Home
gloria
academy
international
 watas
languages
chapter2
chapter3
chapter4
chapter5
chapter6
chapter7
chapter8
chapter9
chapter10
chapter11
chapter12
chapter13
chapter14
chapter15
epilogue
anecdote
version
arenas
|
| KULE YANG DAYA ING BANUA, Chapter II |
 |
| by Renato B. Alzadon |
Chapter II
Kaibat neng linibut Ronaldo y Maggie karing tanaman, tiki neng minta king Floral Shop. Disnan dalang atin gagawan ding aduang empleyadu. Ing metung gagawa yang Flower Arrangement, at ing metung gagawa yang Disk Garden. Dela neng Ronaldo Y Maggie ketang gagawang Disk Garden.
--Oliver, This is Ms. Maggie. Create a beautiful Combo for her.
--Hello, Ms. Maggie. Any idea what kind of plant you want?
--Wwwait! I want Ronaldo to make it for me.
--Ali, pu. Bisa naku sang mamun kekayu uling managtal na kung sampaga .Mitatas ne pu ing aldo. Nung pung mikapali, agad la pung malanat. Y Oliver pu yanang bala.
--Ika naman. Malunus na kaman kaku, emu naku man lalakuan. Sigi na naman. Panggawa mu naku man. Panusigan mu na kuman sana.
Mipakama-kama ya Y Ronaldo. Nandin katipa na keng kotsi bosis yang inda, penandit mu, inyang papasyal ne karing tanaman, bosis yang maglambing a dalaga, ngeni naman bosis yang anak a pelangga. Ban ala nang dakal pang salita, kinangua yang kasantingan dagul a pasu, dinamput yang Anthurium, Diffenbachia, Caladium, Fern, English Ivy at king mapilan a penandit , yari ne ing Disk Garden na.
--Kapamu, nanuya'yta
--Calathea ya pu.
--Yabe me ita, buri ke.
--Opu, yabe taya.
--Kapa. Lako me ing berding yan, eke buri. Itang malutu keta ing buri ku. Nanu ya ita?
--Moses in the Cradle ya pu.
--Metung pa, alilan mo reni, buri ko deta, nanu ing lagyu re deta?
--Photos la pu. Sige pu ilako la dening Ivy at ilang ikabit tamu deng Photos.
Sinaguli mu mesamasan ya ing Disk Garden. Binili ne king Basket, dininan neng ribon at tinusuk ne ing Greeting Card nung nu atin makasulat "I Love you Mom', at inaduang ne ing basket kang Maggie. Dapot Y Maggie ene inabut.
--Magkanu ya?
--Twenty dollar ya pu.
--O' sige, ibili me ketang pasenger side ning kotsi ku.
Memintu ya Y Ronaldo. Kena ne ing Basket kilub ning kotsi. Linub ya king kotsi na Y Maggie at saka ne pepa-andar . Kinangua yang pera king bag na, at inabut ne kang Ronaldo ing Fifty Dollars.
--Saguli mu pu, dinan dakayung resibu at ibalik ko ding kekayung sukli.
--Paburen mu ne, ena ka mangabala.
-- Ali pu, saguli, mu pu.
--Mamirapal ku mu. Ibie mune mu ing sukli at ing resibu keng mikit katang pasibayu.
--Ali tana pu mikit pang pasibayu.
Sinlam ne naman a lupa Y Maggie. Makalulun ya kile. Mengambyu ya. Ene memun man kang Ronaldo. Pepasalitsitan ne ing kotsi na, at menalamsik ing mesias nang yelu ning Eneru.
Tinaglus ya Y Ronaldo kilub Greenhouse at megumpisa neng menagtal sampaga. Kabang managtal ya, y Merlita ing laman na ning kayang pamisip. Agaganaka ne itang aldo a kamumulan neng ikit. Daun kanita, ya at ding atlu nang kabarkada atyu la king Balungbalung, Mamialung lang Russian Rami. Mekabulad namu ikit de ing malagung dalagang minta ketang bale nang Apung Juan.
--Ninu ita Nardu, balu me?
--Y Merlita, Ron, Tau ya Macabebe. Magtinda la king Kabusantu. Abe re Laura, ing wali ku.
--Nukarin ya makatuknang keni?
--Ken king tulid bale, kamag-anak neng Tatang Pedro. Nanu , Ron, buri meng akilala?
--Kapamu, abe, bakit Y Ron mu wari. Ikami mang Ellas buri mi ya naman akilala.
--Ustu ka pin, Bugoy. Dapat akilala taya ngan. O' ninung maglolo kekatamu?
--Nung akung kukutnan yu. Ing gawan tamu anti kanini. Munta ta mu king tindajan na. Makipagkilala tamu ngan. Ngeni naman, nung kaninu ya mayan a lub, at yang parating pakipagsalitan na, yang mumunang maglolo.
--Kasanting na ning sinabi mu, Nardo. Buri mi ya. Bisa kami.
Inyang ati na lu king tindahan nang Merlita, Y Ronaldo yang pane nang pakisabian. Pangaras kareng dalaga, Y Ronaldo atin yang birtud. Ing birtud na, ya ing biasa yang makiramdam. Oita pin, pekiramdam ne mung mag-istoria Y Merlita, simbut nala ding abe na.
Kaibat ning apunan, inarapan na ne naman Ronaldo ing lumang makinilya. Bisa ne namang gawang sulat. Ing buri nang gawan a sulat e ya para kang Merlita, nune para king wali nang Y Delia. Sumulat ne sana, kiniriring neman ing teleponu.
--Hello, Kingsville Greenery
--Ronaldo, Y Maggie ini.
--Komusta pu ing byahi yu.
--Mayap naman. Minaus kupin keka ban emu ku pigaganakan. Ligtas kung miras keni New York. Atmu ne katula Y Ma ku kening guewa mung Disk Garden. Asabi ku kayang atin kung akilalang kapampangan a taga Capas. Buri na ka kanung aka-istoria misan a aldo. Sasaya ya kasi, patye atin yang akakasabing kapampangan.
--Salamat pu. Matula kung makipagsalitang kapampangan karela.
--O sige ne. Belita kumung ati naku keni.
O' sige pu. Dakal a salamat keng aus yu..
Belikan neng Ronaldo ing lumang makinilya.
Enero 15, 1980
Delia,
Muna ing pamangomusta ku kekongan ken. Sinulat ku uling bisa kusang makisuyu keka. Milabas ne ing aduang bulan ala ku pang tinggap a sulat ibat kang Merlita. Eku balu nung nanung milyari keya. Tinggap kula ding sulat mu a sasabing miras la ken ding pepadala kung pamasku yu. O bat Y Merlita, pepadalan ke munaman, eya pa mekibat. Paki lawe mu nemo Balibago, sankan ka mong mipaindalan. At nung ala yu Balibago, pakitaglusan mune Macabebe, balu mu naman nung nuya makatuknang.
Ing kekang Koya
Ron
Katiklup na king sulat, migsigla ne naman ing teleponu;
--Hello. Kingsville Greenery, Ronald Speaking.
--Ronaldo, Y Maggie ini. Buri kumung abalu mu king eku buri ing tratu mu kanaku! Balamu mo nung ninu na ika! Dapat mung a abalu king yang kayabangan mu makapanyugat kapanamdaman!
--Kapamu pu. Makanu kung mekasugat kapanamdaman?
--Nanung sinabi mu kanaku nandin? E makapanyugat kapanamdaman ita?
--Nanu pung sinabi ku? Paganaka yu ne mo po.
--Sinabi mu nandin: Etana mikit pang pasibayu. E masanting ing magsalitang makanian.
--Nanu pung e masanting na nita?
--This is the point: You don't know how to use the proper parting words. Malyari mung sabian, so long, I'll see you, o kaya, till we meet again. Pero ika, nanung sinabi mu? Ali tana mikit pasibayu. Dapat mu waring sabian ing makanian?
--Nanu pung marok na nita?
--Lon da naka!. Aku pa ngeni ing pisunu-sunu mo! Kesa keng manyad kang dispensa keng guewa mu magmamaragul kapa. Kasakit mu palang kasabing tao. Kapampangan ka pa mo!
Beba neng Maggie ing teleponu. Y Ronaldo, makanian mu naman.
Tinipa ya Y Ronaldo at linawe na ing temperatura king Greenhouse. Atin yang maiguit kapitnang oras king sulip. Inyang manik ne, kabuklat na king pasbul, selubungan nane ning kiriring ning teleponu.
--Hello, Kingsville Greenery.,Ronald Speaking.
Ing mekibat king sumangid ning kawad bosis yang atmu na kaganaka. Ing agud na atmu kalambing. Ing tonu na balamu yang manaru. Agyang nanan nang balakan Ronaldo, ene katerminu nitang nandin atmu kagaspang magsalita!
To to Chapter III, click:
http://maxpages.com/library/chapter3
To go back to Chapter I, click:
http://maxpages.com/library
Curator: Ernie C. Turla, pres., Akademyang Kapampangan Int'l. |
|