LIBRARY OF KAPAMPANGAN POETRY - Ernie Turla, curator - Languages

CONTENTS:
1. Imbitacion Queng Pamamoecia
2. Ing Bie Queti Qng Yatu
3. Ing Oras Ning Pamainawa
4. Deng Alahas
5. Ing Salitang Kapampangan
6. Ing Manuc Nang Pedro
7. Para Queng Macalaut A Caluguran
8. Ing Dalan Na Ning Bie
9. Ing Bie
10 Utus Ning Dios
11. Deng Burung Talanca
12. Mamipi Ca, Sasaclu Cu
13. Ing Uyung At Ing Canta
14. Ing Canita Ampo'ing Ngeni

IMBITACION QUENG PAMAMOECIA
BY ERNIE TURLA

Ana, abe, cuanan mu ne / ing pluma mu at cuadernu
Dalan mula pati na yang / pamialungan mung salindru
Maglacbe ca qng taldawa / maintun matimtiman a byu
At cabud sinigpo'ing diwa / ibugnus mu'ing quecang agyu.

Miayaliwa na'ing maliaring / mamanican queng isip mu
Pilinan mu'itang macabie / inspiracion careng tau
Itang bague macawili / babie sabic masqui quenu
Pero abut ding amanung / macasimpan queng dila mu.

E ca binang mamirapal / midyu panayan mung miral
Ing mayumung taguimpan a / queng salu mu sasio lalual
Ing paninap a masampat / dalise queng carangalan
Ing cantang susulapo ning / casacdalan a panamdam

Sadia mula reng rima mung / maluat mu nang pagmayapsang
Pitsuran mung queng cang biga / mipmung diwang macasawang
Mataclayuran a puestu / neng durungdung ca queng yatu
Ing mipacde mung caladua / matas pa queng pangatau

Cabud tinaimic na at / melino ca panimanman
Buclat mu ne yang cuadernung / manenayang quecang lamnan
Gamitan mu'ing quecang beluan / careng amanu tang sisuan
Ban atas me paintungulan / ing salitang Capampangan.

ING BIE QUETI QNG YATU
by Ernie Turla

Pipagcuentuan ta ing napun
at pisabian ing daratang
Uling macanian mu ing bie:
magobra, matudtud, mangan.
Sisingit ta ing cusuelu
queng carelang pamilatan
Queng panyurut na ning yatu
balic-balic mu-ing gagawan.

Pero e ta sasawa queng
anti iti macanian man
Aguiang nu pa anti pagal
ing bie queti qng sicluban
E ta murin apaglibe
ing saya ning queti lalam
'Nia aguiang mang ing ligaya
e na mecad apalitan.

ING ORAS NING PAMAINAWA
by Ernie Turla

Tara, abe, dulung cata
quetang dungan, qng pantalan
Prescung angin a marimla
batang lubus asangapan
Cailangan tang magpainawa
queng metung a yaldo obra
Tiwalag ta ing pagal qng
opicina o pabrica.

Batyon te ing aldo lalbug
mamun queng pepatingapun,
Alben te'ing maslag a bulan
catacap na ning dalumdum
Guintung aldo a macabie
inspiracion careng pintor,
Guintung bulan atyu babo
a maglayag anting bapor.

Cabang mipagintriga la
ing aldo ampo'ing cabengian
Damdaman ta itang tigtig
ding cumpana qng pisamban,
Uling iti yang orasyun,
oras na ning pamangadi
Tahimic na ngan ing sabla,
At canita ta na muli.

DENG ALAHAS
by Ernie Turla

Miayaliwa la reng / ausan dang alahas
Anti mo reng ruby / emerald at perlas
Ornamentu lang mal / pupugue queng tau
Quiquildap, quiquinang / pati na queng precio.

Dapot cumpormi mu / nung ninung susulud
Queng cuintas o singsing / ing sucad queng birtud
Yang pacacalulu / magpasicat ya man
Queng cayang brillante / e re paniwalan.

Pero yang alahas / aguiang mang "fake" ya mu
Nung susulud ne niang / milionaryung tutu
Maguing target de pa / reng anggang tulisan
At deng mandurucut / ustung queng sicsican.

Uling ing alahas / ing cayang alaga
Atyu mu queng uri / ning taung magdala
Ot paigastus ca pa / nung macanian pala
Sali na cang tangsu / e re a-ulata!

ING SALITANG KAPAMPANGAN
by Ernie Turla

Dane caili qng albugan / Zambales ning cabunducan,
Bandang wanan qng aslagan / Sierra Madre ning Bulacan,
Qng mauli o paroba / ing danum na ning Cailugan
Queng arapan, paralaya, / bunduc nang Mariang Sinucuan.

Pilibutnan dacatamu / itang lahing Kapampangan
Deng caparang Pilipinung / macaliguid queng tucuran
Bagya-bagya racatamung / susulmuc at lulusuban
At nung mipaburen iti, / bandang tauli matda ta ngan.

Anting prueba bandang norte / ating probinciang lalati
Mepitna no reng sasabi / queng carelang tune lahi
Magluid la reng dominanti / mipipilpil la reng ali
Pota ing mal tang Pampanga / maguing anti ya careti.

Ania ngeni cabang e pa / atrasadu ing panaun
Sucat maintun tang paralan / aguantan ta'ing imigracion
Pangilagan lang magporma / reng "enclaves" a paliguan da
'Nia nung ating bayung tuclas / Kapampangan ituru la.

Deng quecatang cayanacan / ustung minta no Menila
Cauli ra qng probincia / Tagalug no queng salita!
Deti dapat lang imbernuan, / lalaco re paintungulan
Ing amanu tamung sisuan, / linagpas la queng cabiasnan.

Ing matua tang pamanyulat / antining quecong babasan
Preserba tang anting mana / sariling guintung pibandian
Uling iti sadia tanang / gagamitan, pi-ugalian
Meguing tatac tana iti / itang lahing Kapampangan.

Carampatan umahan ta / ing e ustung patacaran
Diquil queng pangaturu ra / reng anac queng Kapampangan,
Bayu la sa manigaral / careng daiwan a salita
Queng amanu ra que bale, / dapat la ngang mabiasa pa!

Ania guiguisingan daco / panandam at pilubluban
Gobernador, deputado, / at ninu mang manunculan:
Dugo e taya paburen / iting amanu tang sisuan
Uling ya ing sibul na ning / diwa tamu at taguimpan!

ING MANUC NANG PEDRO
by Ernie Turla

Malutu ya palung ing manuc nang Pedro
Anti ya mong helmet masias a sombrero!
Buangis ya queng camua mabagsic ya tiru
Texas yang matapang pa quesa queng toro!

Queng bisyu ning cayang sugarul a amu
Queng apis, masahi, mesese yang ustu
Bayu ya mibulus mipractis ya pamu
Qng sucal Angeles caretang labuyu!

'Niang prumeru neng lon ing cayang quelaban
Agad neng detangan ning guiam queng bacbacan
Layun neng lepitan para atingiran
At caibat canita na ne segudsuran.

Ala neng sicasu queng pali na buntuc
Masias yang sagupa, lisic yang maniapuc
Sucdu-sucdu ya queng cayang pamanyigpo
Pablasang liamadu ya nang yang magbabo.

Ari ya mo wari caniting penandit
E me ayaguanta e bisang paigpit
Maticdi ya bicas, caya ngan ing mandu
Tatapang yang lacuas queng balang segundu.

Bulbul nang quiquintab magalsa qng tundun
Saguisag ning sabic queng pamaquisabung
Atras-abante ya queng pamamalabat
Catawan ning metung lalasa ya balat!

Queng lacas na't dagul e bisang cucurul
Alang patugut ing cayang pamanyapul
Masican yang dascul, dumali't mamomba
Aguiang durucal ne rungus queng lilyu na!

Anti yang ubingan sicsac queng camandag
Ustung tuctucan ne dacal ing mabalag
Agad talab iti queng cayang abihag
Manasaquit yang tal lumbag niang banayad.

Ing taring gaganu nang misna qng taram
Lalsut yang malalam neng tutud yang laman
At nung qng ebun ne iti atamacnan
Magus ya calaru't matda panimanman!

Caraniwan mu'iti queng bie sabungero
Bista ma't mesambut e luncut y Pedro
Tatio agad ya ring myuman macasali
Para pamalipi at pagpintacasi!

PARA QUENG MACALAUT A CALUGURAN
by Ernie Turla

Indat apipiunab cung / obat quen ca at queni cu,
Micanlaut cata puestu / queng leparan na ning yatu,
Cabud nia luncut ing pusu / mamagmalun a masolu
At ing busilac a biga / maguing lulam ya queng lua cu.

Ustung acaquit co queni / aldo-aldo reng aliwa
Susuat na ning quening lub cu / nga cung sasabi, "Ot caya
Maralas co pang acaquit / e co man balung bitasa,
Samantalang ing mimiral / queng cacung lub ya ing ala!

Map na mu pin ating "e-mail" / a quecata mamilatan
Babie limbang queng nung ali / maluncut sa ing panamdam.
Queti sulip alang mas mal / careng bague macapaldan
Nune reng taung malugud / a ausan tang caluguran.

ING DALAN NA NING BIE
by Ernie Turla

Talaga yatang macanian / miquilala, micawani
Micucurus gasgas queng bie / mipangabiayan saguli
Caibat anga na qng anga / ni misan man e na cayu
Misalubung, misagana / mipangaul pasibayu.

Queng bie e ca macapilming / cabang-caba co miquiquit
Uling datang ing panaun / ating muring lunto sabic
Mamaglacbe queng marayu / at lacuan ne ing balen na
Calulu ya ing melacuan / mebawas ya cabarcada.

Queng landas ning bie aldoldo / a quecatang tutuntunan,
Miayaliwa no reng cacung / queyagape queng lacaran,
Ating e na macaticdo / caren dugung mangasacab
Ating namang e cucurul / paquicuanan dang misadsad.

Uling ing bie anti ya ping / pamisiglulu queng dalan
Aguiang patag atin muring / bariculcul pangilagan,
Ania itang mamulai / neng metung tamu pupuntan
Mimingat tang masalese / lalon tamu'ng tatacbangan.

Uling patia queng bilis mu / queng canal ca mipaidpid
O nung caya careng batu / mibalisuag cang mitaquid
Conpormi mu nung miticdo / capa queng pangabagsac mu
Pero reng ngang cayagnan mu / muna no ngang siguradu.

Ania ing panabilin da / macacalale ta sana
Aguiang e tana mabilis / e ta mu sa mitotomba
Banting upayang dasan ta / ing quecatang pupuntalan
Itang lugal a masaya / nung nu carin ya'ing taguimpan.

ING BIE
by Ernie Turla

Ing sabi ra reng mangatua / ing bie anti yang rueda
Ananang atyu ca babo / ananang macalalam ca
Pero nung balu mung talnan / ing quecang bie, caluguran
Cabud miyuquiat ca babo / agad mu neng papatucnang.

Sabi ra pa reng aliwa / nung talagang mate na ca
Masqui nu ca carin canu / bastat maintun dalan ita
Acu namang mamaquibat / anta nanung palague yu
Pialungan tamu mu waring / lelangan ning Apung Guinu?

Mirinan tang caisipan / queng Guinung Dios a miglalang
Mirinan tang catimawan / ban mamili queng nanu man
Ania e ta bisu-bisu / ing ustu yang tutuparan
Bancanita e ta mique / queng matsurang capalaran.

Ita mismu ing gagawa / queng quecatang bili queng bie
Gagamitan taya'ng isip: / maglibutad, o maglele,
Sumulung, tucnang o matras / mangilag o mamagsiga
Libri tamu queng nanu man / e ta mu anting manica!

UTUS NING DIOS
by Ernie Turla

Deng utus ning Casulatan / e la masaquit tuparan
Maliban mu quetang metung / lalabagan ding queraclan
"Luguran mong parang tau / pati na pa reng casalang
Anti mo nung macananu / sarili mu luluguran."

Agpang pa queng librung aiti / a atyu queng pagumasid
Nung timpaling daca lupa / yarap me pa'ing casumangid
Nung besibas dacang batu / deng pawa queng camulangan
Atsanan mo pang pan de sal / cumbiran mong maquipangan.

Diquil caniti atin cung / buring cuentu quecong malda
Istoria ne nitang datu / qng barangay na ning Baba
Aniang malapit niang mamun / queng labuad nang gugubiernuan
Pepaglacbian nong anac na / at magbalic catlung bulan.

Atlu lang lalaqui reti / malaut la pemumuntan
Ating minta paralaya / ating minta qng aslagan
At iniang migbalic no ngan / layun nong quitnan ibpa ra:
"Ing cayapan a guewa yu / mecad buri yung istoria."

Ing pangane tinicdo ya / at sabi na tinucnang ya
Quetang carinan na nitang / aquilala nang macualta
Pane ya mung malalacuan / cambe ra ring anggang pera
Dapot ala yang penaco / ni cusing man, 'niang maco ya.

"Santeng!" nga ning datu caya, / "pero naman ata, Itu
Migcatiwal ya'itang tau / queca saca me pa rugu
Wari samantalanan pa / mequitucnang na ca caya
Caministilan mu pin ing / menatili ca cosecia!"

Nga ning cadua, "Babaltangan / que'itang paco lele ilug
Iniang atin cung abatyo / papapiglo malulumud
Aguiang e que caquilala / inatsanan quia ring lubid
Aligtas que dapot caibat / meco nia mung sinalisid!"

"O nanu mo ing gawan mu / ing situacion miquelangan
Paburen mu nia mu waring / malumud at e saguipan
Ing guewa mu masalese / sinaguip cang parang tau
Ing cusuelu ning pusu mu / e mu ditac, siguradu!"

Nga ning bungso, "Patawaran, / ala cung mayap a guewa
Atin cu pang acacontra / at acatumbucan pala!
Misan iti mipatudtud / ya queng cayang pamaglasing
Queng pamagbiling-biling na / macatail nia queng bangin!

"Bista man balu cung camua / na canacu ing guyud que
Pigprisiguian cu pang guewa / banting upayang e mate
Dapot cacung calma rugu / mepalmura cu pa caya
"Locung muret, nananu ca!" / nga na iniang aguising quia!

"Ay casanteng," nga ning tata, / "iti sucat mung pagmayring
Amanan mung cacontra me, / linigtas me anti mu rin
Pecamasanting ca guewa / quecong atlung penganac cu,
Ania potang ala na cu, / icang magmana queng tronu."

Ngeni balic te ing tema / ning quecatang pisasabian
Quetang yuyutus na ning Dios / a masaquit gagampanan
Nung arapat mu'iti , abe, / ngeni-ngeni qng piarapan
Yalal dacang matas puestu / uling ica ing peca-nuan!

DENG BURUNG TALANCA
by Ernie Turla

Dacal na cu ticman / queng mialiwang ulam
Lacuas na queng canan / "lutung Kapampangan".
Pero alang lagpas / queng cacung atacman
Pa quesa queng burung / talanca queng niaman!

Macapagmulala,/ ing pecamaniaman
E ya man linutu / queng curan at calang
E ya man piritu, / linaga o ningnang
Dapot queng linamnam / sambutan nala ngan.

Basta't asinan mu / la mu reng talanca
At ibili mo queng / metung a balanga
Tacpan mo queng basan / balang e tumacas
At panayan mulang / lambut queng cabucas.

Potang canan mu no / reng burung areti
Mamili ca careng / talancang babai
Uling deti ilang / sidsad queng cataba
Potang pusit mula / mangayat ca wawa.

At canini co pa / mu talagang buri
Deng pisit talanca / yambula queng nasi
Alang calamunding, / aslam o nanu pa
Ala nang tiltilan - sacdal ne queng lasa!

MAMIPI CA, SASACLU CU
by Ernie Turla

Cabang ica mamipi ca / acu naman sasaclu cu
Carin queta lele cantu / nung nu carin ating gripu
E bali nung bicual-bicual / ing canacung daralanan
Basta't dasnan daca sana / magpiesta cu pilubluban.

Bista't acatmu cu no ngan / oya, batia at tapayan
At queng pitac cu na yugse / neng ala nang pilulanan
Sundu-sundu cu pa muring / sasaclu at e tutucnang
Uling indat aquit daca / ing pawas cu e mesayang.

Titibuc yang alang patna / pusu cu e mipaindatun
Ustung queng cang arapan cu / cabang bobomba cung danum
Uling malamarine cu / at ica man mahinhin ca
Macagyu mu queng sasaclu / at mamipi'ing daraptan ta.

Mipaniman cata cabud / alang bulad ing pilatan
Pablasanang cayanacan / pa ing bili, miquelangan
Wari't ala pa queng lub cu / yang didiga at gagale
Ania iniang magcasal ca / ing canacung lua mengale.

Maluat na rin ita ngeni / pareu nang ating apu
Pero e cu acalinguan / mitanam queng cacung pusu
Queng macuyad a salita / pagtapat cu ngeni queca
Sana abalic cu'ing iniang / sasaclu cu't mamipi ca!

ING UYUNG AT ING CANTA
by Ernie Turla

Bignus que ing uyung / ibat queng pana cu
Sinalitsit yayti / e cu siguradu
Nung nu ya miparas / uling queng lisic na
E re miamasamas / asipat ding mata!

At migtumaila cung / lawiwi queng angin
Miglayag ya iti / e cu mu apansin
Nung nu ya sinanlad / uling ninu wari
Ing matalas mata / queng dalit mituqui?

Linuat ing panaun / at iquit que'ing uyung
Macatasac ya pang / macutcut queng dutung
At ing namang cantang / cacung pagdulapan
Iquit que queng pusu / na ning caluguran!

ING CANITA AMPO'ING NGENI
by Ernie Turla

Iniang cayayanacan cu / iti e cu pa quelinguan
Deng magaral qng escuela / pawa la ngan queng cabiasnan
E la anti mo sa ngening / Ing Inglis da reng magaral
Barabaricual queng mali / melabias la queng pirapal.

Uling alang calculador / deng estudiante canita
Metung lang tren mememoria / at matinic la queng cuenta
Stone-Winkel Arithmetic / isy-isy ya carela
Ing pamag-"times" siapilitan / yang memoria ban mabiasa.

Pamamasa careng libru / agus la queng catalustus
Metayas la queng tenacan / careng Osias Readers alus
Aquit mula queng cuartu ra / gagawan da ing "homework" da
E la bisang mitauli queng / tuturu ra reng mestra ra.

At aguiang queng pamanyulat / "composition" asno galing
Daigan do reng high school ngeni / sumulat la atmu santing
Licas da pa queng "fountain pen" / queng cuadernung Senorita
Ing "rough draft" ning sinulat da / careng Mongol a lapis da

Deng capital sanac do ngan / Batanes anga qng Sulu
Pati nareng careng nacion / a aliwang macarayu
Cabusadu re historia / ing labuad tang pacamalan
At balu rong igale reng / poecia rang pagaralan.

Canitang panaun aita / 'guiang capitu ya mung gradu
Anti neng tarat queng Inglis / saguid ya queng pangalutu
Macapagmulalang sabian / e ya pa man mig-graduadu
Alucacan da neng ausan / para turung anting mestru.

"Oyan ing quetang maluat na / ba mung balung picompara
Macarine lang masiadu / deng ebun a quecang marca
Ot balamu ala catang / ababalu aguiang ditac
Magagastus cu mu ata / neng pane cang mibabagsac."

E cu balu pota galang / darala na ning panaun
Uling acaquit cu'ing ngeni / marayu queng quetang napun
Canita ustung metigtig / ya'ing cumpana neng orasyun
Pasi-uli no reng que lual / at queng bale no mandatun.

Sisimba que neng Domingo / at mangadi queng Miniaclung
Ing misa ming tatagunan / Latin ya pa macatuntun;
Aquit mula reng babai / pacabelu la ngan lupa
Durucu que neng magsantus / at tatacut micasala

Ustung mag-"flag ceremony" / tutucnang la reng calesa
At deng gamat da ring malda / cacabit do que salu ra
Careng mestra mi at mestru / mag-"good morning" que aldoldo
Tatas mila reng gamat mi / at mag-"recite" macaticdo

Ngeni iti mewala na / bihira na mung masiadu
Mi-alilan ata'ing sabla / ultimu na mu reng tau
Biruan mung deng cayanacan / a lalaquing acaquit cu
"Beatles" ing buac da qng caba / uling yayti canu'ing usu.

Paca-"jeans" la reng babai / pacatingga lang lalaqui
Deng aliwa quen yang arung / pa ing tingga ra neng cai
Paca-"tatoo" la qng arap / pati babai na ngeni
Mipamate la pa queng "drugs" / at mi-usu'ing "aids" careti.

Ibalic cu quetang napun / iniang ing bie abac pamu
Iniang saguiwa pa'ing angin / at ing "smog" e mi balu
Quetang "peace time" a ausan da / alang guera't basag-ulu
Cataimican ing mimiral / e la balisa reng tau

Usu canita'ing harana / mamanican queng babai
Alang lulual maquipag-"date" / lalbe cine anti ngeni
Uling ing pangilagan dang / miamasamas lubus deti
Ya'ing indredus queng pamilia / a macapatda queng puri

Camarinayan canita / ing masisirang dalaga
Deng babai pagsicapan / dang e dinat a sampaga
Busilac dang carangalan / masusucad queng linis da
Nung aniapin cabalitan / maleparan ing hinhin da

At ustung queng La Mallorca / nung sicsican at mascup na
Nung ating pacatalacad / a babai o mangatua
Yang lalaqui talacad ya / at yampang ne'ing luclucan na
Pagcusan nang daptan iti / aguiang e no caquilala.

Nung misaque no man queng "jeep" / deng aduang miquiquilala
Misiglulu la pa reti / mipamayad pasai ra
At deng misisiping bale / mipamie la queng lutu ra
Masese ing relacion da / at mipapagmasaquit la.

"Mengalabas na'ing panaun / baintau na ca ngeni
Obat dugu mecanian ca / pasari na ning nanu'iti
Queng pangatalabu mu / queng high school e ca meyari
Ing buri cu pa mo sana / magdoctor ca o magpari!

"Migpalat ca e ca lulub / queng clasi mu qng escuela
Maqui-tetsing camu canu / 'nia pala e ca mebiasa!
Iti dela mung queragul / ing sugal at cigarilyu
Pane nacang quetang cantu / ari raca reng lasenggu.

"E cu balu nung caninu / ca migmana o memuli
Cabang deng ngang daya tamu / matenacan la at sugui
Nung ania pin sisisian cu / ot licuan taya pa'ing baryu
Alang linto caunlaran / queng pamaglipat ta Tondu!

"Ngeni neng butacal na ca / masaquit da na cang yusuc
Queng masanting e ra na ca / atuntun at abaluctut
Apamasla anting pila / mesias ne ing quecang buntuc
Nung ebun ca mung linaga / cayarle mo retang buguc"

Ating danum a matabsing, ating asan a bilasa
Ating camuting absican, ating nasing asmu calpa
Ating lawing taranati / masalpac a camatsilis
Nung 'nia aguiang careng tau / ating lalto a e sunis!

Maldang talapaquiramdam / mamun na cu pa quecayu
Icua cu na ring apasiag / ing durucal quening lub cu
Mausta cung paninasan / matras sana ing panaun
Ban layun deng cayanacan / mag-anti la careng napun.

Copyright 2001
by E.C. Turla
All rights reserved

To go to page 2, click:
http://maxpages.com/poecia/poecia2

Poets Laureate 2008
http://us.f550.mail.yahoo.com/ym/ShowLetter?MsgId=6612_52606551_1187115_3703_9489_0_50144_27531_3572977809&Idx=0&YY=13738&y5beta=yes&y5beta=yes&inc=25&order=down&sort=date&pos=0&view=a&head=b&box=Inbox

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 09909

Page Updated Tue Jun 9, 2009 8:50pm EDT