Home
gloria
academy
international
 watas
languages
chapter2
chapter3
chapter4
chapter5
chapter6
chapter7
chapter8
chapter9
chapter10
chapter11
chapter12
chapter13
chapter14
chapter15
epilogue
anecdote
version
arenas
|
| KULE YANG DAYA ING BANUA, chapter 15 |
 |
| by Renato B. Alzadon |
Ginapang pakakalale ing panaun. Milako na ing sakit king panga nang Ronaldo.
Menatili yang lihim ing resulta na ning DNA test. E nane pekisabian Maggie Y
Betchay---masyadu ya kanung daldalera, at e nane pekisabian Y
Rosalina---kukunan ne kanu keya Y Ronaldo. Baya rugung mipanginlag keng pate
balungus, Y Ronaldo man e nane masyadung pekisabian Y Rosalina.
Labing Lima ya ing Mayo.
.
Ulina pin ning mabuktut ya Y Maggie, at king kapanwalan nang kaya ya ing anak a
darala na, birian nanang Ronaldo ing e muli Pilipinas. Ken mong lub na, ibie na
ing tungkul na antimong tatang na ning anak, kasal la o ela man kasal
Maggie.King guewa nang ini, ya na man ing mibili king alanganin. Ya ing ngeni
maglambitin king matbud nang sinulad ning pangaku---king pangaku nang Maggie, at
king pangaku ding Flechner a saupan deng manikuang Greencard.
Ngeni pin, Y Maggie, nung kapilan ya milamnan, karin ya lalung masakit
intindian. Nung misan atmu ne kagilas at king pangimut na at pamagsalita balamu
supil ne ing yatu, at nung misan naman makabusaktung yang mangapakiak keng
kabugnutan a balamu wari ala yang tiwala keng sarili na.
Digdagan na pa ing oras nang Maggie keng pamag-ahensya na, at kadalasan, ing
duty na pambengi, at makaba pang oras. Neng atyu bale, Y Ronaldo yang mituturan
keng bigsikan ning kayang balungus. Pibabatan nang Ronaldo ing panugali nang
salang malpa at salang magadtu uling balana talaga lang makanian deng
mabuktut---bugnutin lang masungguit. Makanian man sinangguini na kang Dr.Morales
ing akakit nang kabuisitan nang Maggie. Ala neman balung ibie payul ing doctor
nune ing eno dapat papaltan inuman Maggie ding keyang panulu. Indat naman
banggitan nang Ronaldo ing makatungkul keng panulu, Y Maggie yang mangasilad a
mata king mua.
--Pasabi nang Koya, emo kanu kakalinguan inuman deng panulu mu.
-- Ronaldo, aku ing Nurse, emu ku pakisabian tungkul keng panulu. Akung
makibalu, aliwa ika!
--Ing koya mung doctor yang makisabi kanyan.
-- Agyang doctor ya pa, aku naman maki-anak, aliwa ya. Agyang magkasakit naku,
pibatan ku, eya sana magdusa king tauling aldo ing anak ku.
--Nanung pagdusan na?
-- Emu kasi, aintindian, eh. Deng panulung den lasun la. Nung pitutuliran,
panulu lang lasun a singkapan dang panlaban king lalasunan dang lasun. Kaibat
mung minum atin na naman lunto dapat lasunan at ing tanikala ning lasun ala neng
patad. For example you take one capsule, there will a side-effect. Threat the
effect then there will be another unwanted effect, and the cycle goes on and on.
To be honest, I'd rather take the sacrifice than to compromise the health of my
baby. There is no way I will let my baby be poisoned by these damn medications.
Did I make myself clear!!!
--Eku aintindian.
--Well then, shut-up. Don't you dare bring that subject again!!!
Miras ing bulan ning Hulyu.
Y Maggie ene mag-obra, ken nemung bale. Siguru uli ning ugali nang sumpungin.
Ninu naman ing makapibabata keng makanian a panugali. Ditak a bague balu nang
pikate-kate bayang atin apamuang tau. Balumu makuswelu ya neng apapansin de,
maski na makasugat yang kapanamdaman da deng aliwa. Y Ronaldo yang magdusa king
makanian nang panugali.
Ngening atyu ya king bale, ya naman apagbuntunan nang mua ing pintura ning bale.
Panagkasan ne uling kule yang lunti. Buri na kanu kule kulyawan a maki-alung
malutu, antimo ing sinag ning bayung bait a aldo.
--Pinturan meng pasibayu ing tuknangan a ini, Ronaldo. Eke buri ing kule yan.
--Nanung matsura king kule yan. Kule yang saguiwang lunti. Kule yang tanaman.
--Eko buri deng tanaman. Basta buri ku aliwang kule. Ketang makasaya king anak
ku.
--Nanung buri mung kule?
--Buri ku kule kulyawan. Itang maslag a balamu sinag ning aldo. Samutanan meng
ditak a malutu bayang balamu abak. Uling keng aldo tatakut la deng multu. Inia
buri ku kule sala. Kule sala ning aldo Ronaldo, aintindian mo! Pinturan me ing
bale kule malare kulyawan!
--Nung makanian ing buri, pinturan keng kule ning sala ning aldo.
Menusig ya Y Ronaldo. Pinintura ne ping kulyawan a maki-alung malutu ing
tuknangan na. Dapot, agyang mibayu ya anyu ing tuknangan, eya mu rin migbayu
panugali Y Maggie---misusubi ya pa ata.
At miras ing bulan ning Agostu.
Y Maggie ala yang patugut maglinis. Kabuklat ning abak maglinis ne angga neng
kapitangan bengi. Emu ing bale ing lilinisan na---pati na katawan na. Nung
makatatlu mu ing aldo mandilu ya. Ken mong lub nang Ronaldo, darala na ning
lisangan at darala na ning deng Nursis megaral la keng mikrobyu ampon bacteria
inia makayungyung lang ustu keng kalinisan.
Ngeni naman, ding sopa king sala ilang apag-pukulan nang pansin, Maggie. Pane
nong pamaligtad a sapin, pamagpagan, at alilan a posisyun. Nung kapilan malalam
ing bengi a matudtud yang maniaman Y Ronaldo, kanita no pidusug-dusug. Potang
migising ya Y Ronaldo at ibawal ne, ya pang mua.
--Eka dapat mamuat makanian. Atin kang darala.
--Pabustan mu ku. Masikan kung tau. Sadya ku keng pamamuat pasyenti.
--Tutu na mo. Dapot ena man bengi-bengi sasamasan mo deng sopa.
--Kailangan lang pane makimut. Deng daguis kasi sasalikut la ken. Akakit kula.
--Obat aku eko akakit. Eku isipan a manik la keni deng daguis---kaleldo na. Nung
marimla malyaring manintun lang pali. Neng kaleldo, magsalilung la keng kulkul
ampon lalam dikut, e keng bale.
--Nanu, aku pang malaram! Kesa keng apanan mong pamitik at pamaten mu la, aku
pang kakalabanan mu. Obat makanian ka? Ala ka kasing balu nung ena mu tanaman.
Emu balung deng daguis tubud nong Satanas. Sabi na pin ning maganakang Anghel
king kailangan malinis ya ing bale bareng e panikan deng kampun nang Satanas,
uling Y Satanas ampon deng kampun na maburi la keng marinat.
Mapipitna ya ing Agosto.
Kapalipalian ning panaun. Maranun yang mibangun Y Ronaldo. Balak nong agtalan
kabang maranun ding Delphiniums, Larkspurs, at Gypsophelias king marangle.
Mibangun ya naman Y Maggie at tikian ne Y Ronaldo king kusina. Katando nang
Ronaldo king awang ikit na king ing aldo sisikat king aslagan atmu ne kalare. At
ing banua atmu ne kalutu---balamu wari yang sedang maputing mengapisikan daya.
Y Maggie kagulutan na mipa-asyo yang masikan.
--Dios ku po! Dios ku po! Kule yang daya ing banua! Kule yang daya ing banua!
Mebulus ne y Satanas!
Apatlud nya murin ing kayang kadena!
--Nanung panyabyan mu?
-- Guinu ku po! Metupad ne pu ing maka-ula! Oini na ing amanuan ning
Apokalipsis! Sasaka ne Y Satanas ibat king kalalaman. Lon me ing banua
mitatau ya king aping manibat king impyerno!. Kule yang daya! Kule yang daya ing
banua! Yan ing tandang Y Satanas datang yang mangisalwak daya!
--Aliwa Y Satanas, bagyu ya ing daratang. Yan ing sasabian ning telebisyon
nabengi.
--Aliwa ing bagyu yan! Ing makasulat ya nang metupad! . Mebulus ya Y Satanas!
Apatlud ne murin ing kadena ding kayang bitis. Oyan, sasaka yang ibat king
kalalaman, ban maminsala yang pasibayu. Kanita linub ya king pangatau nang
Herodes, inia pete ro ding alang malit. Lungub ne naman kanyan king katawan ning
metung a tau at pamaten do deng anak. O' Ron, Ron, pota galang paten ne ing anak
ko?
--Aline, panatag me ing lub mu. Alang Satanas a datang keni.
Bisni neng Ron ing telebisyon. Atin pin daratang a masikan a bagyu. Ing karkula
da, bayu mitakap ing silim mangumpisa na ing masikan a angin at tukian na ning
masikan a uran.
Ene meg-almusal man Y Ronaldo. Tinipa ne at tinaglus ya king marangle.
Kailangan lang maputut ding anggang sampagang dapat maputut pota masayang lamu
nung siran no ning masikan a angin. Dapot Y Maggie, sindu na ing pamanalbe king
T.V. Ing akakit na king telebisyon, adua lang Anghel. Ing metung maganaka ya at
ing metung atmu ne kataras. Sasabian dang ulit-ulit keya king minukyat yang ibat
king impyerno Y Satanas at mangisalbag yang kaligaligan king mabilug a yatu.
Samantala, Y Nestor atyu ya king dalan I-95 North, manibatan ya Washington D.C.
at papunta ya king Aberdeen. Inia mame ya Aberdeen uling pakikitan ne Y
Betchay , ing kasapakat nang lihim. Ing kasunduan da, king suportahan dala ding
kapatad king kimutan a epa sinuku. Menasa naman kareti, kamag-anak dala, uling Y
Nestor at Y Betchay mipisan lang alang pilatan, dapot lilihim da mupin, pati na
ing pamikilala da. Oini pin, atyu ya king dalan Y Nestor, magdala yang
makasuput a pera, uling mibayaran ya king tauli nang serbisyu. Ibie no dening
perang deni kang Betchay, at yana ing balang mangipadala king Pilipinas.
Nabengi no tinggap dening perang ibat karing taung eman migpakilala. Pekikitan
de king tiknangan nang Hotel a metuldung lugal dang tipanan. Kaibat dong binie
ding makasuput a pera, dininan deng bayung misyun. Ya ing mitutukan a
mangiligpit king metung a pekamagaling a "Assasin" a sasagka keng misyun da, at
ya na kabud Y Blady Chaves. Ing presyu king buntuk nang Blady atlung dalan a
libung dolyar. Dobladu pa ing bayad nung mapatad ya Y Blady king lub ning
pabulan. Matula neng tinggap Nestor ing bayung misyun.
Kabang masalusu yang pupulayi king Highway, ya man, apansinan na king Kule Yang
Daya Ing Banua. Aganaka no ding pengari na at kapatad nang pete nang Blady king
Bale Matua king paglautan. Pepatadtad neng balas Blady ing bale at pepasabugan
deng granada. Kaibat linual king dyaryu kabukasan king NPA la ding diskulan
nang Blady.
Samantala, Y Blady, antimo Y Nestor, atyu ya naman king dalan I-95 North. Ya
man, antimo Y Nestor, manibatan ya Washington D.C. King era balu, mitutuki lamu,
at nung misan, miyagape la king Highway na ning I-95 North.
Nabengi pekikitan nong Blady king metung a Hotel a kayarap na ning hotel a
tiknangan nang Nestor, ding pepayaus kayang matas a opisyal na ning Washinton.
Misan pa, penabilinan de Y Blady king ala yang kakilala karing kasabi na, at ala
lang kabaluan king pagawa ra kaya. Y Blady atin yang bayung misyun. Yang
mepiling mangiligpit king pekamagaling a "Assasin" ding kangatbang panig, at
ita, ya na kabud Y Nesty. Tinggap neng maniaman king lub na ing misyun.
.
Y Blady papunta neman Kingsville baneng pakikitan Y Ronaldo. Buri neng
kasangkapanan Y Ronaldo uling baluna na king miyabe nong Maggie. Ing gawan na,
dinan neng pabala Y Ronaldo, at kunwari mo buri neng isalba ing bie na king
gamat nang Nesty. Ing sabyan na king Y Nesty mua ya king pamakyabe nang Maggie
kaya, inya datang ya ban maghiganti. Ibie ne kang Ronaldo ing nomirung dapat
nang ausan sakali amatan ne Y Nesty. Nung pitutuliran, Y Blady balu nanang
agamit neng kasangkapanan Y Ronaldo ibat ketang ikit neng dinatang kayabe nang
Maggie ketang birthday party nang Dr. Magtalon. Kaibat neng pekikitan Y Ronaldo
malaus ya king kampu ning Aberdeen. King Kampu na ne ausan Y Rosalina ban karin
ne pakikitan.
Y Blady man, apansinan nang kule yang daya ing banua, at ya man. aganaka no ding
anak at ing maganaka nang asawa a tidtaran nang balas Nesty king Malutung
Gabun.
Alas nueve Y media na ning abak.
Kabud na namu aisip Nestor ing paindalanan ne Y Maggie bayu ya taglus Aberdeen.
Ken mong lub na, tutal aplit yang mamutut sampaga keng oras a ini Y Ronaldo,
mampit ya pamu saguli. layun, ipaganaka kang Maggie king magbalik ya ban kunan
na ne kayari na ning tauli nang misyun, ing kamatayan nang Blady. Uling king
kapanualan na ya ing tatang na ning anak, at ban atin nemang dalang yabut na
kang Maggie, aisip nang paindalan king White Marsh Mall. Buri neng panyaling
pyalungan a baril-barilan ing epa man mibait a anak at imalan a pambuktut Y
Maggie. Sinalingku ya king dalan papunta king White Marsh Mall.
Nung nu ya sinalingku, karin ya naman sinalingku Y Blady. Ena balung Nesty king
ing atyu kagulutan na ya Y Blady, at Y Blady ena balu king ing tutukian na ya Y
Nesty. Misalapang mu ing dalan da inang Y Nesty kinua ne ing papunta king Mall
at Y Blady kinua ne ing papunta king rota 40 nung nukarin ya ing City of
Advanced Technology
Kaibat neng mekapanyaling Nesty, megalmusal ya ketang Food Section. Kaibat nang
minta king banyu tinaglus ne king Parking Lot king ban malaus ne pin king
Kingsville.
Y Blady dinalan ya king awang ning McDonald at kabang mamangan ya king lub ning
saken tinaglus ya king City of Advanced Technology. Kalub nang Blady king
tindahan, atin sinaludu kaya, at tiki ne king peka-basement. Ing babo ning
tindahan lupa yang tindahan computer. Ing king lalam naman ya pin ing
Surveilance Monitoring System a amanuan da. Atyu ya keni Y Blady iniang misan a
munta la king Mall di Rosalina, Maggie at Ronaldo, inia balu nalang telukian.
Binie ne ing retratu nang Nesty king metung karing technician at inutus nang
ausan neng agad kabud mika match ya ing retratu.
King Surveilance Monitoring System, ding computer dudurut lang balamu slot
machine king kabilis. Y Blady migluklukan yang makapasandal. Ena man binang
miglambat , itang metung karing computer kabud nemu sinlag ing malutu nang sulu
at migsigla yang balamu wari yang mituran a Jackpot keng Kasino. Mika atin
"match" keng retratu ampon ketang meyakit a tau. Mipabaluan yang agad Y Blady.
Linto ya ing anyu nang Nesty king computer at ing mamanehuan nang saken. Kinua
re ing nomiru na ning saken at nung nuya papunta. Maliksi neng meko Y Blady, ene
memun o pepasalamat man. Penandit mu ati ne king Philadelphia Road at pakiabutan
ne Y Nesty.
Y Nesty pupulayi yang masalusu king Philadelphia Road. E binang miglambat
darasnan na ne ing Huber's Farm. Ing lugal a ini sadyanan sapak yang mais, ngeni
gagawan deng Golf Course. Mekabulad na mu ayaninagan ne king salamin ing atmu
kasalusung saken king gugulutan na. Kabud-abud namu linampas ya ing saken saka
ne biglang siklitan ketang dalan a salapang. Mengapasulud ya Y Nesty king
Hubers Farm Road a papunta king marangle. Mamalikabuk ya ing kotsi na king
kasalusu. Balu na na king atyu king panganib ing bie na. Sikbit ne ing baril
nang M-16 king pago na at ing makuyad a baril kesa ne king metung mung gamat
kabang pupulayi yang masalusu.
Miras ya Y Nesty king lugal a ala nang dalan. Pupulayi yang masalusu king
sadyang maisan. Disnan ne ing tela-bunduk. Karas na king tungatung balamu
sinulapo ya naman ing saken. Bigla yang tinulandung, angga king dasnan ne ing
banang mabasa nung nukarin ya mibangud. King pangabara na, mesipit ya ing
pasbul, eya agad milual. At abatyawan neng atmu na kabilis a datang Y Blady.
Bigla yang memirenu Y Blady. Linundag ya king kayang Jeep saka ya ginulung king
gabun. Kabangun na, migpagulung gulung ya king padulung, at kabud milapit ya
king saken pepauranan neng balas king baril nang M-16 ing saken nang Nesty.
Kaibat neng tidtaran balas inatsanan neng granada. Milablab ya ing saken karing
aduang granadang mitutuking misambulat! Pati na pera, mesilab.
Memaltuk ya ing baril nang Blady iniang ikabit ne ing bayung magazine, at kasa
ne ing baril.
Iniang syasatan neng Blady ing saken, ala yang laman. Agyang nanu mu alang bakas
daya. Ulinita, bigla yang migsakab at migpagulung-gulung. Nung e ya kinanyan
pilmi yang mituran karing sasabeung a balas a manibatan kang Nesty. Abatyawan
ne Y Nesty a masalusu yang sinulud king pulu. Ginapang yang atmu na kabilis Y
Blady ketang banang maki-burak papunta king pulu. Karas na king pulu nanan me mo
yang pusang lampung a alang inge manintun king metung a maliap a ayup. Keni ya
makatakut Y Blady. Mesubuk ne gelingan king labanan a anti kanini karing bunduk
nang madutung ning Vietnam.
Samantala, Y Nesty man atmu na kaingat ing kayang pangimut. Nung nukarin alang
gasgas karin ya susulud. Balang kimut na maka-tud. Balang takbang na manayun.
Balang lawe na pasuglap. Pati pangisnawa na, alang inge. Keni ya makatakut Y
Nesty. Mesubuk ne gelingan king labanan a anti kanini karing bunduk nang
madutung ning Zambales.
At kabang mipanintun la king pulu, linakad pakakalale ing oras.
Nandin, bandang mag-alas dyes na ning abak, king dapal nang pamamutut
Delphiniums Ronaldo, mesugat ya tindaragul. Mepilitan yang minuli ban dinan neng
panulu at dinan neng balut ing sugat. Ene kailangan katuk pa king pasbul, uling
ena ne man kakandadu. Tinaglus ya king medicine kabinet king banyu at tigtugan
neng panulu saka ne binalut tape ing taliri na. Kaibat pintalan ne Y Maggie a
makabaluktut king kama, a king lawe na matudtud yang maniaman---nung eya
magmamatudturan.
--Ika kasi, kesa keng matudtud ka neng bengi, nung nanu ngan ing gagawan mu.
Inya oyan, neng aldo ka mipapatudtud. Nung daramdaman mu ku, mag-almusal na ku,
at ing almusal ku paugtuan nya naman. Emu ku panayan manik para maugtu uling
piraplanan ing obra king marangle. Bayu datang ing masikan a angin at uran
kailangan maputut langan ding dapat maputut a sampaga, saka itas la ding
alambri, at mika-astaka la ding Dahlia. Kailangan kung magmandu, uling nung ali,
pihele-hele demu dening kasaup a Katilaloy.
Y Maggie e ya mekibat. Inya, meg-almusal yang dili nang Ronaldo at kaibat tinipa
yang mine king marangle.
Y Maggie ene man pala matudtud---magmamatudturan ya mu. Kalako nang Ronaldo
sindu na ing pamaglinis. Ing kuartu ya ing ngeni pakalinisan na. Kaibat nang
linimpiasu ing lande ampon penguskus king dingding, mindilu ya. Pekalinis ne ing
katawan na. Pepalangi neng twalya ing buak na, saka ya minta king kuartu at
karin ya minyukle. Kabang manyukle ya, ikit ne king salamin ing maganakang
Anghel. Mipanatu la, at kaibat ngana ning Anghel keya.
--O' Maggie, Obat eme lilinisan ing kama?
--Nanung ali, pane keng alilan a sapin.
--Wa. Alilan me pin a sapin, oneng emu neman babaligtad a kutsun. Syempre,
marinat na ing king lalam kanian. Nung a panaunan me, linisan mu ne man. Balu mu
na man, ikaming angheles, buri mi sana malinis ngan.
--Wa, pin ne. Oneng makananu keng ibaligtad mabayat ya.
--O' kase, igutan me ing metung a suluk keni, kaibat ing metung a suluk keta.
Mas mabayat la pa deng bubuat mung pasyenti kesa kanian, ale?
--Nung king bague.
Linto ya king salamin ing Anghel a mataras.
--Oy, Margarit, eka tamad-tamad ken. Ibaligtad mu ne yang kutsun ning kama at
pamagpagan me.Alilan me sapin. Malagwa mu.
--Opu, Madre Senora. Gawan ku na pu.
At memintu ya Y Maggie king utus. Leko na ing makasapin. King mipnung sikanan,
inabit ne ing metung a suluk, kaibat ing metung na naman. At pepasibayuan na ing
pamanigut. Ing mabayat a matress digpa ya ing metung nang gilid king lande.
Kadugpa na king lande, ikit neng Maggie ing baril a kena na karin Ronaldo---ing
baril a pepadala nang Blady a makalulan king bulsa ning makapal a imalan a seli
nang Maggie king White Marsh Mall.
Dimput neng Maggie ing baril. Sinyasat ne at pikasa-kasa. Sapak yang laman ing
baril. Ala ya ping kakimo-kimo Y Maggie keng pamanalan nang baril. Tutu pin ata
ing sasabian na kang Rosalina at sadya ya naman tatalan baril king bunduk.
Ngening tatalan neng baril, tutu naman kaya ing sasabian nang barilan ne Y
Rosalina?
Alas Dose ing metigtig.
Samantala, Y Rosalina yang dili na king bale ra ding Magtalon. Kaibat-ibat nang
meugtu. Detangan ne ning pamangainipan. Nandin akit neng kule yang daya ing
banua mikarugan ya salu. Aliwa Y Blady ing keng isip na---Y Ronaldo. Ena balung
sabian nung baket pigaganakan ne Y Ronaldo, a king balamu wari itang malare nang
kule ning banua yang sinyal a ating e masanting a malyari kaya. Ena balung
milyari na--mesugat ya king pamamutut nang sampaga. King bayang mipanatag a lub
aisip nang munta king Greenery. Gawan nang sangkan ing sasali yang sampaga.
Uling ala ya pin saken, inya minaus yang taxi. Ena balung Y Maggie atin yang
tatalnan a baril king keyang gamat, at nung akit ne, delikadu ing bie na.
For the rest of the chapter, go to:
http://maxpages.com/library/epilogue |
|