Table of Contents:
1. Ing Kakung Bayani - Renato B. Alzadon
2. Ing Balen Cung Bamban - Luz Dayrit-Navarro
3. Rosang Tatu - Renato B. Alzadon
4. Metung Ku Mung Pintor - Rafael Maniago
5. Bandi Raka Keng Kakung Paninap - Renato B. Alzadon
6. Ing Pamaghiganti - Renato B. Alzadon
7. Ninoy Aquino - Renato B. Alzadon
8. Ninu Y Ninoy? - Tony M. Pena
9. Ninu Mo Ta Yaku? - Monette B. Mallari
ING KAKUNG BAYANI
Neng Renato B. Alzadon
Libu Syam a ralan Pitung Pulu't Adua.
Y Ferdinand Marcos atyu king upaya;
Kabangis-bangisan nang Kumander Pusa!
Ing Bunduk Dalaga, yang guewa nang kuta.
King panaun aita, nung atandanan yu,
Mika-atin tamung eleksyon king baryu;
Makasadya tanang mangi-atsang botu
Dapot agyang metung alang kandidatu.
O, ninu naman pin bisang manungkulan
Timbutajil ka bie eka pa suswelduan;
King balen ta mismu, eta apa-alian,
Dakal nong pete ra karing mig-kapitan.
Lingus-lingus tamung manintun pamuntuk!
Balang linawe ku pipiling a buntuk.
Kekatang makatuang tanak na at subuk,
King puestung Kapitan, alang bisang lukluk.
Mekabulad namu, apansinan taya
Ing anak a Roldan, minuli ne pala;
Meyari ne ata king pamag-aral na.
Katandangan napa--- atme kamu lupa.
Oini ya ing dapat , nga ta mung sinabi,
Ala ya pang baltik king mingatbang parti.
Pisanmetung taya ing anak a ini!
Yang meguing Kapitan ning baryu tang iti.
King pamanungkulan, linto yang magaling,
Dakal ya apalto atmu pangasanting;
Mebawas ing sindak, ing kaplas, at daing!
Ing bayung pag-asa, sinlag yang maningning.
Makagyung sabian kung mika-kapayapan;
Mika-pamanyulung king pamangabyayan;
Inya kekatamung kayang sasakupan
Tune yang bayani ing mal tang Kapitan!
Pablasang magaling yang administrador,
Nga ra ding memalen, dapat yang mag-Mayor.
Ding aliwa nga ra, maski Gobernador;
Datang ing panaun, lumput yang Senador.
Ding taga-Dalaga aplit deng abitan
Buri da king kilual ya maguing Kapitan;
Nung maki-anib ka, ngara, king Kimutan,
Kapitna ning Luzon agyu tayang talnan!
Dening paka-patig talu malinggasu
Patalnan deng baril lumaban ya kanu;
Pane dang sasabian, karing anggang baryu,
Bukud na na kanung alang BSDU.
Dapot ining Roldan ere apatuki,
Atin yang prinsipyung ali ra apakli;
Ing kapanualan na, Ing Dios Ya ing Ari,
Ya at Ya mu kabud ing tukian na buri.
At misan a aldo mispak ing balita:
Ing Kapitan Roldan kabud nya mewala;
Ing bayani tamung pipandaman sala
Mengari yang sulu a kabud na mipda!
King dalan, ding balang akasalubung ku
Tutulu ing lua ra antimo ding kaku;
Kiniak langan ata ding maldang memaryu
King pangawala na ning mayap a tau.
Tauling ikit taya manabat yang saken
Tiknangan ne ning "jeep" a mame king balen
At pepasaken de. Paka baril la den!
Ing eta mu balu nung kinua reng paten.
Dinatang ing Daun. Buri tayang yapa
Batang pasalamat king mayap nang guewa.
O, ing kutkutan na nukarin ya kaya?
Makananu tayang salangyan kandila?
Dinatang man itang Maligayang Pasku
Eta maligaya pablasang alayu;.
Karing Bayung Banua dakal nong mibayu!
Obat alayu pa ing Kapitan tamu?
Ngarang babie payul dening kayantabe:
Eta ne panayan ban mipayapa ne!
Ali ku ayamyam ing tutung mete ne
Uling eta neman piglamayan bangke.
Balitanan yuku nung nukarin yaman,
Mabie ya o mete bakeng adalawan;
King baneng mituklip ing tauling bilungan
Ning bie ning bayani, ing Kapitan Roldan.
ING BALEN CUNG BAMBAN
by Luz Dayrit-Navarro
Siglong labing lima, lugal meguing Bamban,
Ding bunduc Caraballo, banda lang albugan
Ding tau canita, Baluga la't Zambal
Mabibie caring bunduc at pulung macapal,
Siglong labing-anam, ibat Capampangan,
Taung mangatapang manintun pitamnanan,
Quinurus lang ilug a ausan dang Parua,
Capatagan iquit da, bistaman gubat pa.
Miglinis la qng gubat, carelang pitucnangan,
Dacal lang tanaman a ausan dang "bamban";
Inia Bamban na rin ing pepalagyu ra
Ba reng atandanan itang lugal a ita.
E binang melambat, meracal la ring tao,
Pati na magtindang Intsic a viajero
Siglong labing-walo, dacal nong Cristiano,
Meminyag Castila, frayleng Agustiano.
Fundadores Bamban, Sibal ing lahi ra,
Mialiwang familia, Bamban, memalen na,
Rivera, Lugtu, Dayrit, Macale, Vergara,
Manipon, Dela Cruz, Lumboy, Maristela;
Punsalang, Sangalang, Campo, Santos, Megia,
Navarro at Lagman, Manio at Tolosa,
Tiglao, Lacanlale, Diaz, Dimalanta,
Canlas, Pangan,Sison, Pamintuan, Arcilla.
Gobernadorcillo, cayang cautusan,
Guewa na neng balen, ing lugal a Bamban,
Fecha mil ocho cientos treinta y siete ya
Lubus meguing balen, ing Bamban canita.
Revolucion '96 Bamban Katipunan abe la,
Serviliano Aquino ya ing Heneral da.
Siglong labing-siam iniang meyari ya,
Meco lang Castila, Americano panyatang da.
Siglong aduang-pulu, Bamban miunlad ya,
Central Luzon Milling Company, ya ing telacad da;
Dacal pupul atbu, pale, mialiwa pa,
Ding Americano, progreso ing binye ra.
Abe-abe la ngan dening taga-Bamban,
Circulo Bambanense carelang aguman.
Nula man miras, Sibal a familia
Qng Sibal Reunion, maquipagtipun la.
Caduang Guerra-Mundial, Hapon dinatang la,
Apat banuang singcad, memalen pibata ra,
Iniang Liberation, Americano mibalic la,
Independencia ya ining pigcalub da.
Fechang '91 ning siglong aduang-pulu
Mitdas ya ing vulcan ausan dang Pinatubo
Barrio da qng bunduc, minta lang memalen,
Dios ya ing magligtas, e nala paburen.
ROSANG TATU
Renato B. Alzadon
Irug kung kayama-yama
Palsintan ning kakung pluma;
Ing lagyu mu mitatak ya
Karing kakung poesiya;
Ikang kakung milagrosa
Ikang ausan kung Rosa.
Neng mame kung mag-imain
Busal ning malagung jardin;
Balaku wari ika pin
Itang rosang bitin-bitin
A pakialungan ning angin
At palsintan da ding batwin.
Tulid na ning kakung pusu
Atyu ing rosang malutu;
Ya ing magsilbing patutu
King lugud kung milalalu;
Lawan me ing kakung salu
Mikintal kang Rosang Tatu.
“METUNG KU MUNG PINTOR”
Neng Rafael Maniago
Na’ng balu kung ipoesya, ing balu ku gugulis mu..
Metung ku mung kasing pintor, magdibuu kung letratu,
Mamanggulis kareng telon, mamangawa kung senaryu;
Ing gamit ku keng kabiayan, danum-kule at ing laru.
Pipilit king sarili ku, makagawa kung poema,
Kalupa na mong Renato Alzadon at Tony Pena;
Atlalu keng pakyapusan ing matikding Ernie Turla,
Kakaba ya ining bie ku, nung milimpi ku karela.
Ing pintura para kaku, yang kayantabe ku king bie,
Ketang napun angga ngeni, king pamilya yang panese.
Kasapwak ku king masala, iting arti kayantabe,
Regalu yang ibat king Dios, sisesen ke at sasane.
Maski nu ku man magpasyal, e mamako ing gamit ku.
Kukopyan ku ing senaryu, lelangan ning Apung Guinu
Papakit ku kareng tau, lugud ning Dios kekatamu
Lelangan no ring tanaman, bunduk, dagat at itamu!
Neng panaun ding sampaga, ilang pipinta kung pane,
Ding kulyawan ampong asul, maputi at kule ube;.
At deng rosas a malutu pakasabit balang tangke,
Ninu tang e mabig-ani king naturalesang tune.
Ing buri ku pang gugulis, neng lalbug ne itang aldo,
Abita’ nane ning dulum, anting gintu yang lilino;
Mikelangan na ing sala, ketang punta na ning yato.
Tagal-tagalan ku ing kule. Ba! Lalu kung mipapasno
Pekamatas diling uri, lelangan ning Apung Guinu,
Yaku, ika, itamu ngan ketng mabilug a yatu;
Anya buri kong gugulis, ding miyayaliwang tau,
Uling ing larawan ning Dios, atiyu naman kekatamu.
Kanyaman ing mamoesya lalu na king Kapampangan!
Agyang manigaral ku mu, kukuanan ku king tepangan.
Uling kakung yang sasane, susulat amanung siswan,
Maging poeta ku mu rin, mabiasa ku keng kelwatan.
BANDI RAKA KING KAKUNG PANINAP
Neng Renato B. Alzadon
Malambat na murin e mikakit kata
Mimiguit na mekad aduang pulung banua;
Kabud miglakbe kung menaliwang bansa
Ala nakung dimdam makatungkul keka;
Nung balikdan ku man makule napun ta
Eku man asabing meguing bandi ra ka;
Dapot nanung sangkan, bakit kaya, Rosa?
O bat angga ngeni paninapan da ka!
King misan a bengi maniaman ku tudtud
Detang anino ta linto nala kabud;
Karing kekaldan mo ikatang mibukud
Mipalsintang tapat, wagas, at makatud;
Arapan ning altar kata siniklaud
Sinumpang matalik king lagyu ning lugud;
Bagting na ning sintang kekata mibuklud,
Kamatayan ya man, aline apatlud.
King misan a bengi kakung teguimpanan
Ing ati kata mo busal ding tanaman;
At lalam nang sinag ning masalang bulan
Sinumpa ka kaku, sinumpa ku naman.
Maglua tang pengakung nung dunutan da man
Ding mal tang pengari butul ta at laman;
Dapot itang sintang karelang titulan
E malyaring mate king kapilan paman.
Misan peninap kung king Eden a mula
Aku mo ing Adan, ikamo ing Eva;
Magmain kata mo karetang lilung da
Ding myaliwang dutung, berdi, at mabunga;
Ayup lang daralit babo ra ding sanga
Begayan ding batis siping ding sampaga;
Paniatang ning silim ing Guinu tipa ya
Sasalubung katang pupuring sasamba.
Rosa, kasampat na! Agyang paninap mu
Mika atin katang pisugue pangaku;
Pablasang kanitang eku pa dinayu
Pagnasan kung ikang kakung akasuyu;
At maniwala kang ika at ikamu
Ing apalsintan ning mabilug kung pusu;
Dapot numan anti lugud kung milalu
Keni ya misimpan, king kilub ning salu.
Kanita maselan, sutil ing panaun
Kapitna ning bie ku ati ne king aun;
King balang penandit eku mipaindatun
Tatamban ku wari king lablab ning pugun;
At ing kasakitan ning bie susun-susun
Anti kung mamusan dusa at pagmalun;
Inia arapan mu makanian kung memun
Banakung dumayung manaliwang gabun.
At kabang mamun ku tikis keng kinimkim
King kakdug kung salu pamagnasang sakim;
Pamikawani ta kanian ke asimsim
Agta nang mapait ning malsintang lijim.
Kabang lalon ke yang banuang mali-malim,
Peka-pangaku kung wagas at taimtim
Ing lugud ku keka eya mangulimlim
Angga king ing bie ku takpan ning sisilim.
Ngening ing aldo ku malale neng lalbug
At malimadmad na sinag nang tatabug;
Dapat sa king diwa mimin nong melabug
Pingalip nang simpan nining salung kakdug.
Dapot angga ngeni makinang yang bubug
Ing panaguimpan kung ikang maguing irug;
Ing amlat nang paldas ning bigung panirug
King marimlang aun kagum keng mabaldug
Nung pagumasdan me yang e mipaindatun
King pader a batu mamaltuk a alun;
Makanian ing sintang bigu ning panaun
Maibug neng gabakan yang salung mamalun;
Kalupa ning bining mikutkut, metambun.
Maspak yang manasit lunto babo gabun.
Makanian ing sintang mipase king napun
King paninap muman pilit nang babangun.
Karing paninap ku metupad, meganap,
Ing ibat king napun lijim kung pigagap.
Aklis ning kaladua dinininan mung lingap,
Kau ning panamdam inaplak mung ganap;
Ing kekatang banua milako ya ulap;
Samyu ding sampaga kekatang asangap;
Mikalugud katang wagas at masapsap---
Meguing bandi ra ka king kakung paninap.
Ing Pamagjiganti
Neng Renato B. Alzadon
Tinipa la patag dening taga-bunduk
Karas da king baryu atmo pali buntuk;
Mipabaluan tamung tanak na at subuk
Ipagjiganti re ing mal tang pamuntuk!
Agpang mo karela ala lang kabaluan
King pangawala na ning Kapitan Roldan;
Ngara karing anggang taung menungkulan,
Ing Kapitan ayni yang dapat luguran.
Ngara pa karas king ugali at dapat
Ing Kapitan Roldan ala yang katapat;
Ing lugud na king Dios malabab at tapat,
Nung mangamanu ya, atmu pangasampat.
Nya ngara nu re diklut pepasaken
Ken tala tambangan at gisanan paten;
King barang tangalan ding maldang memalen
Daramdaman taya ing aklis ning Balen.
Byernis gatpanapun king bayung Eskuela
Y koronel Gumban biglang dinatang ya;
Ding tau king baryu pepayaus nala
Atin yapin kanung mensaji karela.
Ngana ning Koronel: labis kung kelungkut
Ing kapitan Roldan kabud da nya dimput;
Ding guinawa kanian dapat lang mabagut
Panintunan mila nula man salikut.
Kening depatan da ding taung marawak
Antimong aku nang karelang inakdak;
Pablasang daya ke bilang kamag-anak
Ing Kapitan Roldan anti ke mong anak.
Detang paka-patig kalako da kanian
Bulung-bulung tamu at milalawayan;
Balu tang mausta aldo lang panayan
Mamaksing king baryu ing matning labanan.
At misan a aldo miglapitpit lapin
AK 47, automatic carbin.
Miglagapak la ding Armalite M 16.
Pakasakab-dukmu tamung alang sapin.
Mikit ing akbungan, mikit ing panagkas
At alang patugut ing syuk da ding balas;
Ing balang lapitpit agad atin ablas
Mate na nung mate alang bisang matras.
Karing anggang laban a tengalan tana
Ing labanan ayni maka-aliwa ya;
Uling balang panig ing atyu king lub da
Ing pamagjiganti king parsalaman da.
Keng lub da ding kilual pete re ding PC
Keng lub da ding PC Hukbu lang dinali;
Ngening ing tutu na metung man kareti
Alang makibalu king tutung milyari.
Era naman balu nung tutung mete ne
Guewa reng sandalan ipagjiganti re;
Ing pamagjiganti dakal ya a pate
Pati ding memaryung epa batu bale.
Ing labanan aini maguing aral ya sa
Lalu na karetang tatalan sandata;
Ing pamajiganti a bunga na ning mua
Bubulagan nala ding matang masala.
Ing kapitan Roldan pilming ena buri
Ing e biru-birung dayang tinulari
Uling king dayang yan ing makipasari
Ing ke-alan isip a pamagjiganti.
NINOY AQUINO
Neng:Renato B. Alzadon
Ginulis antimong kildap a miglate
Ing balitang baryung biglang mengulate:
Y Ninoy Aquino tane makarate
King karsel nang maskup, malapit nyang mate!
Malapit nyang mate, mapatlud inawa
Ing talapamingua na ning demokrasya;
Gobyernung Dictador uling titulan na
Dekap de at kilung king bayang magdusa.
Uyab na pin nitang dusang milalalu
Inia makanian yang pane saskup salu;
Ngara ding linawe tin yang sakit pusu
Alang makasabing akua nang milapsu.
Milapsu ya man mo king sakit a sutil
Ala nemang ligtas karing paka-baril;
Ing korte Militar bininyag neng taksil
A dapat mabite king depat nang sawil!
Subali kaniti, maina ne katawan
Pabulan na maiguit ing eya mamangan;
Antimong protesta king kapanyupilan
Tintu na king lub na king ali ne mangan!
Kealimbawa na magmalun a ayup
Bisa yang milaya king jaulang maskup;
Bisa yang dalakit king bayung lupalup
Karin, nung nu ing Dios yang Aring sasakup.
O king kaladua na ninung magpalaya?
Ing saket ? Ing bite ? o ing danup kaya?
Maski sanu karen ngaring mapanula
Y Ninoy mate yang alang panga-kabla.
Ing akalinguan da dening mapanunggue
king ing kamatayan misteryu yang bague;
kapilan? Nukarin? Makananung adle?
Ing Guinung Miglalang ya mung makimale.
Oini pin ing tanda: mekabulad na mu
Mipaintulutan yang paulu ne pamu;
Ken ne peka-lasan ing malating subu
Kena na king labi ning mutyang kasuyu.
At pepaulu ya king aliwang bansa
Migdatun ya Boston angga king sikan ya;
kabud menumbalik ing sadyang gilas na
Mine yang minuli king bansang tibuan na.
King labuad nang tibuan ustu yang midalpak
Iniang barilan de ding alang patawak;
King pangamate na balen ya ing kiniak,
Balen yang mig-alsang linaban king dawak.
Bakit eya mete king karsel a maskup?
Bakit ene pete ning salu nang saskup?
Bakit ere pete dening mapanyakup?
Bakit ene pete ning milalung danup?
Atin Dios! Atin Dios! Ing Dios Ya ing Ari
Ya at Ya mu kabud mipamintuan buri.
Mekad kaburian na king ing taung budni
Y Ninoy Aquino, mate yang bayani.
NINU Y NINOY?
nang Tony M. Pena
libutad rehas kalwangnan
mikulung ka't miyatulan
king paratang kasalanan
e mu gewa kapilanman!
e mu man ikwang mitalpak
king marimlang dalan tarmak
sinadya ra kang sinalmak
ding isip marok't talamak!
pitlud de man inawa mu
pete de man katawan mu
manatiling mabye pa mu
karing balen kaladwa mu!
matalik mung kapanwalan
ing rosaryu yang santungan
akbung baril ning kalaban
siklaud yapin balu tangan!
king tahimik mung karinan
milyun konfeti mumuran
pasalamat sasaluran
ing kekang bye pupugayan!
(dapot e ya pa mikutkut
bangke na ning mandurukut
malulupus madadamput
king sarili nang bangungut!)
lulupa yapin ing bye mu
king Ginu tang Jesu Kristu
dinaun me bugtung bye mu
mikabus la sa ring tau!
NINU MO TA YAKU?
By Monette Mallari 8/9/05
Payapa ing banwa, mibait ku king kama
Marahil dakal lang doktor ampon kumadrona.
Miglingun lang malugud kanaku ban akit da
Nung ing pangabait ku malusug at masaya.
Walung oras ing milabas, ring anak gugulisak
Ating silab king tulid bale nga ra ngang gagakgak.
Inyang lumwal la ring kapatad nga rang sasabi,
Aro Ima, tikdo ta pu, king siping bale mikakalabkab.
Ing mabilis a pangapalyari, Ima ku mibalikwas
King pagkeran nang masanting kama, a maliwalas.
King takut at galgal binwat ing mayap a anak na
Miglakad at memulahi king dalan para miligtas la.
Inyang kelwatan apansinan na, ing bayat a miras kaya
Apagumasdan na ing mayap a anak a dadalan na
Aliwa ing bayung bait, y Junior pala ing kakargan na
Mipatuknang bigla, kaybat bigsak ne ing bibitbitan na.
Masakit ing bie a kekeng delanan, mesilab ing sabla.
Ing larawan nang Ima, a ginulis nang Vicente Manansala
Mibaldug king lande, mituki king mabagsik a api
Meging abu, ing pakamalan nang larawan ning Indu ku.
Manyaman mamangan nyang ikaming makatipun
Ing lamesa mi king bale, dulang ya mu kababan.
Labi keng atlung mikakapatad a makapadurut
Misasamsaman kareng dilis, tuyo, galungung at buru.
Inyang malati ku, sinabi ning kumadrona nang Ima
Siguru reng anak tamu e ra na takman ing katimawasan
King bie ta king Pilipinas uling marakal a kasakitan.
Tata’t Ima e milako pagasa, menalig la Ginung Mayupaya.
Ing suwerte king bie, maralas daratang king tau
Patse manalig tamu king Dios a malugud keka tamu.
Ibie na pin nung nanu ing pamangailangan tamu
Ing buri na ning Apung Ginu ing manalig tamu.
Inyang ing pangane mi miwale, miglakbe king Amerika,
Karin pulut panilan ampon gatas, mamagus alang patna.
Deng kapatad na at pengari, inagkat nong munta
Inantabayanan nala king pamaglakbe para akayabe nala.
Masuerte ku miras ku king bansa ning Amerika
Mabsi at masagana ing kabyayan kene king lauta.
Ding mansanas, ubas, at aliwang bungang tanaman
Babye sikanan king kanakung masanting a katawan.
Pasalamat ku kari Koyang Ernie at Atching Angie
King lugud at sakripisyu, aparas ra kami keni.
Pupugayan kula king masanting a bie peparanas da
Ban mitigpo kami king masaganang pamibie-bie.
Nino mo Aku Ginu, obat kuswelo binye mu kaku
Malugud a esposo, at mangayap a anak ku.
Y Jowie pangane ku, susuyu kareng kayanakan
Y Justine ampo y GJ seserbisyo king pisamban.
Pasalamat ku Ginu king grasyang binye mu
Nino mo Aku, nung e ku puryan ing babye mu.
Ing tula at ligaya lalapo kening pusu ku,
Ninu mo Aku Ginu, obat kaluguran muku?
For more Kapampangan poetry, click:
http://maxpages.com/poecia/poecia18
To see the previous page, click:
http://maxpages.com/poecia/poecia16 |