TABLE OF CONTENTS
1. Catalangan Cang Tatang - Arnold Batul
2. Ing Amanung Kapampangan - Renato B. Alzadon
3. Maria Celia - Renato B. Alzadon
4. Kaninu Ing Parsala? (a crissotan) - Rafael Maniago
5. Bulanglang Biyabas - Tony M. Pena
6. Dalit Ning Malasing - Renato B. Alzadon
7. I Gloria Ampo'y Aida - Aida Tanglaw Aguas
8. Ing Tawling Inuman - Vedasto Ocampo, poet laureate
CATALANGAN CANG TATANG
by Arnold D. Batul
(especially written for Father's Day, 2005)
O! Tatang ming / alang pacundang,
Queng nanu man masucsuc mung dalan / a lebasnan.
Galudgud nang Indu mi’ng / mayumu mung palsintan,
Asias at sibul / ning quequeng pangaragul.
O Tatang! / Eku pa quelinguan,
Ing belasbas mung lugud / macalate mabilug pangatauan.
Licuan mucu man / at minuli na qng quecang cutcutan,
Pagmasusian cung tuquian / ing quecang cabilin-bilinan.
Luguran me ing para mung Tau / ngamung menamanu,
E me panampalasan / ing pusu ng Indu mung ibatan.
Balamu napun pamu / ining inapse mung aini canacu,
Yng sepu ning dila mu / mipnu iang Capampangan a iumu.
Bigla cung aganaca / queng panimanman cung menariua,
Tatangaban mung sabo liga / bias iatang bacang bucal-bucal qng tula.
Pacarungut qng dulang / anac mung cacung panimunan,
Pacatamiming panenayan / ing sabo ligang tictac qng niaman.
Dios co! Dios Co! / Cuculasio quilub ning puso co,
Macasilo lugud dinuang mo / queng Tatang cung Joe pemalaguan queti yato.
Salamat Pu cang Tatang / Ibpang mipnung tapang,
Mabagsic ia man datang / Prinsipi ne man quing kapanupaian.
Mangalapad nang tacde / cang Indu cu magsale,
Queng guisalan nang aldoldo pamibiebie / careng pago na macasable.
Lugud bina ing dinaque / niting Tatang cung meangubie
Quening pusu macalate / suging lugud tune tagumpe.
Memucsing laman / qng pago mu’t tacde
Macapulaput malumane / carening pago cung lipit pa male.
Balamu napun mu pa inapse / pamanulid mung dalan cung mibabacle,
Quinablas qui’lual mung labi / pangainipan mung Tatang naku munaman bili.
Ngeni cu na apagtinaptinapan / mangataram a palat mung delanan,
Ngeni cu na aintindian / ing amanuan mung pamangainipan.
Tatang nacu mu naman / ngeni’ng cacung cabilian,
Panamdaman cu na naman / ing gacarosang guliut-guliutan.
Ngeni ku maniglo / quen Tatang / lugud macasilo,
Dungut queng pamangan / ecu ne caiagcatan.
Pago ming macaiquat at pami-iabe ming maiatiat / ‘singiumu ning inuiat,
Ngeni cu binuclat / aldo iang masampat quening bie nang e miglambat.
Manulu cu lua / carening atin Tatang e man matula,
Acacua cung masosora / uling quen Tatang iacu meulila.
Nga cung maniambitla / carening taung e matula,
E ca man mamilang macatadua, ica ing lulua queng burol nang tatang mung meuala.
Pegmasusian cung bina / maca caban licuan nang Ibpa,
Ing turuanan qng caiapan / dening apu nang matulang disnan.
Nia ngacu mu naman sasable / careng mingatbang pago iu abe,
Pacamalan ie antimo y Pepe / palaio neng Tatang cung meangu na bie.
Maniampucaqui qng tula / duduang que / cacaluguran cu’t cadila,
Iabut me cang Tatang / lugud nang catuliran caiang panenaian.
Lugud macapanatdas aptdu / itubud me ing pusu mu,
Uling queng emu male / y Tatang bucas iburol da ne!
ING AMANUNG KAPAMPANGAN
Neng Renato B. Alzadon
Ing amanung kapampangan, nanuya?ta ?
Diwa yang menibat king Matas a Diwa;
Inyang mabugtu ya king labing makudta
Mika-lindayug ya?t mapinung tumaila;
Sakdal ya karilag! Guintu yang salita!
Kawili-wili yang bibigkas ning dila!
Ban gamitan tayang makipag-salita
King Ari ding Ari, king Malam a Ibpa.
Gagamitan tayang taimtim mangadi
Arapan ning Ibpa tapat sasangguni;
Ah! Nung marapat yang ibigkas ning labi
Neng kasabi taya ing Ari ding Ari,
Karapat-dapat yang yagape?t ilimpi
Kenu man salita ning nanu mang laji;
Inia yapse tayang alang pamangimi
Ing amanung sisuan a guintu king uri.
Guintu ya king uri, ?nia naman ding watas
Papalkas de ningning bayang e mapintas;
Ala lang patugut maniabing matatas
King poesia?t prosa, at karing kalatas;
Yang panaguimpan da ing akit deng mitas
At mitaluktuk ya king siduan nang matas;
Ban ding kapampangan lubus dang abatas
King ing amanu da, amanu yang pantas.
Nuan tamu kabalen! Ding labi ta mismu
Ila ding migmana king guintung amanu;
Inia king kekatang pamipagmananu
Gamitan tala ding salitang maguinu
Ban manatili yang maslag at mapinu
Ibie ta ing lingap a e mamagkanu
Eta ya pabustan siran da terminu
Ding alang masabal a magninu-ninu!
Ing amanu tang mal, lon yu, makapakiak!
Mika panagkas yang terminung masalpak!
Dening pesi-uling miglayas a anak
Apulut do ketang delanan dang pitak!
At pablasa kaseng kuto la pamalak
Pikatang-katang de ing dinat king labak;
Bala ra dangalan king kanuan mitumpak
Maniabing magaspang at masalampitak!
King pamitipun dang miminum, magsaya
Pakiramdaman yong maglabit, mangaya;
Ere balung yapse ing laman dang diwa
Nung ala yang samut terminung masagwa.
Ding terminung detang makasulak daya
Ela kapampangan ibat king samula!
Ing amanung sisuan eya salaula
E ibat king pitak, ibat ya king ibpa!
Ding terminung masias mengari lang dikut
King palayan tamu kabud nala linsut;
Nung mipabustan lang dagul mangulaput
Ing palayan tamu masira, mapuput;
Inia dapat tamung lague at mamagut
Atsitan tamu ing malalam dang yamut;
Ban paniatang na ning aldo pamamalut
Ing gapasan tamu, pale alang samut.
Kekatang manasik, tutu tang e buri
Ing mamalut tamung pale sari-sari;
Inia manibat king pamanialbag bini
Ding bububud tamu binutil lang pili;
Makanian mu naman karing mal tang sapni
Ding pupunla tamu amanung lang budni
Uling nung nanu ing sisuan da king labi
Ya ing idalit da king pamag-bantiti.
King ban lunto tamung masipag manasik
Ding amanung budni palto tala litik;
Ipalkas tala ding terminung malantik
Antimong sampagang king kanbas linalik;
kapamilatan ning wagas tang tangkilik
Ing seda nang sutla milako ya baltik
Makanian yang lunto leguan at salpitik
Ing mal tang amanung king pusu darantik;
Ing amanu tamu king bayang maniulul
Makisugu tamu, ibie ta ing tungkul
Dening lumang pluma gawan talang sarul
Batang pamaligtad ing gabun nang uliul;
A sumaup tamung manese , mangambul
Bayang maniampagang malagung pamiukul
Layun magparayo king banua nang asul
Ing amanu tamung dapat pagmaragul.
Pagmasabal taya pablasang yang ubud
Batang misampulung king lagyu ning lugud;
King pamiaduangan yang magsilbing birtud
Batamung maniabing malagu?t makatud;
Potang apansin da ding kangatbang bakud
Ing amanu tamu malambing ya agud
Ela mikakunung mabe?t makibuklud
Lalam nang salilung ning pamikalugud.
Luid ya ing amanung inirug tang mutya
Mamutyawi ne ing aldo nang sasala;
At malaguintu na ing tenam tang punla
Magpatawe butil king tanke maramla;
Nung atin man mansa king seda nang sutla
Pamaglambing nemu king sepu ning dila.
At kening binie nang malagung salita,
Pasalamat tamu, king Dios a Bathala.
MARIA CELIA
Neng Renato B.Alzadon
King pangasandal na ning kekatang indu
Ikit keng menangis, tatatap ya salu;
Linapit ku keya. Kanian ku abalu
Sinulat ka pala, kapatad ming bungsu.
Manibat pin iniang mina at sakit ya
Ika ing parating laman ning isip na;
Apigampa napin keka sumulat ya
Banakang atdanan lugud at alala.
Katula na rugo! Tinanggap yang sulat!
Agad binasa ne ing kekang pakibat.
Timan nang saguiwa bigla yang mepanat
Selisian ne ning lua, lungkut, at pagsalbat.
Ining sinulat mu sakdal ya kapait
Dening sinabi mu atmo pangasakit!
Mengari lang punyal, maniugat, manatsit
Mitmu lang palkara ampon paguinakit.
Ining indu tamu paguinakitan me
Uling tilutan nang keya ka miwale.
Guewa na yan keka king ban alisyan me
Ing e makibirung kasakitan ning bie.
Pemayapan na pin ken ka king Menila
Ding kalukup mu ken eno man aliwa;
Pablasang ing keyang wagas a pigampa
Ing akit naka sang minuan at mipala.
At saka mo ngeni matni mung sasabian
Atin kang indu ken, emu ne Kailangan!
Inia sinulat ka king bamumung aduan
Ing ene susulat keka, kapilan man.
At king tauling parti inaus meng sawil
Ngamu king yang keka minunang migtaksil;
Bilang kayablasan ning depat nang ingsil
Ngeni, Ika namang kaya mangi-sakwil!
Ining indu tamu nung sikwil meman sa
Pakisabi ku mu, eme sa susumpa;
Datang ing panaun kekang abitasa
Keya ka menibat, laman naka?t daya.
Datang ing panaun, kapatad ming bungsu
Akit ding mata mu nung nanu ing tutu;
Kanian ne dulapan ning mau mung pusu
Ing sakdal nang lugud ning tune mung indu.
Sakali muli ka bameng ampanganan
Karing laurel mung miputung king kanuan.
Isabit mo ketang pikurus a kwayan
A pekatanda ning paldas nang libingan!
"KANINU ING PARSALA" - a crissotan
neng Rafael Maniago
URADO:
Ninung ating kakulangan, ing pengari o maestra?
Neng ing anak eya biasang akamulatang salita.
Lalu na king Kapampangan, ing pisasabyan tang paksa,
Ing amanu tamung Siswan, tunggal ditak mawawala.
Popular ya at masikan, ing Tagalug nung lawan mu.
Dapot e na buring sabyan, tukyan ta ne ora mismu.
Mibait tang Kapampangan, ing salitang emu nanu,
Manatiling Kapampangan, lalu karing anak tamu.
TALATURU:
Talaturu king iskwela, ala na keng pakibatan.
Gagawan mi ing agyu mi, ing kekaming katungkulan.
Ituru la king matulid, king ganaka ing usturyal.
Miyayaliwang paksa, ban mitatak ing kabyasnan.
PENGARI:
Ing problemang pisasabyan, oba't ding anak ta ngeni,
Ditak at kapurit na mu, o't palati nang palati.
Ing amanung Kapampangan, king bale mi misasabi,
Mas dakal pa ing Tagalug, lulwal king karelang labi.
TALATURU:
Ikayu pin ding pengari ing sukat parsalanan.
Ikayung dapat mituru, amanung akagisingan.
Kabait na kekayu ya, pilan banwang aumpisan.
Maratun ya king bale yu, nanu ing kekayung gagawan?
PENGARI:
Magobra keng patingapun, okupadu king kabyayan.
King bale eku maratun, Ima makanian mu naman.
Neng atin keng akasaup, king bale mi makatuknang.
Tagalug ing salita na, eya biyasang Kapampangan.
TALATURU:
Ing ninu man itang tau, king bale yu malalakwan.
Pagpilitan yang itulid, ituru lang Kapampangan.
Ikami ngan talaturu, aliwa ing maging sangkan.
Ding anak a mebiktima, ing Tagalug yang mimiral.
PENGARI:
Oba't alayu ing paksa, tuturu yu king iskwela?
Ing amanung Kapampangan, marangal ya at mausta.
Tutu tamung Kapampangan, kebaitan a salita.
Makalunus no ring anak, ing turu yu makalisya.
TALATURU:
Ala yu king patakaran, ing mesabing Kapampangan.
Nune Tagalug at Inglis, ing kekaming pisasabyan.
Ban potang miras no Menila, karing koleyu la magaral.
Mayan lalu ing pamagaral, ding karerang pakikwanan.
PENGARI:
Lalung alayu kekami, parsalang malilyari.
Asahan mi king iskwela, ikong pangadwang pengari.
Malwat yo pang akautus, pilang oras a milayi,
Patingapun yong kayabe, ikami itamung bengi.
TALATURU:
Ing panaligan mi kasi, kurikulum king iskwela.
Yutus ra't Tagalug – Inglis, ing buri dang mibandila.
Atin mu ring panimunuan, ding manungkulan king bansa.
Nanu mong akarapat mi, alayu kekami ing sala.
PENGARI:
Ding radyu't telebisyon, Tagalug ngan pisasabyan.
Ding tatalan king gobierno, Tagalug – Inglis mu naman.
Ing karelang panimunuan, lalu ya pang malalakwan.
Ing mal tang amanung siswan, ing amanung Kapampangan.
URADU:
Ninung dapat parsalanan, kaniting malilyari?
Ding dakal a kayanakan, dakal no ring malilili.
Dakal no ring managalug, mamag Inglis man parati.
Ing amanung Kapampangan, kailangan yang manatili.
Nung atin ko pung adagdag, karing mesambitlang puntus.
Talaturu at pengari, maglualan la ngang alus.
Ding manungkulan king bansa, okupadu la ngang lubus.
Asaan tala naman kekatamu makasaup.
Magkasakit kung mamili, nung kaninu ing parsala.
Pengari o talaturu, king amanung mawawala.
Matula ku't pagmaragul, atin palang Akademya.
Akademyang Kapampangan, nanu mo ing kekayung puna?
BULANGLANG BIYABAS
by Tony M. Pena
mamalis king mula, abak a maranun
lalam ning biyabas mebaldug king gabun
malare la't dilo bunga lang malulut
maligwa kong dimput king bakyung sinuput.
mipaintagun pin, ing malagung Bayang
malapad nang igu kending king balakang
maglaku yang asan mabye biyang kwayan
meyakwa lang byakus busal kailugan.
biyabas belatan, byang kwayan keliskis
kilub ning balanga bukal bang lunglabis
buluganan munang bulung larang nanis
ikid me king kalang manyapin pamispis.
ing bangi king kuran, bulung saging sep’nan
keng sabo mapali keka yang pulisan
katmung pinggan sartin yapag mo king dulang
sabe daring silyo biyabasa bulanglang.
lalam lilung byabas, lulan yantuk duyan
apis-apisan ke ing biye a manyaman
mulagat maninap i Bayang datang ya
bukas nakadwana maglakung biyaya!
DALIT NING MALASING
Neng: Renato B. Alzadon
Malaus ko kuyug. Sige, minum tamu
Akung taya abe; ing bayad kanaku.
Sige na, magtinda, metung pang Aneju
Pare, ban parejas: sukad kasapuegu
Kabang dudurut ya ing kekatang basu
Liwas-liwas tamung mipamie amanu
Ing buri kung paksa a pisabian tamu
Nung nanu tang sangkan ba?t kalulu tamu.
Para mo kanaku, sankan nang mumuna
Ya ing kekatamung pamanialpantaya;
Lon yu, king pisamban ing ipanaral da
Nuan la ding kalulu at makilua mata;
Keti sulip kanu sukat tang mibata
Bata?yang akamtan alan-anggang gloria
Matna kayu pare! Lawan ye ing banua,
Kekatamu ya yan! Kekatang magdusa!
Den namang makualta, ing tula ra lubus
King masakit a bie banyaga la alus ;
Ila naman kanung lunto makalunus
Manabu la ketang api king Impiernus;
Kanian no managkas, manangis, mamarius
Mangapisikan lang asupreng mamaltus;
At kabang panaun e mapda?t mapupus
Ing kasakitan da at pamanaguipus.
Atin ku pang dimdam keta banda keta
Ngana kalulu la ding Santo at Santa
Pigpamie ra kano itang pibandian da
At ing bie kalulu ya ing pinili ra.
Aba! Nung makanian lalto nia pin pala
Banal lang metunggue king Santa Iglesia
E ulining mayap itang depatan da
Nune ulina pin ning kakalululuan da.
Aba! Nung tutu ing daramdaman tang yan,
Santo tangan pare, santo keng inuman;
Minum tamu pare?magsaya tamu ngan
Ining kakaluluan tamu kabanalan.
King bata?yang dasan ing Gloriang karinan,
Ing bie tang kalulu eta ya lalakuan!
Ing bie masaplala, etaya buri yan
Uling yang saguisag na ning kasalanan.
Kapamu. Balamu makanian ya ata
Itang penaral da ding Prayleng Kastila
Bata?yang akamtan alan-anggang tula
Kaministilan mung bayaran tayang lua .
Uling yang mitanam king isip at diwa
Nia makanian tamung e bisang minawa.
Minawa tamu bie? nung atin tang kusa
Oita mupin, Pare, itamung e bisa.
Agpang naman kening ausan tang Inkung
A pantas keng Biblia at tanak keng bugtung
Ing turung yan ngana turu yang balatung
Lubas ya king bunga wari sa keng dutung.
Inia tinipa ya ing Guinung miniaklung
Ban king kasakitan akua tang masaklung;
Midinan tang DIWA ban ing balang metung
Timawa yang mukiat king kayang tungatung.
Sabi napin Inkung, ibat king minuna,
Alang pangabayu, ing Dios, sinabi na:
Nung pamintuan mula ding kautusan na
Minawa ing ibie mu mantabe ya keka;
Nung emo pamintuan kumit kang parusa,
Magkasakit ka bie magpampan ya keka.
Nung manawa ka bie ing Dios atyu keka
Nung kalulu ka bie ing Dios dinayu ya.
Pare, palague yu nanu ta kaulian
Nung magbayu tamung kasalpantayanan;
Ing pakakalulu pala kasalanan
At ing bie manawa ya ing kabanalan;
Ini siguradu, tuknang ing inuman
Mamag-obra tamu batang manakitan,
Uling itang Gloria buri tayang dasnan
At miligtas ketang aping piparusan.
Anti kung akakit deng matua at anak
Babai, lalaki, matas, ampon pandak;
Akit mongan galo panyilang ning abak
Lunto ing pagkabie king babo at lunak;
Manese lang sisi, biseru at bigak
Manese lang itu, bulig, ampon tugak
At karing kamalig akit mung mitambak
Ing dakal a pupul a emu asanak.
Wari?t king kanawan akua tang misane
Eta na paniglon ing lungkut at lumbe;
Makirungut ta man karing minawa bie
Ali tamu dungu. Eta mu marine.
Pablasang king diwa lubus neng miwale
Ing kaplas ning dusa nungnu ta mig-sale;
Ala tamung takut agya mang datang ne
Ing bayung Paraiso o ligayang tune.
Kapamu kakuyug, mitablan ku ata
Bisa nakung mamun at muli naku pa;
King ainum tamu aku na ing bala
Isundu yu namu ing kekatang tula;
Nung medyu anti kung metalusad dila
Ikayu na sanang balang manupaya.
Mupin, pabustan yung timbangan ding malda
Ining pepasiag ning malasing kung diwa.
I GLORIA AMPO'Y AIDA
by Aida Tanglaw Aguas
Banwa nang magmula ning '50 kanita
Manga apat o pilan ke pang banwa
King tuknangan mi lele pisakyan tren
Kabud lang merakal ring taung mamalingatu
Migbanda la kekami linub king mula
Mengapamulala ku kekami makatalangan la
Taung ali ku kilala keraklan lalaki la.
Kilub ning sala kabud na ating metung pamilya
Makisig a Tata, mayagang Inda, anak kayabe ra
Lalawen kula, ing Inda pasibayuan nang sasabyan
"Mapagal ya, mapagal ya", kening Tata
Marakal lang tau ring dinumug kaya." ana
Ing Tatang mapagal eman mamako timan
Masaya nang mata, kapalagen lub makalulan.
Kanayun na king `merkanang imalan na
Bistat man panaun kapali na
Mipangalamanu la ning kanakung Tatang
Mebigla king kabud nang pamanayan.
Kakung Ima maligwang maligwa pepatubud
Saymada pepasali suklati pepabati
Kabud na mika-piesta bakit kaya?
Ing Tata pepaynawa ya king pagkeran ring kakung matua
Tinuki ku sinilip dapot mengamulagat mata
Sapatus na eno leko ngeni makakera ya
Ing timan nang e makanyan ditak na galapak ya.
"Ma, Ma, itang tau migkera ya king katri yu eno leko sapatus na."
Ginalapak la ring dinandam, ngeni balu kuna
Maulaga yang tau, tuntunan mi makalwal ya.
Memyalung kung pasibayu king lande makalukluk
Rening anak nang mangaragul masanting at malagu
Dalagita, binatilyu, mayamu lupa e bubulad
Itang lalaking malati malapit ya keng Inda
Ining babaying kasing dagul ku lalapit ya kanaku
Kikintab nang sapatus king makinang tabla palapalatuk
Makyabe yang mamyalong lawe ku atyu karing sapin.
Ya pin ya I Gloria, meging PGMA kakung pekilaban kapilan pamu.
ING TAWLING INUMAN
by Vedasto Ocampo
Talaga pin namang – ing OBRANG MATINU
alang kamatayan ampon e susuku;
e mu atakpan king matuling a panyu
pablasang managlus king kilub ning salu,
inya ing KAYAPAN, ketang e mu balu
mengari yang KANTANG mag-busal king PUSU.
Nya makanyan ta lang PARANGALAN ngeni ---
ding IYAS ning BALEN ayanting Diamanti
at deting Diamanting binang makawili
gawan ta lang KWINTAS ayalang kayanti,
ing panungi tamu: lugud, dangal, puri
a leukanan king – panugaling SUGI.
Nu anti kasampat! Nu anti kanyaman
nung IKO ring kwintas ning Balen tang Tibuan!
`tin pa waring bage a makabaldugan
at migit king taung tapat manungkulan!
king kadakilan yu ala kong keliwan
king gamat na ning DIOS, a babye KANWANAN!
Nya kabang atin keng talapanimuna ---
kabang atin kaming apakisimpara
at kalalawigan a parangalan da,
miyatna ke kanwan – at king uli nita
ring hegana-ganang anak ning Pampanga
IPAGMARAGUL da, ing KAPAMPANGAN la.
For the next page, go to
http://maxpages.com/poecia/poecia16
|