gloria
academy
international
 watas
languages
chapter2
chapter3
chapter4
chapter5
chapter6
chapter7
chapter8
chapter9
chapter10
chapter11
chapter12
chapter13
chapter14
chapter15
epilogue
anecdote
version
arenas
|
| KULE YANG DAYA ING BANUA - A NOVEL IN KAPAMPANGAN |
 |
| by Renato B. Alzadon |
Chapter I 
King Kingsville Post Office karin la mikit. Pareju lang mamaldug sulat. Ding sulat da pareju lang papunta king Pampanga. Ing king lalaki, Macabebe, at ing king babay, Arayat. Ing babay yang mapagumasid, at apasuglapan ne ing sulat na ning lalaki. Inya kabang atilu king pila, ing babay ya ing memuklat salita.
--Kapampangan kayo?
--Opu, kapampangan ku.
--Nanung Balen?
--Capas, ikayu?
--Santa Rita. Pero keni Amerika, makatuknang ku New York. Karin ku mag-obra king New York City Hospital. Keni ku pin mekipamasku kening kapatad ku Kingsville, Maryland., Y Doctor Morales, nung balu me. Kabang gagamitan ku pin ing bakasyun ku keni, mag-agency ku, at mag-obra ku antimong Nurse kareng Hospital. O ika, nukarin Hospital ka mag-obra?
Eya agad mekapakibat ing lalaki. Atin mekasabi kaya a ding Pilipinu keni Amerika menasa mag-obra la keng Hospital, o tatalan la kayang matas a posisyun. At nung alila, malamang king Illegal Alien lamu.
--Ali ku pu mag-obra keng hospital. Karen pung bulaklak ing linia ku. Aku pung manibala keng pamananaman, pamanialansan, at pamamisaling bulaklak. Atin kami naman tanaman pang-kilub bale o kaya tanaman para karen bakuran.
--Atin kang card?
--Atin pu.
At inabut ne ning lalaki ing Business Card na king babay.
--Horticulturista ka pala. Aku naman eko balung sesen deng tanaman ku keng bale; mamamate la. Mayap na mu akilala daka. Ustung atin kung masakit a tanaman balu ku ne ngeni ing ausan ku.
At tiniman ya ing babay, pawaga na king bibiru ya mu.
---Next in line......
---Next in line......
Pareju dong bildug ding karelang sulat, at mikawani lang alang nanu naman. Ing lalaki seken ne ing Pick-up Truck nang Chevy at mine ya bandang Aslagan. Ing Babay seken ne ing Toyota nang Camry at mine ya bandang Albugan.
At mituklip ya ing pepatingapun.
King tuknangan nang Ronaldo, kaibat ning apunan, inarapan ne ing lumang makinilya, at megumpisa yang sinulat. Ing babaing ikit na king Post office bitasang e sinulud man king kayang kaisipan. Ing atyu king kaisipan na, ya at ya mu kabud ing likuan nang kapalsinta king Pilipinas, Y Merlita. Mag-adua nang banuang malakue a ela mikit. Ibat inyang mamun ya keya king Manila International Airport misan a bulan ning Mayo eno mikit. Dapot mapilan na mung bulan, keng daratang a Mayo, muli ne at akit neng pasibayu ing mutyang parating laman ning kaisipan na. Ing kayang Merlitang alang tuknang nang susulatanan . At oini pin, susulat ne naman.
--Enero 14, 1980
Kingsville, Md 21087 U.S.A
Kaluguran Kung Merlita,
Tanggapan mung ibat kaku ing e kumupas kung panalala.
Nung atin ku sanang upaya, paglaputan ko ding bilungan ning panaun balang agad milabas. Nung kapilan milalapit ing aldo kung pamanuli, karin ku lalung panamdaman ing beyatan ning pamangulila ku keka. Ing Mayo mapilan ne mung katakbangan, dapot eke buring takbangan nune buri keng pulayan bara kang agad dasnan. Paniwalan mu bandi ku king agyang libu lamang dagat ding mamilatan kekata.......
--Kiririring...Kiririring...Kiririring...Kiririring...
Tinikdo ya Y Ronaldo at maliksi neng dimput ing teleponu.
--Hello. Kingsville Greenery.
--May I speak to Ronaldo
--Speaking...
--Hi! Y Maggie, ini. Aku ing akilala mu king Post Office nandin ugtu. O' nanu komusta na ka ken?
--Mayap naman pu. Nanu pung asuyu ku kekayu at mekayaus kayu?
--Muli na ku New York bukas. Bisa ku sanang paindalan keng Greenery yu bakung makasaling tanaman. Ibie keng pasalubung kang Ima kung atyu karin. Nanu ing masanting a makapasung tanaman, itang pang-kilub-bale?
--Ikayu na pung balang mamili. Atin kaming Diffenbachia, Peace Lilies, Caladium, Anthurium, Jade, at dakal pang aliwa pa. Ikayu na pung bala nungnu atin dagul ing pasung buri yu at nung buri yu ing ausan ming Disk Garden a miyaliwa lang tanaman king metung a pasu.
--Balamu masanting ya ata ita.
--Insanu pu?
--Itang sinabi mung tauli. Itang atin garden. Nanu kayung oras mamuklat?
--Alas otsu pu ning abak ati na ku king opisina.
--O sige, mikit ta na bukas.
Beba neng Ronaldo ing teleponu. Migbalik ya king lumang makinilya baneng isundu ing gagawan nang sulat.
......eka bitasang mirayu king kakung kapanamdaman. Balang benging ume ku king pagkeran , ikang atyu king kakung pamisip, ikang laman na ning kakung paninap. At maniwala ka Irug ku, ika mu rin ing atyu king kaisipan ku kaguising ku panga-abak. King lub ning makabang patingapun eka miwaglit king kakung pamigaganaka.
Ing Kaladuang Mau Karing Uma mu at Kaul mung Matalik
Ron
At dela ne pin king pagkeran ing pamigaganaka na kang Merlita. Migaganaka ya, uling Y Merlita eya pa sinulat. Pigaganakan na king pota atin yang kapanamdaman.Tauling tinggap nang sulat ibat kaya keta ya pang mumunang Domingu na ning bulan na ning Nobyembre nung nu pagmananuan neng Maligayang Aldo Beitan, ampon Maligayang Pasku. Pilit nang tatabi king kaisipan na ing bague e masanting. Ngana mong manaru king sarili na, abala ya siguru ulining kapaskuan, at malyaring dakal ya tatayan uling makipag-obra ya Balibagu antimong metung a manaying imalan.Makanian man, migkaliap ya kaya ing tundu. Biling-biling ya king pagkeran. Nung kapilan malapit nang mayabak, kanita ya pa mipatudtud.
Ing kalugkug ding Traktora king siping asikan yang ginising kaya. Linawe ne ing relo king dingding. Alas otso Y media nana ning abak. Aganaka ne Y Maggie. Menimu yang malagua at menalili yang imalan. kabud katali ra ding kayang sapatus memilagwa neng tinipa. Kalual na king pasbul atuglapan na ne ing Toyota Camry a makaparada king siping na na ning Pick-up Truck nang Chevy. Ikit neng mibusni ing pasbul ning Maputing Toyota at kinuldas ya Y Maggie. Atmu ne kaslam a lupa kabang lalapit ya kaya.
--Bala kung Alas otso, makabuklat nakayo, nanu nang oras?
--Pasensya nakayu pu, eku agad migising. Ugali ku pu ing titipang maranun, bistaman deng kasaup mi magumpisa lang alas nuevi.
--Makanian pala, alas nuevi ing oras yu, sana sinabi mu alas nuevi. E ustu itang sabian mu alas otsu, emu naman pala agyung daptan.
--Migkamali ku pin pu. Ikayu nang manupaya.
--Yang ugaling bana king Pilipinas emu ne dapat pang dela keni.
--Ustu kayu pu. Yapin pala buri yong akit deng tanaman.
--O' wa. Nula karin? Nula karin?.
At tiki neng Ronaldo Y maggie king lub ding Greenhouse. Pepakit nong Ronaldo ding miyaliwang sampaga at tanaman: Diffenbachia, Peace Lilies, Moses in a Cradle, Orchids, Tulips, Sweet Peas, Snap Dragon, Freezia, Aster, Delphiniums .....at dakal pang aliwa.
Sasagikgik ya king tula y Maggie. Atmu ne king kalambing ngeni. Nandin pamu balamu Anghel yang sinakang ibat king Impyerno. Ngeni naman, balamu anghel yang menibat king Banua. Oini ing sinulud king kaisipan nang Ronaldo: Metung yang talimhaga ing babaing ini.
For Chapter II,
go to http://maxpages.com/library/chapter2
curator: Ernie C. Turla |
|