,"king ikit kung malasakit yung dalise, Panamdaman kung balamu kumaba pa ing kakung bie; Pablasang nung agawa yung mamilagwang lingapan ye Ing Matuang antimo akung tengalan yung makaungle; Ena ayamyam ning lub yung eko tikdo ban saupan ye Ing sarili yung salita nung akit yeng mamamate." "Eyu pagkasala, Apu", ing guinkas ning kayanakan, "Nukarin ko ibat, Apu; nukarin ko munta kanian?" Nganang mekibat ning Matua:"Aku ya Y Kapampangan Ing bale ku atyu babo naning Bunduk ning Sinukuan; Meguing panugali kunang kalabas na ning kauran Ing tipa ku at dumalo karing kakung kayaduangan At king panipa kung iti apigampa kong puntalan Ding kapatad Syudad Tarlac a sadya kung kayakuanan.. Ding disnan ku Syudad Tarlac matabang no tanggap kaku Ena antimo kanitang pulut kung atmu kayumu; At king pami-aduangan da menaliwa no amanu Maki-Inglis at Tagalug, ing keraklan, Ilukanu; Inyamg ena ku mibata king kaplas lub a masolu Ginulut ku at miglakad eku memun agyang kenu; King kanakung pamanlakad ing Capas yang kening lub ku Uling ken atin kung balung Watas a malugud kaku. "Nanu ya pu lagyu, Apu", alus myagnan a kitang da "Nung keti ya rin kekami. siguradung balu mi ya." "Ing Watas a paintunan ku", nganang mekibat ning Matua "Ing Poeta Zaldo Abner, nung balu ye, nukarin ya?" Itang peka matuang dili karing anak pipiling ya: "Ala ne pu keni Capas ing bulalag a Poeta; Ing balita malambat neng meko menaliwang bansa karin nepu manuknangan king labuad ning Amerika." "Kabud kalako na Apu ning Watas yung panintunan Keti Capas, melanat ya ing Kulturang Kapampangan; Ala na pung Mariposang lilimpad keng Bulaklakan Ala na pung magpalakbang at luluruk keng Bugtungan; Ala no pu ding pulosa at basultu keng umpukan Ala no pu ding Poetang mangorona neng piestajan. Ding kasiping balen, Apu, subukan yu lang puntalan Baka sakaling atin pang Watas Concepcion o Bamban." Nganang miniabi ning Matua, "Nung Capas, ala nang Watas, Keti Tarlac, malaso ya ing amanu ding Mardikas! Ding Poetang Ilukanu magsane lang miamas-amas Sasadya do king labanan ding pluma dang mangatalas; Nung keti, alang Poetang maglualu at maki-lamas Lungub lang alang sumbagal king pasbul nang maliwalas; At oini ing tandanan yo, nung miragsa ya ing Capas Ing Bamban at ing Concepcion ilang tutuking malagas. Ing amanung Kapampangan, ban keti Capas, e mate kailangan king atin tikdo Bayung Watas a magbante; Inia kukutnan dakayu, ikong anak ning marangle Ninung kanakung itubud ? king oras aini tikdo ne! Bakit tajimik kayu ngan? E wari pigmasakit ye Itang matua bebe dalan ikit yung makalungenge? Ing kekayung kapampangan makanian yang makaungle Bat ngeni eyu ipalto ing masabal yung dalise? Ding anak na ning taldawa milalawayan na lamu At ketang era sasarian agnan-agnan miparuku. "O dale", ngana ning Matua, " lakuan dana kayu pamu." At tinikdo yang malale ban gumulut neng dumayu; Dapot itang anak dili, ing malating pekabungsu Ya ing tinikdo at ngana, "Akung itubud mu, Apu Eke pabustan malaso ampon makalinguan namu Ing amanung kapampangan a sisuan king kakung indu." At kanian no pesitikdo ding supling na ning taldawa: "Itubud mu kami, Apu", nganing metung dang siwala "Kapampangan kami, Apu, king laman ampon king daya, kapampangan keng tinikdo ---kapampangan keng miragsa!" Ketang tula na ning Matua memalisbis ing keyang lua At king gagalgal nang boses nganang mainang migsalita: "Nung ding anggang kapampangan makanian la pusu't diwa Ing amanung kapampangan magluid ya king kabang-kaba." At minuli ne ing Matua king Bunduk na ning Sinukuan King marangle melakuan la ding anak a mituburan; Dapot ngeni, panga-abak a maranun, king pastulan Kapampangan la ding sunis, ding lawiwi, at kundiman; Uling dening Bayung Watas yang marilag dang taguimpan Ibangun de king kuta ra ing Kulturang mekalinguan. Nung ding anggang anak Capas tikdo la sanang makanian Ing Capas Kapampangan ya, ngeni, at king kapilan man! "MASAYANG PENANDIT" neng Rafael Maniago Mekumbira ku mong karin memoesya, Lugal king Oregon, ketang nakadwa na; Kapampangan la ngan, mitipun-tipun la, Matwa't kayanakan, masayang magkanta! Maygit adwang dalan, king kanakung bilang. Ding taung migsadyang, dakal a pamangan; Keni America mipa-ngapampangan, Mikit kasumangid, tula't sagak-kakan. Misdan naku kabud, mengapamulala, King merapat kaku, kaybat memikudta; Peka-Presidenti, kea yang dadala, Bulung yang korona, kaku ra pigsadya! Obat kakung kitang, nanung malilyari, Mipakama-kama, sorpresa kaku'iti; Karakal da ngakung, poetang matikdi, A dapat miputung, ing laurel a ini! Ketang matulid da ala kung alputan, Pisanmetung dangan, retang manungkulan; Anya ngara kakung keka karampatan, Ing okasyun a iti, ikeng Kapampangan! Dakal la pa kanyan, kekaming pagsadyan, Mangalto poeta, ning amanung siswan; Koronang laurel, manenayang miuman, Iputung karela, sorpresa mu naman! Ngakung magsalita, ngeni bubulalag, Kareng Kapampangan, masala ya aslag;' Ing amanung siswan, aping milalablab, Tamban tayang pilit, king pusu isikap! Gisingan da kayu, itang Kapampangan, Tikdo ta ngan ngeni, mipa-idlip ta man; Ala nang matudtud, king dase pagkeran, Kaulan taya ngan ing amanung siswan! For the next page, click: http://maxpages.com/poecia/poecia19 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00285 |