Home
gloria
academy
international
 watas
languages
chapter2
chapter3
chapter4
chapter5
chapter6
chapter7
chapter8
chapter9
chapter10
chapter11
chapter12
chapter13
chapter14
chapter15
epilogue
anecdote
version
arenas
|
| KULE YANG DAYA ING BANUA, Chapter VIII |
 |
| by Renato B. Alzadon |
--Kalmadu ka mu Ron. Kauli ku keta kari Atsing Cel, maus kung agad king Pilipinas. Kuanan ke karing pisan karin ing Phone number nang Merlita. Nung akua ke, ausan ke Y Merlita at ibalita ku keya king mikit kata keni. Sabian ku ing apisabi ta. Gawan ku ing anggang agyu ku, Ron, barakang asaupan.
--Nung makanian muli tana bakang agad maka-aus karin. Oini, ing Phone Number ko, ausan mu ku sana kabud mika-atin kang balita.
--Eka migaganaka, ausan daka.
At ginayak na lapin muli. Ing pamangan pepabalut da namu. Y Maggie yang memayad. Binitbit nang Ronaldo ing piniali nang Maggie at kena na king kotsi. At menulakan nalang papunta king Kingsville. Kesa king dalan Bel-Air a ginamit da nandin, sinalingku ya Y Ronaldo king dalan Philadelphia. Mas malapit ya ing dalan a ini papunta king Greenery. Kabang pauli la, ena apibatang e manusisang Maggie. Ken mong lub na, Y Rosalina at Y Merlita maina la klasing kalaban. Y Linda ya ngeni ing pigaganakan na, uling atyu ya naman king gamat nang Linda ing berding alas---itang Green Card a ausan da.
--Ninu naman Y Linda, Ron?
--Anak ne ning makibandi king Greenery. Yang manibala keng "Book Keeping". Yang kasangguni ku keng presyu ampon koleksyon deng pera.
--Diborsyada ne?
--Ali ya pa. Medyu, malambat bagya ing pamanguang divorce keni, Maryland.
--Lulual na ko man?
--Wa. Alus, balang Byenis... Mag-Billard kami Gunpowder Falls Inn.
--Balu na naman ning asawa na ing lulual kayu?
--Wa. Ya mismu ing mekisabi kaku a sana antabayanan ke ing asawa na king Bilyaran. Kasi pane yang ala, magmanehu yang TractorTrailer, detang eighteen wheelers a amanuan da.
--Obat magdiborsyu la?
--Atin yang atagpuan a aliwa ing lalaki keng pamagbyahi na.
--Atin lang anak?
--Atin metung. Robert ya lagyu. Ustung makaba ne buak, darala neng Ima na kaku, akung manurud.
--Malapit neman a lub keka ing anak?
--O wa. Balamu anak ke mu naman.
Anti re mong sindul a salu Y Maggie. Ing dimdam nang ita ene buri. Balamu kase tatang nane mu naman ning anak--- paurud ya pa kaya.
--Y Linda, ngana paya keng diborsyu na?
--Menasakit yang ustu. Balamu kanu kamatayan. Milako ya gana keng pamangan. Atmu ne pin naman pangayayat. Ing makalunus pati anak meyayat mu naman. Pasalamat ya pin karagulan king ati ku, atin yang pisasabianan keng sakit nang lub.
--E kase, kakompyansa naka, at malapit ya lub keka?
--Balamu wari makanian na, uling subali kang Ima na, aku mu ing kakompyansa na.
--Atin nako man relasyon, Linda?
--Ala. Nung wari ing kanaku pamakiabe mu, uling pamilia la bilang.
Ya mu ita ing buri nang damdaman Maggie. Sera na ne ing asbuk na uling ala neng buring damdaman pang aliwa. Sapat na ing abalu nang eya makatali Y Ron kang Linda. Kang Ron naman, yang e milako keng isip na ining kapatad nang Merlita. Buri neng panumbukan o pamaldakan kaya.!
--Balu ke ing amanuan nang Rosalina. Y Dadung a wali neng Merlita. Atmu ne tamad ing tarantadung yan. Laman ne ning dalan king plaza ning Macabebe. Ustung mikit ke ning lokung yan, mituran ya kanaku.
Kabang maniabi ya tungkul kang Dadung, kabud na mu atin sinalitsit a kotsi king gilid ning saken da, saka ya biglang kinabid wanan. Nung eya alistu Y Ronaldo abunggu ne. Mikapali ya buntuk Y Ronaldo tegalan ne ining barumbadung magmanehung ini. Oneng balamu pangarera ya itang kotsi king kabilis. Penadit mu darasan na neng Ronaldo ing salapang a dalan. Ing bandang kaili papunta yang Kingsville at ing bandang wanan papunta ya king sadyang Huber Farm a ngeni gagawan dang Golf Course. Kabud-abud na mu atin na naman saken a sinalitsit king banda nang kaili at nung eya alistung migbandang wanan asapungan ne. Kesa king papuntang Kingsville yang atuntunan na ing Huber Farm Road. Uling makitid ya ing dalan, ala yang akarapat nune ing sumulung ya pa bayang manakit malangi-langing bagya ban makapagbalik yang e mibara keng burak. Atin yang disan a lugal a misabuganan balas at graba at balamu atin lang tatalakad karin. Keni ya sinalingku. Kasalingku na, ikit no ding aduang saken a manenaya kaya.
--Balamu ita ikatamu ding sasaluputan da, Ron.
--Ikatamu pin siguru, Maggie. Nanu kaya ing kailangan da?
--Pota galang atilu king Restaurant.... Pota galang ikit dakung memayad. .... Pota galang atunugan dang magdala kung pera.... Dios ku pung mapamakalulu, makananu ta na kanini.... Ibie ko deng pera! Ibie ko deng pera! Era ka tamu sana papaten!
Gagalgal ne keng takut Y Maggie. Y Rosalina tahimik yamu. Y Ronaldo susuryan na ing kabilian da. Nanan naman balakan ala lang alsutan. Kaparangan ing atyu king gugulutan da. Makasabat ne man ing makitid a dalan. Eno man makalisya, siguradu lang mibara keng burak. Talagang ala lang alsutan king karelang pangasaluput. Ikit neng tinipa ing metung karing maka-abat. Atin yang pusan a Automatic Carbin.
--Rosa, kakilala me ing daratang?
--Ali ke, Ron. Eke pa ikit ing taung yan.
--O' ika, Maggie, balu me ing taung yan?
--Ali ke. Ninu kaya ing daratang a yan? Dios ku po! Magdala yang baril!
--Eka mag-nerbyus, Atsi. Kalmadu tamu mu. E tamu papakit a tatakut tamu.
--Makanian pin ing gawan tamu. Maggie, Rosa, kalmadu tangan.
At atin yang dimdam Y Ronaldo king dane nang Rosa. Balamu mengasa yang baril ing asawa ning kapitan.
Linapit ya kang Ronaldo ing makapusan baril. Beba neng bagyang Ronaldo ing awang. Ing ikit na lupa yang Afrikanung-Amerikanu, inya pekisabian neng English.
--What can I do for you, Sir ? (Nanu pung asuyu ku kekayu ?)
--Give me one of your women. ( Ibie me kaku ing metung karing abe mung babayi.)
--Which one ? ( Ninu karing adua ?)
--The one sitting in the back. ( Itang atyu king gulut ning kotsi.)
--Ask her if she wanna go with you. ( Kutnan me nung bisa yang tuki keka.)
-- Nope. Tell her to go with me. ( Ali. Sabian mu kaya king tuki ya kanaku.)
Linawe neng Ronaldo Y Rosalina. Ya ing makalukluk king gulut inia kitnan ne.
--Bisa kang tuki kening taung ine?
--Aliku, eke balu ing taung yan!
--Nanung masanting gawan tamu?
--Akung makipagsalita kaya. Busni me ing awang.
At bisni ne pin Ronaldo ing awang.
--Hey, you. If you wanna get me, come and get me, yourself. (Hoy, ika, nung buri mu kung ituki, munta ka keni, kunan mu kung dili mu.
--I'm not talking to you, Mam. I'm talking to your driver.( Aliwa pu ikayung kasabi ku, nune ing magmanehu yu.)
--I'm the one you want. You talk to me. ( Akung buri mu, kaku ka makisabi.)
--But I don't wanna talk to you. I want this driver to give you up. ( Oneng era ka buring kasabi, ining magmanehu yang buri kung mangi-bie keka.
At memaltuk ya ing kakasa-kasang carbin.
--Now, you Driver, get out, get that woman, and walk her to my car.( Ika, magmaneho, kuldas ka, kunan me ing babayi, at idala me king kotsi ku.
--I cannot do that. ( Eku arapat ita.)
--Well, then, I'll shoot you. ( Nung makanian, barilan daka.)
--Shoot me if you want. ( Barilan mu na ku nung buri mu.)
--As you wish, I'll kill you. ( Nung makanian, aryan danaka.)
--What ya waiting for? (Nanu pang panayan mu?)
--I'll be back. I will get the order.( Magbalik ku. Kunan ke ing paintulut.)
Ginulut ya ing lalaki. Minta ya ketang metung a saken. Atin yang pekisabian karin. Malambat-lambat la rin misasabi. Mengainipan ya rin Y Ronaldo bayu ya tinipa ing pekisabian na. Migsandal ya ketang arap ning saken. Memagut yang sigarilyu, at saka ya migpa-asuk. Ing tinipang ini akilala neng Ronaldo. Yapin ing kasabi na nandin---ing Kapitan Blady Chaves.
Mibalik ya ing nandin mituburan. Pekisabian nane naman Y Ronaldo. Mebigla ya Y Ronaldo inyang magsalita yang kapampangan.
--Isubli mu ne kanu ing asawa na ning Kapitan.
--E ku ne man dinam. Alang problema kaku nung bisa neng tuki kaya.
--Makanian ing pasabi na. Ken tutuki kanung mandam ka manyad kang permisu na.
--Sabian mu king eku manamdam asawa. Atin kung likuan, at balikan ke.
--Makanian mu ing pasabi na.
Migkusa yang kinuldas king kotsi Y Rosalina. Memun ya kang Ronaldo at kang Maggie. Pepasalamat ya karela. Linakad yang dili nang papunta king Kapitan. Kabud kalapit na king Kapitan mebigla ya Y Ronaldo king ikit na. Ing Kapitan bigla neng ginut a buak Y Rosalina king gamat nang kaili, saka ne piragling timpaling mekatadua king kaili nang lupa.
--E wari sinabi ku keka, nung nukarin daka likuan, karin daka naman dasan?
--Nanung palague mu kaku, makasogang damulag?
--Aba! Mitubuanan na ka atang sagu, inia magbulus naka. Ustu palang mabulus ka balamu damulag ka naman manalandi!
--Ninu namang e magbulus neng ala kang layang makatali aldo't bengi!
Digpa no na naman ding mapaling tampaling king malagu nang lupang Rosalina.
Biklat neng Ronaldo ing pasbul ning kotsi. Telan neng Maggie king gamat.
--Eka makialam, Ron. Miasawa la ren.
--E ustu ing gagawan na. Panasakitan ne ing babayi.
--Agyang nanupang gawan na asawa ne.
--Agyang asawa ne, ene dapat panampalingan.
Linapit yang mapilan a katakbangan Y Ronaldo at gilisakan ne ing Kapitan
--Pare, babayi ya yan, eme dapat panasakitan. Nung atin kang sukala a lub, obat aliwa aku ing arapan mu.
--Aba! Ninu ikang pipitsugin a magsalitang makanian. Pota galang eme balu ing kayarap mo!
--Balu ke. Tampalasan yang tau, at pati babayi tatampalasanan na.
Makisabad ya ing taung matuling.
--Ibalatu mu ne kaku ini, Sir. Balamu manintun yang kaplas a balat. Aku nang balang munie lisyun.
--E ka makiabe Sarhento.
--Ikang bala, Sir.
--Kaku ne yang makuyad mo.
--Loaded ya, Sir. Oini, Sir.
--Ibie me ining kaku kaya. Sabian mu king mangasa ne, at yana ing munang kalbit.
-- Yes, Sir.
Linapit ya ing Sarhento kang Ronaldo, inabut ne ing baril a makuyad, at sinabi ne ing pasabi na ning Kapitan. Telan neng Ronaldo ing baril , tinas ne at ngana king Kapitan:
--Matapang ka mu abe, uling atin kang pangarang baril. Nung ala kang baril peka mataloti kang tau. Ot emu pakit keng asawa mu ampon karen tauhan mu ing maki tepangan kang ditak. Subukan mu kung arapan abe, alang gagamit sandata---gamat mu ampon bitis.
Inatsa ne ing tatalnan nang baril king Kapitan. Sepu ne ning Kapitan at ngana:
--Nung yang balu mu yan, abe, mipanusigan ka buri. Sarhento, pasulud mo kaya detang pagmarimla tamung gwantis. Pabustan yeng milabas ing kaslam nang wawa.
Parehu dong likas ding makapal dang imalan, at sinulud do ding pang-marimlang gwantis, minta la ketang lugal a patag a maki-balas at graba, at miyarap lang maka-pustu. King talakad da ampon pangimut halata king parehu lang biasa keng Martial Arts.
For Chapter IX, go to:
http://maxpages.com/library/chapter9
For the previous chapter, go to:
http://maxpages.com/library/chapter7
Curator: Ernie C. Turla, president, Akademya ning Kapampangan International
|
|