LIBRARY OF KAPAMPANGAN POETRY, page 11 - ERNIE C. TURLA, curator - Languages

1. Ing Capaniwalan Queng Bie - Ernie C. Turla
2. Qng Uli Mu - Ernie C. Turla
3. Ninoy a - Tony M. Pena
4. Poesya - Rafael Maniago
5. Abe Eba - Tony M. Pena
6. Ing Napun At Ngeni - Rafael Maniago
7. Salamat - Rafael Maniago
8. Mipacde Ca, Capampangan - Ernie C. Turla
9. Ing Lagyu Ning Bagyu - Tony M. Pena
10.I Tata Ku Bayu Ya Meyangu Biye - Papa Osmubal
11.Angelo dela Cruz - Rafael Maniago
12.Ing Damulag at Ing Panas - Ernie C. Turla
13.Ing Pakibat Cang Papa Osmubal - Tony M. Pena
14.Sinagiwang Langib - Tony M. Pena
15.Ing Cosecia - Ernie C. Turla
16.Karing Minuli Na - Tony M. Pena
17.O Pagdiwatan Cu - Segundo S. Romero

ING CAPANIWALAN QUENG BIE
by Ernie C. Turla

E mu sasabian qng ing bie / paninap yang anting bula
At ing angang acaquit mu / quen mung isip magagawa
Lipo-lipo arapan mu / at layun cabud na matda
At magbalic pasibayu / queng alapap na ning ala

Ing bie, abe, palague cu,/ tutung sucat paniwalan
E la magcamali yampang / deng awang ning panimanman
At bistat man queng queluatan / dasnan ta ing camatayan
Ing cutcutan aliwa yang / quecatamung panaguimpan

Ing bie ra reng taung bantug / queng larangan ning linia ra
Caministilan tang tuquian / quilalanan ing yambag da
Mistula ing paintungulan / nung alang direccion ing bie
Atin tang sucat parasan / e ta na mu cabud mate.

Catamaran o lacuacha / iti alang capupuntan
Dapat ating cang proyectung / macatanca para lacuan
Ban deng tauli nabangnan da / at tuquian da'ing quecang bacas
Mie la namang anti queca, / magprisiguing miamas-amas

Lito-lito gawing-gawing / anting lipactung queng dicut
Pihung alang mapirusta / careng pawa queng paticut
Dapot nung anti cang panas / magobrang alang patugut
Mipala ca queng quecang bie / ing dapat mu ating palut

Ania, ana, gamitan ta / ing oras queng ating cuenta
Ban e masayang lalabas / dapat tamung mahalaga
Ita sanang atin tamung / apirusta at pamana
Careng capara tang tau / potang caing ala ta na

QNG ULI MU
by Ernie C. Turla

Qng uli mu ating cantang / papayama queng pusu cu
Qng uli mu micayamut / ing romansang sacdal yumu
Qng uli mu deng ngang batwin / pipamisan da'ing tindag da
Magtestigus, papaltutu / queng lusuc cung pamalsinta

Qng uli mu ing caladua / sinigpo ya queng masala
At mipacde carangalan / anting micabus qng lugma
Qng uli mu magtumaila / la reng ayup alang patna
At ing luncut mi-alilan / queng lawiwi na ning tula

Qng uli mu mipala ya / ing mascup cung pilubluban
Migbusal cang anting reina / quening cacung pasaldangan
Inatdanan mu cung samyu / dininan mung cabaldugan
Ing maluca cung inawa, / minono cu caisipan

Mabibie cu queng dilig ning / lugud a babie mu cacu
Neng masampat a ligaya / ing atyu queng candungan mu
Qng uli mu mipasulit / ing mabibie queting yatu
Sinaguiwa anting abac / babo biga'ing panandam cu

NIÑOYa!
(Nang Tony Mercado Peña)

libutad rehas kal’wangnan
mikulung ka’t mihatulan
king paratang kasalanan
emu gewa kapilanman!

emu man akwang mitalpak
king marimlang dalan tarmak
sinadya da kang sinalmak
ding isip marok’t talamak!

piklud de man inawa mu
pete de man katawan mu
manatiling mabie pa mu
karing balen kaladwa mu!

matalik mung kapanwalan
ing rosaryu yang santungan
akbung baril ning kalaban
siklaud ya balu tangan!

king tahimik mung karinan
milyun konfeti mumuran
pasalamat sasaluran
ing biye mu pupugayan!

pero eya pa mikutkut
bangke na ning mandurukut
malulupus ya’t madadamput
king sarili nang bangungut!

lulupa ya’t paparehu
ing bie mu kang Niño Jesu
dinaun bugtung biye mu
para ikabyus ing tau!

POESYA
by Rafael Maniago

Kapitanga' na ning bengi eku binang mipatudtud
Ing diwa ku lipo-lipo a nung nangan mipanyulud
Manyalak kung alang bitse managap ku balang suluk
Tutipunan ku ing apa at saka ku pitutumpuk.

O kanyaman ing sumulat at kanyaman ing maninap
Kanyaman ing maglapo kuswelu kung sasagakgak
Akung dili kening lugal susulapo mamayagpag
Kambe ring amanung siswan mitimawa kung masapsap.

Ing poesia kanaku, bie yung alang kupupusan,
Ya mu kabud ing karame king penandit a malalam.
Eke miuman atarukan marimla ya king panamdam,
Mapali ya king katawan mabilug kung pilubluban.

Aku mu ing makibalu ing ninumang era balu
Ing pakibalwan kung aske alang lupa alang dulu
Ala nemang penibatan ala nemang liku-liku
Diretsu ing dalan na eme akit anggang sepu.

Ngening mipalaut naku king eku ne abalikan
Itang ibatan kung bula angin ne king kealan
Bitin-bitin kung dururut kanaku ping managimpan
Maligaya ing panamdam poesiang manyambitan.

ABE EBA
By Tony M. Pena

kapilan pa kaya milingat
malalam tudtud mung limpungat
ban kanita ika pin mingat
patulwanan luwang mabayat

ning kaluguran mu’t palsintan
panwalan tutu ing kasebyan
bibilangnan ning Apung Ginu
patak luwang e ka m’kakunu

peburen melaglag tinagus
king lupa nang Ebang tatangis
pakatandanan masinsinan
babaing sukdul kaluguran

mebagut yang ala mang kaplas
king makutkut tagyang kapilas
e ya ibat king talampakan
kanita e me damusakan.

ali ya ibat kekang buntuk
ban e me talangan pamuntuk
nune ibat ya kekang gilid
dapat mu e me isumangid

yanapin keka yang kapante
ban kaya e ka makipate
ibat yapin lalam mung takde
kanita akwa meng ipakde

ing babaing kekang palsintan
pekamasanting nang ibatan
yapin siping pusu ya ibat
ban lugud kaya ibatibat!

"ING NAPUN AT NGENI"
by Rafael Maniago

Nga kung magsalita ngeni, yakung dili bulung-bulung
Makalaut king bansa ku, karing puti makasamut;
Kakalilwa ing kule ku ing balat ku medyu duluk,
Peblasang meragul ku king marangle ketang laut.

E ku namang pikarine nune pagmaragul ku pa,
Itang bye kung milabasan ketang napung nakadwa na;
Babaslen ko ring pilapil, ding minangun ampong sapa;
Taneng abak manugak ku, gatpanapung manalangka.

Neng datang na ing sisilim ketang gulut magdapug ku;
Ban ding yamuk lumaut la't bubulabug lang mamako;
Magumpisa nong gumaga detang tugak ketang ango;
Detang bibi ketang sapa, karin noman magtampiso.

Damdaman kuno kanita ding kuliglig karing sanga,
Ding sibaung ampong durun, magtumayla lang plegarya;
Musika la king balugbug, balamu duruyan daku pa,
Ketang lalam ning kaliptus, ketang lele na ning mangga.

Dapot ngening mimasmas ku kening bye ku America;
Maliswas kung malingongo, mamirapal ketang obra;
Makitagalan king "freeway" detang saken kukurug la;
Eku malyaring mitalwi, ing sweldu ku magkulang ya.

Neng datang na ing mapupus, kakarug ne ing salu ku
Tuki-tuki no retang "bills" at tano misisiglulu;
Ing prisyun ku mitatas na uling kanu itang pengan ku
Amburger ampong hot-dog, a i-norder ku pang "to-go".

Pero neng miras na ing "week-end" makapaglibang naku man;
Mulayi nake Las Vegas, ban ing "pressure" makalingwan
Detang ipis, "slot machines", dice, piyalben at "black-jack"
Dakal at miyayaliwa pa, ing buri mu ati yu ngan.

Banaku mang makatagal ketang gastus a aldo-aldo;
Mag-pane ku king "overtime", mag-"double-job" kupa kuno;
Pero neng sake naku man kanining kotsi kung "brandnew"
Mipasno kung magmaneu makiramdam ketang radio.

Yaku naman malyari ku agyang nukarin muku dala;
Uling ing karanasan ku king maskup at king manawa;
Bastat panibala ku ngan king Dios ing egana-gana;
Uling nung aliwa mu ya ala ta muring agawa...

SALAMAT
by Rafael Maniago

Salamat karing kabalen, ampo karing Kapampangan;
Malugud at magmasusi, tutu king amanung siswan.
Ding manimuna kareti palakpakan la at purian,
Uling modelo la wari karing anggang kayanakan.

Talasulat at poeta, e sasawang maki-ugne;
King amanung Kapampangan, king miyayaliwang dane.
Mililibayang idea, king keang ikatagumpe
Patatagan lalu iti, manatili yang matibe!

Salamat king Akademya, ing susi ning kaisipan;
Pamagaral king amanu, ning balang Kapampangan ;
Marangal yang edukasyun at pundasyun yang masikan;
Balang metung kekatamu miririkil ing tungkulan!

Dakal mu namang salamat, karing anggang ortelano,
At karing talapagobra, king sipag da at talino.
Kikimut lang alang patna, king pamangailangan tamu
Kaulan la't pisanmetungan at i-ukyat la king tronu!

Salamat at antimurin karing anggang Pilipino,
Makabalen, at makaDios magsilbi lang todu-todu;
Ing puso ra at kaladwa a-ibie ra parang-tau,
Ing lugud da king balayan, sarili iyampang mismu!

Lalung igit pasalamat, king Guinung Dios a Miglalang.
Kaslag na ning aldo abak ing grasya na maka-lantang,
King mabilug a yatu, king keketang pilubluban;
Libutad ning puso tamu , karin ing Keang karinan.

MIPACDE CA, CAPAMPANGAN
by Ernie C. Turla

Mipacde ca, Capampangan / probincia ming pacamalan
Luid ca caring anggang balen / queti lalam ning sicluban
Neng ing anac mung y Gloria / masanting ya capalaran
Neng simbut ne'ing calaban na / queng milabas a alalan

Balawe cang susulapo / tatalangan ding manalbe
Caririan ding lalawigang / tutungguen tang siping bale
E re binuat ing anac mu / deng botantes da bigsac de
Dapot icua na ring linual / migwagui ya't migtagumpe

Mayap la pa ring qng Cebu't / Iloilo a malaut
Tingquilic deng miamas-amas / siguraduan deng miniambut
Ania carin yata sumpa / quesa carin qng Menila
At layun nang isundu ing / patacaran na queng bansa

Iti queca carangalan / neng anac me'ing mamuntucan
Ing batwin ning quecang lagyu / acaquit de cabilugan
Deng memalen queting labuad / ausan tamung Pilipinas
Pugue queca mangaintulid / qng uli ning suerting miras

'Nia agyang mang mitambunan / ca queng lahar iniang misan
Tinicdo cang pasibayu / pauli ring matenacan
A anac mu, mumuna ne / ing sugui tang presidenti
A migwagui queng election / ania magbiba ta ngeni

Tigtigan la reng cumpana / deng banda magpaseu la
Pagmasusian ta'ing tagumpe / magmasaya anting fiesta
Uling iti malagad mu / queng panaun iti lalto
Gracia yang pigcalub na ning / mayupayang atyu babo

ING LAGYU NING BAGYU
Tony Mercado Pena

Kapitna ning bengi, susyuk lang patugut
kambal angin-uran, tampaling makutkut
dudugpang dudurut king atap bubungan
ning bale kung tibwan king balen kung Sasmuan!

Matudtud kung intud, maliksing mipagpag
lukluk-siklod kaybat king kwayan a papag
sabe ning ingalung kurap ning paritan
alang patad pangadi manginung masikan!

Ding sasang tanaman pakli la palapa
ding bungang palapat kalat la king sapa
mabasa ing dutung panangab king kalang
alang asan, abyas, king balanga't kuran!

Danupan yang atyan king mesirang tanam
e parin mayutuk paninap-panamdam
tanam pasibayu kaybat ning delubyu
agyu ke ing bagyu, nanu ya man lagyu!

Ing batbat ning bagyu king bye na ning tau
e ya man maglambat dugpa yang marayu
agyu yang pibatan bigla yang mabating
ing tipun sikan-lub yang matibe banting!

I TATA KU BAYU YA MEYANGU BIYE

Nung ngening bengi datang ya i Kamatayan,
kaya nanu mo ing dapat kung sabiyan,
makananu ke kayang pakiyarapan?

Katayimikan ya ing siwala nang Kamatayan—
obat makatakut ya, oyan ing sangkan.
Makapagmulala ya’t makapuput ing katayimikan.

Nung ngening bengi datang ya i Kamatayan
eku bumulad, ala kung sabiyan.
Keng mata maratna ku nemung lawan.

Deng mata atin lang aldo pane makaslag.
Potang bengi pakiyarapan ke i kamatayan
kambe ning kakung abak a alang-kapupusan.

oscar balajadia (a susulat keng lalam ning
lagyung-talasulat a papa osmubal)

"ANGELO DELA CRUZ" - a tribute
by Rafael Maniago

I Angelo dela Cruz ing penibatan nang lugal,
Metung ya / karing masakit a baryu ning Pilipinas.
Ing buluk na ning gubyernu ngeni napin milalantad
Edana na rin asalikut kasakitan ampong kaplas!
King balang penandit ning bie, anti ngening 'salukuyan.
Misnang dakal a pamilya ding sinala king pamangan.
Ding sinala king iskwela ding dakal a kayanakan.
Nung ngeni ala yang kanan, makananu ya pa ing bukas?
Ena rin makapagtaka nung dakal nong magreklamo
Ding memalen mag-alsa la king salu ra mikakasbu!
Ding bitis da ampong gamat dila, mata ampong puso,
Malwat nalang makatali at ngeni tano pipiglo!
. Kalulu no ring kalulu, at lalu pang kalulu.
Ding taung era akakit, malilyari king gubyerno
Ding kekatang manungkulan babie da ngan ing serbisyu,
Aliwa karing kalulu nune karing mapilan mu!
I Angelo dela Cruz, pete re ing paintungula' na.
King balen nang Pilipinas iting balen a tibwa' na.
Tane manaliwang bansa karin ya mo mamagasa.
Nung king baryu e mikalma, manaliwa ya pang kuta!
Pamiyabe panalangin kametungan king pamisip
Pamag-alsang pilubluban pamangimut antimurin
Masampat ing pamaglinis anti mo ing tingting palis
Neng miyabe-abe tangan king istorya mayayakit!

ING DAMULAG At ING PANAS
by Ernie C. Turla

Iniang misan ing damulag at ing panas migaga la
Nga ning metung casi caya, "Oy, bulilet, nananu ca?"
Menandaman ya'ing malati neng laluan neng alang cuenta
Siguiran ne't inarapan, mequipag-matulid caya

Nga na caya, "Balu ra ngan deng ngang sabla maragul ca,
Acu naman malati cu, e cu paqui-tua'iti queca.
Dapot bistat panas cu mu atin cu mu ring guelingan
Nung bisa ca ngeni-ngeni lungub cata queng pustahan."

Meili ya mu ing damulag neng balu na masican ya
At agad yang mebisa'iti, nga na, "Pagumpisan tana."
At ing panas sinabi na, "Dinalan lang catimbang cu
Reng queng gulut cu misaque, anta queca pilan la mo?"

At nga ning damulag caya "Adua la mu queng isip cu
Reng adala cung catimbang caniti man e cu pihu."
"Nung macanian," nga ning panas, "nung por libra ing sicanan,
Ing labis cung lacas que ca, culang-culang mung dinalan."

Canita na apigunam ning damulag qng aguiang mang
Maragul ya at masican, e ngan caya ing capurian
Bistat malati ya'ing panas e re carampatan latian
Uling ala queng degulan ing guelingan at cabiasnan.

(inspired by Henry Wadsworth Longfellow's
The Mountain And The Squirrel)

Maybe not bad for an hour of writing pleasure :)

PAKIBAT KANG PAPA OSMUBAL
(Ibat Kang Tony Mercado Pe?a)

Menibat king kutang mung magmakalunus
oyni ing pakibat kung alus manaplus:
ala nang tutubu maski kapirangut
kening mebawug ketwan kung marurunut
liban kening dili’t bayung dimlang kikirut
at siguradung malume neng pakluran
ining inawang e bisang misalakban
king maligamgam pali kung aldo lalbug!

Sinabi mu manimutla kang tatakut
mapalyaring e mu man agyung ayakut
pakikwanan kung tune kule katutwan
ing tutu napin matalusad ya naman
misan ku neng dikma at sikmal matalik
kanitang pungul kupa mung sese kilik
mupin kinusad-tinalusad mabilis
busal ding taliri kung asmu kayimpis
abang ing panawun migdase buwangin
at tinalpak lang bitis kung alang sapin!

Ing tiririt at sulapo da ring ayup
e rugu tutu ing e la mawulaga
makabusal karin ing eganagana
antinamo ing biye at kamatayan
kaya naman kening ketwan kung kabilyan
ining aguman ning ligaya at lumbe
yang bugtung at matabang bining punlaan
dikil king sese matibe kapagnasan:
bilin potang mate, manatiling mabye!

‘nyapin makisamsaman kung makiramdam
king mayumu’t mabye tiririt ning ayup
at saken keng tawli nang sulapo ulap:
king tawli kung paglikas daig gulisak
ing marimlang kataymikan ning pantyun
at magmaligwang lumuslus king pibatan
karin king mapaling karinan pilunan!

SINAGIWANG LANGIB
(Nang Tony Mercado Peña)

sinaingsing yang sinagiwa
langib ning mipaldan sugat
a mabasang mimulagat
kanitang pepasibaywan
mukung pekipaten.

kinayud meng makutkut
ing malalam at makiput
balugang lunggang malumut
na karin ya makasalikut
kalame ubing pagkaymut.

na minunang mesarul
libutad benging makaburul
dimla mung mamuluput
pignasan meng ginamus
king kakung mapaling angus.

maluwat nang mepalut ing pale
kilub ning mitambak-tambuk are
libutad ning palayan malwalas
magumpisa ne namang maliswas
ining kutil-butil a matatdas.

kapilan me pakipate pasibayu wari
ing dimla mung limbag e mipakali
kening matatdas sisingo pali
susulput king makiput a yungib
ban sagiwa ne naman ing langib?

ING COSECIA
by Ernie C. Turla

Ing cosecia na ning metung / yang magdala queng dapat na
Aniapin ing utang a lub / e mu cabud basta-basta
Deng picautangan nang tau / balu na lang ablasanan
Quilalanan ing depat da / at e nala gugulutan

Dapot neng cai ing tau / pangaibat nang sinaupan da
Baguiang cabid queng tabug na / tungguen na nong alang cuenta
Map la pa reng e sinuyu / caya, o e na nebangnan
Estiman nong masalese / rerespectuan at panginuan

Alimbawa, mabie ca pa / uli na ning seguip naca
Ocaya e ca meyaring / abogacia nung e mu ya
Alimbawa, nung e mu ya / America e ca miras
O nung e mu sana caya / queng posicion e ca mitas

"Ot nu minta ing cosecia? / ot nu minta ing marine?
Sayang mu ing anggang sabla / a saup dang caya binie
Nung aniapin e mu anti / queng sucal da lub sisisi
Deting taung guintu pusu / neng e pala sunis iti."

Ing cosecia careng tau / birtud ya'iting mahalaga
Detang atin pupurian la / ing milabas balu ra pa
Balu rang balicdan ustu / ing bendisyun a tinggap da
At biasa lang pasalamat / cabang-caba, alang angga.

KARING MINULI NA
(An All Saints' Day Offering)
Tony M. Pena

mayap pa ikayung minuli na napun
ing katawan matbud mibudbud king gabun
kaybat midaun ing butul king aun
Maupayang Gamat kekayu minaun.

makarirya kayu santing yu kabilyan
alang sasaingsing, oras e mirasnan
bye alang angganan kekayung pintalan
benging madalumdum e yu na dalanan.

saguli sindyan ke'ing kandila king baul
king arap ning altar lablab na kumaul
ban keta akit yu ing keti king sulip
ikaming melakwan akwa yung a silip.

pangaras yu lalam oyni ing disnan yu
makasiklod ke ngan sisiguk mangadi
"kanan mi aldoldo ibye mu na ngeni"
boses gagaralgal kekaming likwan yu.

O PAGDIWATAN CU
nang Segundo S. Romero (1913-1996)

O pagdiwatan ning pusung malsimî,
Icang pagcaruglán qñg aldó at bengi,
Damdám ca't mulingid caniting mensaje,
Ing lamán ning pusù queca paintindí.

Ing malsintáng pusù a queca daralung
Daralung a pusù bisa yang payampún,
Payampún ya warì ba meng isalilung
Isalilung me sa lugû mung malabung.

Malabung mung sangá lalu pang mabulúng
Mabulúng ca pin mo dutung a maragúl,
Maragúl mung sangá wagué-wagué bulúng
Bulúng mung marimlâ bisà cung salilung.

E mu sa isacuíl ing dalise sintâ
Sintâ at pacamál yampáng cu ngan queca,
Queca mung sarili . . . alà nang aliwâ
Aliwáng candungan alì cu matulà.

Ití ing tune patutuán cung lubús
"Aliwáng penarù qñg tutúng penirug,"
Penirug da ca pin sarili mung bucúd
Bucúd calugurán pusù cung titibuc.

© 2004 Heirs of Segundo S. Romero. All rights reserved.

For more poems, go to:
http://maxpages.com/poecia/poecia12

To go to the previous page, click:
http://maxpages.com/poecia/poecia10

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 01008

Page Updated Sun Dec 25, 2005 10:05pm EST