TABLE OF CONTENTS:
1. Katoliku Ku - Rafael Maniago
2. Ing Boxingera - Ernie Turla
3. Comma Poems (introduction) - Ernie Turla
4. Masyas a Sorbetis - Tony Pena
5. Ing Kwentu Nang Gwendolyn - Ernie Turla
6. Pamanampalasan, Ituknang - Aida Tanglao
7. Anak-Pawas - Renato B. Alzadon
8. Poetang Managimpam - Orlando Maniago
9. Sanu Ing Tune Kapampangan? - Rafael Maniago
10.Mibait at Mirate - Ernie Turla
11.I Celia Ampo I Oscar - Martin Dizon
KATOLIKU KU
by Rafael Maniago
Mibayit kung Katoliku, mebinyag kung Katoliku,
Mabibie kung Katoliku, anggang miuman king mate ku,
Ing isip ku at kaladua at kasalpantayanan ku;
Kabanalan ampong tapat, yan ing pakikwanan ku.
Ketang babo na ning batu, mitalakad ya ing Iglesia.
Reliyun Santa Iglesia Apostolika Romana;
Ing batu yapin I Pedro ing peka-mumunang Papa
Atiu king Batikanu king Roma bansang Italya.
Dakal no ring mig-protesta, dakal no ring kinawani,
E muno abilang-bilang, ding kokontra nang parati.
Katawan nang Mistikung Kristo, kabilugan atiu keti.
Kabanalan king Guinung Dios, ninuman ing manatili.
Sinabi ng Hesukristo, ninuman ing patawaran yu,
Patawaran neng Ibpa ku; Nung ing patawad ala yu,
Ela naman mipatawaran; Ding manyawad king basbas yu
Mibasbasan la naman banwa, uling ing upaya kekayu.
Ing mesabing kayupayan, karing Pari angga ngeni,
Kardinales ampong Papa, mitukul karela iti.
Penimunan nang San Pedro, ing mumunang Papa keti,
Atiu kareng Katoliku, ing katutuan diling-dili.
Ding misulat a kautusan, king lalam ning Santa Iglesia,
Manatiling kautusan mangga man king alang-angga.
Alang nanu mang pamagbayu, alang kulang alang sobra,
Ing e tuki malakwan ya, kawani ya't magprotesta.
Ing Dios ya ing manusga, king Dios ngan panibala,
Uling ing kaisipan ning tau, atin yang sukad at mayna,
King mata na ning Guinung Dios alang e mikakasala,
Anya ding kautusan, Dios yamu ing makagawa.
ING BOXINGERA
by Ernie C. Turla
Ating atlung anak, mikakapatad la
Mikambal-kambal la, triplets ing aus da
Misan pisabi ra, nung nanung gawan da
Potang maragul nong talagang dalaga.
Nga nang Paraluman, "Ini siguradu
Maging artista ku uling malagu ku."
At nga na namang Loi, "Marahil, siguru
Maging doktora ku ban makapanulu."
Migpaniking ya pa'y, Hilary, sabi na
"Ing kakung paninap, maging boxingera
Ating kung babalan para panumbukan
Dakal ne atrasu keng mengalabasan."
Meyli la ring adwa, pigsisti re pa 'iti
"Ing boxing e wari, karen mung lalaki?
Neng babai ka mu, ali ka magsilbi!"
Dapot neng tomboy ya, pekibat na oyni:
"Itang manabusung maragul a aske,
Makaba katabe, mangasyas a takde,
Ot indat datang ya mumugun ya'ing bale?
At pwera kanita mamugka yang pane!
"Manyamugaga ta keng sipun ning alti
Ustung manatsing ne, mandilu tang pilmi
Pulkirya yang babi, kasaman keng dili
'Nya datang ing oras, myadya ya rin iti."
COMMA POEMS
by Ernie Turla
1.
Ke cine deng bulag ikit kong manalbe
Manalbe, manalbe!
Keng sapa deng pusa ikit kong kakawe
Kakawe, kakawe!
Ke babo deng sibad ikit kong lilipad
Lilipad, lilipad!
Keng dungan deng bangka ikit kong sinanlad
Sinanlad, sinanlad!
Keng sala ning bulan ikit ko reng aswang
Deng aswang, deng aswang!
Manintun lang ketan at dayang sipsipan
Sipsipan, sipsipan!
*************************************************************
2.
Keng mula ala kang damdaman tahimik
Tahimik, tahimik!
'Nyang misan kapitangan bengi
'Nyang bengi, 'nyang bengi!
Ke bale dimdam da ing pamag-palpatok
Palpatok, palpatok!
Meliswas ya'y Kulas uli ra reng manuk
Deng manuk, deng manuk!
Ke sulip tinipa ya para mag'masid
Mag'masid, mag'masid!
Mepukpuk ya buntuk male na mewala
Mewala, mewala!
Keng jip seke ro reng manuk ding tulisan
Tulisan, tulisan!
Potang maninum la atin nong pulutan
Pulutan, pulutan!
(Note: Jose Garcia Villa popularized the comma poems in English.
I fondly call them "echo poems", because each line is echoed for effect.)
MASIYAS A SORBETES
(a ‘comma’ poem in parody)
by: Tony Mercado Peña)
masiyas a sorbetes kanan keng manyaman
manyaman, manyaman!
keng wanan kung gamat maigpit talanan
talanan, talanan!
e ke kikinisan, agad yang magisan
magisan, magisan!
ditak-ditakan ke, ba keng a pilasan
pilasan, pilasan!
kandut-kandutan ke king dilang malambut
malambut, malambut!
wawa na ning dila ali ku pagkaymut
pagkaymut, pagkaymut!
mimingat mamakmul, batal ku mabaknal
mabaknal, mabaknal!
baka misanipan king tamuwal kasakmal
kasakmal, kasakmal!
ing sorbeteng masyas potang tumulu ne
tumulu ne, tumulu ne!
king gilid ning apa, dila ku kulate
kulate, kulate!
karen ping manakit sasyo ya linamnam
linamnam, linamnam!
mangasyas la batal king sorbeteng simsam
simsam, simsam!
ING KWENTU NANG GWENDOLYN
by Ernie Turla
Tiki nakung Pristine silapo king banwa
King banwa, king banwa!
Ikit ke karin ing miglakbe kung matwa
Kung matwa, kung matwa!
Ikit kya mu naman ing Ginung Miglalang
Miglalang, miglalang!
Kawangis yang parul maslag at kikinang
Kikinang, kikinang!
Tutu ikit ke ing Ginung mayupaya
May'paya, may'paya!
Ania kabalik ku atmu kung kasaya
Kasaya, kasaya!
Ing aranasan ku makapagmulala
Mulala, mulala!
Nung kwentu ku iti man'wala la kaya?
La kaya, la kaya!
Nung e la man'wala, ba nanan ku la ta
Ku la ta, ku la ta!
E ku rin magtubu ala ku ring akwa
Ring akwa, ring akwa!
Kanaku namu'ini e ku na sa'idake
Idake, idake
Sinup ku na mu sa keng pusu kabang bie
Kabang bie, kabang bie.
Oneng ek'wabatang e sabyan keng yatu
Keng yatu, keng yatu!
Bulalag ban kasi mabalu ing tutu
Ing tutu, ing tutu!
'Nya nung sakali mang buri yeng abasa
Abasa, abasa!
Ikong bisang tanggap diwa at pagasa
Pagasa, pagasa!
Yorder ye ing librung "The Divine Fairy Tale"
Fairy tale, fairy tale!
Apulu yang dolar nung morder ko keng mail
Ko keng mail, ko keng mail!
Uling ala naku keti king masala
Masala, masala!
Basan ye'ing libru ku, ikayu nang bala
Nang bala, nang bala!
Keni king ligaya pangadi rako ngan
Rako ngan, rako ngan!
Gawa kong kayapan ba tang mikit myuman
Mikit myuman, mikit myuman!
{Note: According to her story, Gwendolyn
went on a trip to heaven. It is now the
basis of a budding new religion called
Gwendolynism or Wonderlandism. It has
a website at http://maxpages.com/fairytale }
PAMANAMPALASAN, ITUKNANG
aida dalusung tanglao
Ka-15, na ning Mayu, 2005
Nukarin menibat ing tampalasan?
Nukarin, nukarin?
Makananung ituknang?
Ituknang, ituknang?
Obat kabagsik da?
kabagsik, kabagsik.
Nukarin megumpisa?
Megumpisa, megumpisa?
Menibat king pungol?
King pungol, king pungol?
Dindam na king atyan?
King atyan, king atyan?
Lipunan mataras, matapang.
Matapang, matapang.
Gubiernung migpabaya.
Migpabaya, migpabaya.
Punung mapanyupil, katuliran mesamsan.
Mesamsan, mesamsan.
Taung mipaburen, tatakut.
Tatakut, tatakut.
Atyan mengaranup, gagalukguk.
Gagalukguk, gagalukguk
Asbuk makatakup, ibuklat.
Ibuklat, ibuklat.
Saupan ya i Gloria.
Saupan ya, saupan ya.
Dila ra ring tau ibalik.
Ibalik, ibalik.
Buren lang miyapse.
Miyapse, miyapse.
Kegiwan, kabyasnan, gamitan.
Gamitan, gamitan.
Anak galangan, pasayan.
Pasayan, pasayan.
Busten lang timawa.
Timawa, timawa.
Kaganakan katutubu.
Katutubu, katutubu.
Tampalasan, gewa mu^.
Gewa mu^, gewa mu^.
Manayimik, makiramdam.
Makiramdam, makiramdam.
Kapayapan miral kekata ngan.
Kekata ngan, kekata ngan.
Sandata ning mayap a pamisip.
Pamisip, pamisip.
Amanung marangal, ilang miral.
Miral, miral.
ANAK-PAWAS
Neng Renato B. Alzadon
Talapagobra ku…piku yang matalas
Ing ibabarug ku king batung palanas;
Indat mitamakan itang batung masias
Manalamsik itang kapising metampyas…
At king katawan ku, neng tumud ing cablas
Antimong mangutcut ing sakit at caplas,
Anting paganaka king kalma nang maplas
Ning paintungulan cung linumud ning pawas.
Uling nandin abak asalubung kula
Ding akakalasi ku king Elementaria;.
Magdala lang librung mame king eskuela…
Magdala kung pikung papunta king obra.
Pinildis kung kupyang penakap king lupa
Yang meguing kambilan da ring lua king mata…
Pablasang ing luang yan yang lua ning kaladua
King kayanakan kung maranun mibata.
Kayanakan kupang maranun mipakde
King e makibirung kasakitan ning bie.
King ditac a sueldung paniuglung pagkabie,
Ing kakung kalayan tiquis keng piglibe!
Ah! Atin pa waring layang matutungue
Neng balang kimut mu ating makabante?
At pagumasdan da nung ganap no tibe
Dening kacung aduang malutub pang takde.
Kealiwbawa ku yang miugse bini
Tinubu pilatan ding batung mepisi;
Bisa kumang dagul…pakang ku king pali…
King ambun ning banua daralung…mangadi.
Oyan! Inamiam ku ing kalmang duajagui
Mamintu king utus agyang eku buri
Uling king karaklut a pamagkamali
Matanggal kung anting bulung a mélangi.
Oyan, papakit kung masipag kung kimut
Bakung e matanggal king obra mabagut.
Ing manintun obra, kacu makatakut;
Pambijira lamu ding kacu magdamut.
Menasa buri da ding ustu king lulut,
Ding atin sibukan at atin ayabut…
O nanu ta kayang kacung pakirungut…?
Ngening ing sibukan ku at beluan dimut.
Inia itang aldo anggang eya mamun
Ekia naman lakuan ing magbatung gabun.
Katakap ning silim kanian pa milulun
Itang kapagalan ning pepatingapun.
Nung painawa ku man king benging maratun
Ing kacung sikanan king bamung matipun;
Kabuklat ning abak pilit kung magbangun
Ban keta magobra lub ning patingapun.
Dapot ating benging eku mipaiglip
Lijim kung kikiacan ing bie keti sulip!
Ing pilit susulud king kacung pamisip
Ing anti ku waring makasumpang lasip…!
Ditak mang pag-asa ala kung asilip
Ban king dagat ning lua akua kung masaguip…
Ing pinduan ning bie ku akua nang mituklip
Eku man atupad banal kung pingalip!
Kaku, ing kabiasnan mal de ding anggang mal
Dalise yang guintung king piku mebungkal;
Inia naman aku pingalip kung banal
Lungub king escuela…at makapagaral.
Bisa kung mabiasa… bakong pagmasabal
Dening kalupa kung king dusa mipalpal
Dapot nanan ku man e bisang matanggal
Ing kakaluluan kung tanikalang bakal.
Oyan, anti kumong mikulung a pipit.
Ing kacung aula… dusa at pasakit
‘nia ing kamatayan buri keng lumapit
Ban patdan ne pintig…pusung maginakit…!
“Eku aintindian… bakit kaya…bakit?
Linto ku king yatu ketang eku malit..?
Nung mibait ku mu para magkasakit
Mekalilibu pang ena ku mibait!”
Kabang babarug ke ing pikung matalas
Ing paguinakit ku king banua kakablas;
Maniad katalaruan kaniang banuang matas
Ing pangabait ku kening kalmang maplas.
“Guinu ku at Dios ko paniawad kung lunas
Ing paintungulan kung belabalan paldas;
Agyang saguli mu bustan mung miugnas
Ing kasakitan na ning bie Anak-Pawas.
"POETANG MANAGIMPAN"
by Orlando Maniago
Makananung e malagu, makananung ere masdan!
Nung wari sa ketang mangga, malatapung ya king nyaman.
Palsintan de ring kakagli ding maselan king pamangan;
O malyari ing kabas na mabanglu yang anting duman!
Makanyan ya ing babaing pilsitan ku king paninap,
Pero makananu keng akit yang masugid kung pigagap
Uling asisilawan kyamu kareng kanakung pangarap!
King lalam kung pamanisip ,masisira naku utak!
Pero inyang abasa ke ing libru nang Ernie Turla.
Ing gagawang poecia susulapo yamu diwa!
Ding sampagang mangabanglu, batwin, tala at diwata,
Karagdagan lamung bersu ning poetang mamikudta!
Inya sana ing ninu man ing makabasa kanini,
Aulata me'ng sinulat, asne pang kapanatindi
Sinabi naping Rafael kapatad keng makawali,
Subukan ku pang sumulat banakumang mikaparti.
Makanyan kung makisabi nung kekayung mayapayan,
Bisa ku sang maging membru: AKADEMYANG KAPAMPANGAN.
Buri kia namang milusuk ing amanu tamung siswan
Banakumang makaambag king malati kung kagiwan.
SANU ING TUNE KAPAMPANGAN
by Rafael Maniago
Ing tau nukarin yaman, makatuknang o maratun.
Neng kayi ing salita na lenggwai na e makatuntun,
Ni ere man aintindian agyang karin ya mandatun
Kailangan yang magslita nung bisa yang makiayun.
Amanung disan na pilita' nang makiagum.
Emuman apagmaragul nung eka biasang Kapampangan,
Agyang deng pipumpunan mu, tune lang Kapampamgan.
Mibayit langan Pampanga salita ra Kapampangan,
Dapot eka mangamanu king masusing Kapampangan.
Buri mupa'ing managalug piglibe me'ing Kapampamgan!
Buri ke pa'ing makipamalen, nukarin yaman menibat,
Agyang pang ding pengari na mibayit aliwang lugal.
Pinilit dang magsalita, mebyasa lang Kapampangan,
Liguran de at dinilig, sinese'ing amanung siswan,
Deng taung anti kareti, karela ngan ing kapuryan!
Makananu ne man kaya ing anak a managalug?
Pengari nang Kapampangan, pakisabyan deng Tagalug.
Tubu langan king Pampanga pero taliwas ing usuk,
Ere tiru'ing Kapampangan piglibe re king Tagalug,
Inyang miras la Menila lalu ne ping Menagalug!
Makalunus no ring taung piglibe re'ing amanu ra,
Mibayit l'at meragul keang Rihyun a disan da,
Kasi naman ing Tagalug yang popular at daka' la
Yang sasabyan dang pilit, Pilipinas ing bansa ra.
Muna ya pa ing Rihyun mu, isip ku bayu ing sabla!
I Ima ku ampo'y Tatang, i Apu ku, ninunu ku,
Bayit langan king Pampanga ing salita dang amanu,
Kapampangan kilub bale, agyang pa sa king luwal mismu,
Kapampangan kepa murin, ding anak ku at apu ku.
Nukarin ke man sa miras, Kapampangan lubusan ku!
Mibait at Mirate
by Ernie C. Turla
Inyang keti king masala linto ka,
Keng kandungan nang inda mu, kikyak ka
Kabang deng makapatulug keka mayli la.
Magpakakuswelu kang ustu kabang mabye ka
Ban potang mate ka, ika ing mayli karela
Samantalang deng makapatulug, panangisan daka
I CELIA AMPO I OSCAR
by Martin Dizon
Nung misan ing sumpa amanu yang pipi;
Pakatunud yamu pusu ring babai.
Silu yang malambut, ayup yang pangati,
Layun yang sasangap king maslag a puri.
Abak pang maranun ing malagung Selya.
Ta ne makatimpu siping ning batya na,
Ta ya makalulung ing keang labada,
Siping ning talaga, lalam na ning mangga.
Uling king sipag na ning mutyang babai;
King pamamipi na, disna' ne ning bengi.
Mekabulad namu, metung yang lalaki
Ing linapit kea nga nang memungkasi.
Celia, nga nang Oscar, tatakut ali ka,
Aku ing sinta mu nga na king dalaga;
Miras ing panaun ing kaku at keka,
Batang pibutnulan, ing yumu ning sinta .
Karing kekang mata, bayu ku mipanpan;
Mabilug kung pusu, keka ke lalakwan.
Baket? Nga nang Selya kea tinambayan,
Ning mutyang babai king keang palsintan.
Celia, nga nang Oscar, keka mamun naku;
Mako kung marayu, lungub kung Marinu.
Baket, nga nang Selya ing pamagaral mu,
E mu na isundo? Ali na suguru.
Iti ya ing sangkan mamun na ku keka.
Ala nong gugulan ding kanakung Matua;
Ing pamagaral ku, mituknang na Celia.
Pagkalungkutan ku, nung e ku mabyasa.
Diku ne'ing kanwa na, ning kalulung mutya;
Kaybat nang migulut, saka ne inatna.
Oscar king pamun mu, aku e ku bisa,
Sulung magaral ka at yaku ing bala.
Makalmang lalaki anti reng duruyan;
Karing amanu na, ning keang palsintan;
Asaan mu Selya ing gintung kabyasnan,
Keka iputung ku, king maslag mung kanwan.
Megaral ya' i Oscar, ati ne Menila;
Ta ne makabusal pelalung masaya.
Kabang itang Celia a likwa' nang mutya,
E mamako gamat, king danum ning batya.
Neng bengi ing datang bayu ya matudtud;
Arap na ning altar, karin ya siklaud.
Ipanalangin na king Dios a Malugud.
Ing papagaral na akwa na sang alud.
Linabas lang aldo, ring bulan at banwa;
Anti lang pinandit, linabas kang Celia;
E la pitung batya, retang asira na
Ning sinta nang Oscar, bayu ya mebyasa.
Mekabulad namu karetang bisita;
Meramdam ing matning pakpakan at biba!
Oyan na i Oscar, ing Doktor oyana!
Mekisaksakan ne ing malagung Celia.
Gewa nalang adwa balitang ning eran!
Kebabalaus nang milayi king dalan!
King pangapalpak na, e ne abili man,
Itang tatalna' nang ma-uling a basan!
Metung yang awtung tinuknang malale;
Ing malagung Celia silip-silipan ne .
Ikit ne i Oscar, atin yang kayabe,
Tuki-tukya' nala, angga keta bale.
Kapanik nang Oscar, ngara ding matua na;
Ninung kekang abe? Ima, Tatang nga na.
Pasikloran ye pu ing kakung asawa;
Lesunan de wari, ing kalulung Celia!
Kabang sama'la mong, mipaninum alak!
Ding adwang miyasawang, alang pamibalak!
Atin pung melumud, nga na ning gulisak!
Keta pung talaga makasalbag ya bwak.
Anyang damdaman da ing matning siwala!
Mimin lang tinipa retang sabla-sabla;
Anyang isaka re bangke king talaga!
Ing malagung Celia, a paldas a kalma.
Nung misan ing sumpa amanu yang pipi;
Pakatunud yamu pusu ring babai.
Silu yang malambut, ayup yang pangati,
Layun yang sasangap king maslag a puri.
Nung misan ing sumpa, amanu yang pipi;
Pakatunud yumu, pusu ring babai'
E ko sa manwala king sumpang pangati!
Nung anti la'i Oscar, ding anggang lalaki.
King Utang Ku keca
by Renato B.Alzadon
Misan, ing Angel ning Guinu, dinatang ya
King kecaming baryu bebe ning aplaya,
Ding tau king baryu pepayaus nala,
Arap ning Bisitas…den, pinulung nala;
Magdala ya kanung paka-sakung pera.
Katmu yang bisitas karing daralana;
At ninuman bisang pera, den, kaya la,
Idala na ngan ing agyu nang idala.
“Mupin” ing digdag na ning Angel ning Guinu,
“Ding perang den ela pibandian ning tau;
Uling nanu pamang bague keting yatu
Bandi nangan ning Dios…inya ding pera yu
Nung gamitan yo man king tula ning lub yu,
Dapot magbalik la king minie kekayu;
‘nia nung ing dela mu apulu lang saku
Makanian la naman perang ibalik mu”.
“Ing Dios” nganing Angel “pagnasan nang tune
Ing akit nakayung misaplala king bie.
Inia ing pera mu dapat gamitan me
King ikasulung na ning kecang pagkabie.
Antimong tanaman, yan palabungan me…
Nung ustu ya lingap, gambul ampon sese,
Mayumu lang bunga ding keca na ibie
A peka galal na ning sikap mung binie”.
At kaibat, ing Angel, biklat nane kanian
Pasbul ning bisitas ning baryu kung beitan;
Makaba ing pila…niang akung mikutnan
“Apulu pung saku” ngacung tinambayan.
Apulu lang saku ding kacung pisanan
Lima pago kaili, lima pago wanan;
Aliko binili anggang eke disnan
Ing galut kung dampa libis ning palayan
Mibule-bule ku: nanu kaya ngeni
Ing sukat cung gawan karing perang deni?
Nanu tang negosyu keting yatung iti,
Ing garantisadung alang pangalugi.
Nung ali ka biasa king pamagmantini
Ding kecang pujunan kanan do ding bwitri;
At nung magbalik ku kening bie pulubi,
Paniatang ning Angel, nang sabian na niti?
Atmu na kasakit king metung a tau
Ing dimut a beluan king lakad ning yatu.
Akabyusan ke mu ing kanam a gradu
‘nia ala kung balu keng pamagnegosyu,
At mu naku kaina karas keng nomeru
Eko man abilang perang inuli ku,
Balu kung apulu la ring taliri cu
‘nia balu kung sabian apulu lang saku.
King kai-isip ku mipakde kung bigla
At apansinan ku malungkut kung kalma.
Oini, akung dili kening kacung dampa
Ala kung kasuyu king bie kung malugma.
At pablasa kaseng mangmang ku’t maluka
Balang tiliran ku, ali ko katugma.
Mecad ing tratu da ngeni manaliwa
Lalu na’t ing pera yanang magsalita.
Inia ban mitabi ing pamangulila
Yang apigampa ku ing saling pamilia.
Muna sinali kung malagung asawa
Pati na katuangan mekibayad kuna;
Sinali kung saken… mitunggalan kepa
Sinali kung bale…malualas ya mula,
At bayang milusuk ing kacung ligaya
Sinali kung anak, oita pin, adua la.
Pananese anak, eya gawang biru
Gumastus kang anti yang balding tutulu.
Paniali mong gatas…paniali mong baru.
Potang sakit lapa, makakarug salu
Ing singil ding doctor, makikipatlalu
King ketasan na ning bunduk Pinatubu...
Pablasang ing bie ra mal ya pa keng guintu,
Agyang mal ing singil bayaran mu rugu.
Kabang daragul la, daragul mu naman
Itang lalto gastus a emu alisyan.
At lalu na iniang maintun lang cabiasnan
Inigut lang pera king kaili at wanan.
At uling ala ping patad ing gastusan
Ding pera na ning Dios ikua rang megisan.
Agya sang kusing mu ala nang mitagan
Ban maguing kambil na ning bie kung menuban.
Nung kapilan naman ala nakung pera
Karing yapa datang ing Angel ning banua.
Bagting ning kampana ipamalita na
Arap ning bisistas…Angel manaya ya!
Kanian ku migising..mibangun king kama,
Ulining dine ku salikut ku sana.
Iniang kusutan ko ding kanakung mata,
Kacung apialas…maninap ku pala.
Iniang balikdan ke ing mutyang kebuklud
oita ketang kama maniaman ya tudtud.
O! tutu pin pala ‘tin kacu linugud
Ena anti iniang dili kung magbukud.
for the next page:
http://maxpages.com/poecia/poecia14 |