Home
gloria
academy
international
 watas
languages
chapter2
chapter3
chapter4
chapter5
chapter6
chapter7
chapter8
chapter9
chapter10
chapter11
chapter12
chapter13
chapter14
chapter15
epilogue
anecdote
version
|
| RENATO B. ALZADON'S KULE YANG DAYA ING BANUA. Chapter 15 |
 |
| BY ERNIE C. TURLA |
Sinaguli milabas ing peparminggu, at Domingo na naman! Nabengi ya pa ing capitan kening maragul dang bale reng Magtalon a nung nu ya makapanira y Rosalina a pisan da. Kabang magsadya yang amusal ing babai, keta ya pang kwartu
manalbe TV keng balita Vietnam ing lalaki.
Samantala, migtiriling ya ing telepanung makalinya kabud keng kwartu ra, at dimput ne ning capitan. Migpaltitika ne mang linapit keng lele pasbul ning kwartu ing babai para makiramdam.
-- O, y Blady ini, Betchay, komusta na?.... Makasiguradu ka?....Ikong adwang munta?....Nanu ne kasi ing address?....Kingsville Greenery?.....Sigi, payntunan ku nya mu keng Yellow Pages.....Bastat itang bandang sisilim, nga mo, neh?.... Ali, aku nang dili....O sigi, mimingat ka!
Minta ne ing capitan keng banyu para mandilu. Kaybat nang mengan amusal, mebating ne.
Ing babai ya na namang dili. Mika-kapigaganakan ya keng dimdam na keng pami-telepanu ra reng adwang misapakat. Pigaganakan na pota ating matsurang malyari kang Ronaldo. Kinwa ne ing telepanu, para warningan ne, oneng alang makibat. Keng alus pepatingapun, pane neng susubukan awsan keng telepanu, at alang kakwa, angga na keng mebuysit ya. Anta nu mong maus ya kayang pulis?
Munta ta naman king Kingsville Greenery, keng tunknangan da ri Ronaldo.
Uling aldo paynawa, e la maranun tinali keng kama deng adwa. Tinigtig ya man ing telepanu, e re kinwa. E la bisang madistorbu keng pamikumun da lalam ning ulas.
Ala yang baru y Ronaldo at y Maggie susulud ne ing maimpis a "lingerie" a ibat na king Fredrick's of Hollywood mail order. Ing gyam da meyari inyang midiligan ya ing
pusu keng kuswelu ning manyamugagang laman.
Kaybat dang migluglug at menayus keng sarili ra, tinun ya at miglutung amusal a piritung ebun ampong tiniting pindang y Maggie. Ginawa ya namang kape. Ya pin na naman ing ugtuan para karela ini neng magplanu lang lumwal mu rin, at kanita na la magpakabsi. Ing telepanung pane magtiriling, e re sikasu, medala nala kasi kareng
tele-marketeers ampong Saksi at Mormon a mamaus ustung aldo Domingo.
Linwal ya sinaguli y Ronaldo para inspeksyunan deng sesesen nang tanaman.
Y Maggie, e ne tinuking linwal kaya, mekiramdam nya mu kareng plaka ra reng
Carpenters. Ing kayang yatu mesigla ya, at balamu yuyuyu re keng duyan ing pusu na manibat inyang tinanggap yang masanting a balita keng doctor. Amanan mu pin namang mipaltutu ing kayang paninas keng bie!
Inyang ala-una, memaliksi nong linwal at inalben de ing cine The Godfather. E ra balung makaba ya ing cine, atin ya pa palang intermission. Dakal la e akalingwan a parti keng ayalben da na. Anti mo itang inyang migising ya ing direktor at ing metabtab nang buntuk ning kayang mal a kabayu ken yang kilub nang ulas at babad keng daya na! Ampo itang inyang lungub ya y Al Pacino keng kobeta ning restaurant, at kinwa ne itang makasalikut a baril at inyang kabalik na keng lamesa, tunggal-tunggal nong pemaril a buntuk deng kalaban nang tata na.
Kayari ning cine, minta lang mengan ketang malapit a restaurant. Alas otsu na na ning bengi inyang minuli la. Anyang karas da bale, apansin dang e re pala atarangka man ing pasbul inyang bayu la mako. Keng pamipirapal dang pota mitawli la keng alben dang cine, akalimbatawan de, kabud nala memaragling milai keng kotsi.
Ing kamulangan pa, nung kapilan pa naman bengi kanita kewalan koryenti! Mitda la ngan deng sulu kareng bale at kalsada, pero ken mu atang palile-lele. Kipkap da kareng bitis da ing dalan papunta king kusina nung nu ya kinangwang kasapwegu y Ronaldo at selangyan deng adwang kandila king salas. Sinindyan nia naman itang kandila ning altar king silid nung nu la menaliling imalan pagbale.
Kabang manyupilyu la king banyu, tinigtig ya ing doorbell. Ninu kaya ing bisita ra keng mikelangan a oras ayti, nung kapilan pa naman madalumdum? Ing a-isip na, pota galang memarala yang electrician ing amu na! Minta ya king pasbul at sinilip ya ketang pisisilipan a malati, pero ala yang ikit. Makanyan man, biklat nia murin ing pasbul para maglalawe, at kanita ne sinalisid linub y Nesty at tambing yang maka-pustu ing baril na. Kayabe neng linub keng gulut na y Betchay, a magdala mu namang malating baril. Minatras ya y Ronaldo at pepaburyan nong linub at sera ra ing pasbul keng gulut da.
Y Nesty, agad neng inarapan y Maggie a kalub-alub pamung makasambulat pa bwak at makakamisun maputi. Ginaligit ya at tintwan ne keng taliri na.
-- Oyni, e maglaram y Betchay at sabi na kaku king mabuktut na ka! Agpang pala keng doctor a inayan mung linawe keka, ing DNA nang Ronaldo ing makayakma! Pigtaksilan yuku neng lokang patakal, at e ko man pala ginamit contraceptive. Okasi, e man pala kanaku ing anak keng atyan mo? Malande!
Kasabi na nita, gulpi neng pinakal kaya ing buldit ning baril a tatalnan na. Keng sikan na panga-tiru, mibulang ya at kewalan animu y Maggie.
Kaybat na, yang inarapan na naman ing lalaki.
-- Sinira muku payntungulan, abe! Balu kung tinwag mu naku kwelyu keng pamakyabe mu keng babai ku, pero e ku balung miras keng anti kaniti ing sitwasyun. Nung mikaka-anak ya y Maggie, kaylangan mu ing kanaku ya, e ya kareng aliwa! Pepaburen keng mekyabe keka y Maggie pagsamantala, dapot tinwag yung pareu ing sabo ngening mebuktut ya. Anya kaministilan mu ing mate ka ngeni-ngeni, taknayda mung animal!
E mipabulad y Ronaldo keng panga-bigla na. Bisa ya mang lumaban, ing armas a
binye nang Blady kaya, e na ne balu man nung nu ne ake. Ing tutu na niti, e man daretsang mikapanaun gamitan ne para mika-praktis. Mengilabut ya at kinarug a salu. Balu na king todasan na ne ning Kumander. Balu nang kang Nesty, e na tatalab ing lunus kaya neng mekapal ne kosesya. Deng apag-"salvage" na bilang
"hit man" da reng ke lwal, e ra no abilang-bilang. Ing ka-tapat na y Blady, a pambatu ra naman ding Sparrow unit da reng P.C.
Pero, gulpi yang ginalapak meyli y Nesty kabang akakit neng alang kalaban-laban ing kayarap na. Marok ing abalak nang gawan.
--- Balamu galang neng buguk, agad da na kang paten. Ali, kaylangan pamyalungan daka pa. Kaylangan mung atakman ing mabagsik a parusa. Paritak-ritak dakang pakluran a inawa. Bagya-bagya, ba mung apilasang ustu ing benggansa ku keng depat mu kanaku! .
Beril ne king takde wanan at mengulat ing daya keng susulud na. Mapilan mung sigundu, beril na ne naman king kayli. Malutu na naman ing menalamsik. Kaybat, king malingmingan, patampyus. Kaybat na king pwad. Mibaliswag ya at layun mikasat keng sopa.
Y Betchay, e na na apibata ing akakit na at yawat ne sana.
-- Nestor, malunus naka man dugu kang Ronaldo! Ing sabi mu inyang keng kotsi, pamatakutan mya mu at barilan misan king bitis, dapot keng dayang tutulu kayang ayni....
-- Metung ka pa ne loka!
At temaknan neng balas king kanwan! Mebalag nya mu, at meging sibul ya kanwan keng dayang dinaribulbul mikalat keng carpet.
Kaibat begut neng Nesty itang extra nang baril keng kayang botas a kalupa na gawa nitang peparam nang Blady, pepakbung ne babo, at inatsa ke siping nang Ronaldo. Siguru, bang lunto king atin ya mong "match" a piglaban ing pete na.
Samantala, y Ronaldo, uli ning kaplas ding sugat na, sinaingsing ya at mengapangisngis, at e na ne alawe man a lupa ing babaril kaya. Lililyu ne at milalako male tau inyang tutuk neng Nesty keng buntuk na ing baril para aryan na ne, inyang....
BANG! Ing matning akbung e na nya naman makaing dimdam Ronaldo! Mengalingwan ne at mitda panimanman. Pero, makapagmulala ing milyari! Aliwa ya ing tinanggap keng balas! Ing mitamaknan pala y Nesty! Keng tundun na karin ya linub ing balas at menyulparit anting pislang binangal a bungang granada ing daya na! Ot ninu naman kaya ing memaril kaya?
Metung minutung kataymikan... adwa, atlu...at mibuklat ya ing pasbul ning bale keng pangapaldak na. Y Blady pala tikyan ne ing kakontra na at menenaya ya mu ke lwal. Ing gawan na kanini, buri nang panyiguradwan king ala nang makatagan kareng buri nang mate. Ing prumeru nang linawe, y Nesty, at ikit neng makakasat mandilu keng mismung daya na. Linawe ne y Ronaldo at mangisnawa ya pa bistat man apat no reng sugat na keng katawan.
-- E ra na ka kaylangan, anya dapat na ka namang mayari!
Pintu ne kaya ing rebolber na at ume na niang kalbitan, anyang....BANG! BANG! Memaksing ne namang makapangaklingan itang baril a mekapate kang Nesty nandin pamung ala pa mang apat a minutu ing milabas. Ing capitan mituran yang mekaladwa king gulut, tulid baga at tulid batu. Kagpa na keng carpet, deng mata na bwangis lang makalawe keng direksyun na ning memaril at a-inag ne alkus y Rosalina! Pero ala neng sikanan para itas mu man pa ing baril a tatalnan na! Lepitan ne ning benggadora at....BANG! Misalbag ya utak y Blady, anti yang pakwan a mibagsak, at tinuking alang patnang minagus ing daya na keng maputing carpet.
Y Rosalina pala, makasalikut ya keng madalumdum a closet! Y Rosalinang tiru na keng target shooting karin king Clark nitang Americanung suki na keng tindaan. Bubusuk ya pa bunganga ing baril na anyang pulisan ne at ikabit keng gamat na ning matudtud a Ronaldo.
Mapenandit, ala mang metung minutu, deng sirena ra reng kikislap a patrol car bubyung lang papunta king Kingsville Greenery.
The End
Epilogue:
Apat nang banwa kanyan ing linipas a panaun manibat ketang makapangilabut a milyari. Kanita murin, agad mituklip ing inbestigasyun da reng pulis - mipate-patayan la reng apat, ya ing misulat keng blotter.
At keng saup ning Dios naman, agad yang mekaratang kanita ing ambulansya, at kambe na ning lingap da kaya ri Maggie at Rosalina, agad yang kinayap y Ronaldo king ospital at ke bale. Dininan ne pang limang bulan a extension ning Immigration para manatili America kabang magpabawi ya.
Kabang atyu pa king ospital y Ronaldo, migtapat ya y Rosalina. Bilalag na karelang adwa ing sekretung sisinup na kareng sabla: Ya pala mismu y Merlita! Ayba? Migkakanwari ya mung aliwang tau neng pamintwan ne ngan utus ing Capitan a kokontrol kaya. Ita palang pisan na Angeles a kaswala na at mepayus keng trangkasu kanita, yang penabilinan nang mag-sangkan-sangkan mong ya ing keng telepanu. Makapagmulala, pero mesaya ya y Ronaldo keng anggang abalu na. Anya pala manibat pa king ibat, mayan ne daya kang Rosalina!
Kaybat ning pabulan, minuli ne Pilipinas y Rosalina, ay, y Merlita pala!
Y Maggie menganak yang kambal a babai. Atlu nong banwa ngeni at byasa nong bagyang maglabit. Mekad dagul lang Kapampangan, uling pane nong pagkanta at pakisabyan Kapampangan, ilang Apu ra! Mekaladwa ra ne ikit y tata ra, at misan, pemasyal no king Space Needle.
E ne bitasang menagalan kang Ronaldo y Maggie. Ita mu sigurung agawa neng anak, maragul nang kuswelu keng kayang bye. Pekasalan neng biru-biru para makapag-permanent resident ya. Kaybat mipag-divorsyu la. At minuli ya Pilipinas para kasal ne ing tune nang sinta keng bye, y Merlita.
Kasulukuyan, malwat neng mekapagbalik pasibayu keti America. Minalis ya Seattle para akalingwan na ing makatakut-takut a merapat keng bye na. Malambat na neng
a-petisyun y Merlita, at saganan na ne king SEA-TAC Airport bukas abak a maranun.
Pamisan-misan y Ronaldo ustung benging makakera ya keng katri, gunam-gunaman na at pagmulalan nung makananu nang ikwang aligtas ing bye na at makananu nong apate ri Nasty at Bloody. E na akwang abut paki-intindyan ing merapat ketang aldo aytang kule yang daya ing banwa.
Note: The above is just a mock chapter and is not the real McCoy. In the Akademya
ning Kapampangan International forum, members were asked to write their own version
of the final chapter before the author released the real one which he had penned a long time ago, even before he wrote all the chapters preceding it.
To go to the genuine last chapter of Renato B. Alzadon's novel, KULE YANG DAYA ING BANUA,
click: http://maxpages.com/library/chapter15
|
|