 |
 |
 |
 |
 |
 |
 |
 |
 |
 |
|
Philippines
folksong7folksongs8folksongs9Philippinesfolksongs2folksongs3folksongs4folksongs5folksongs6|
|
| KAPAMPANGAN FOLKSONGS ALBUM |
 |
| Ernie Turla, president, Akademyang Kapampangan USA |
| ||||||
| Table of Contents (not interactive): 1. Dugu Naman Luz, Ot Mamaco Ca? 2. Iniang Mamanican Cu Queca 3. Palsintan Daca, O Irang 4. Aldo Ning Quequeng Casal 5. Atin Cu Pung Apalsintan 6. Casaquit Na Pala 7. Arana Para Queng Puputungan A Reina 8. Mekeni 9. Magbalic Ca 10.Ing Casal 11.Qng Uli Mu (the song) 12.Caluguran Dacang Mas 13.Alang Capupusan 14.Ing Larawan Ning Cacung Sinta 15.Talagang Pascu Na 16.Pascua Nin' Dispu 17.Ing Sicretu 18.Tairan Co Reng Capatad Cu 19.Deng Balen a Kapampangan (basulto) (travelogue) 20.Blackbelt (basultu) 21.Matuang Baintau (basultu) 22.Pusitara (basultu) 23.Kilo Kambing (basultu) 24.Ing Sintang Tutu (basultu) 25.Bigsu Namu (basultu) DUGU NAMAN LUZ, OT MAMACO CA? tune: "Lucille" by Kenny Rogers Kapampangan lyrics: Ernie C. Turla Quetang bar Apalit / malapit queng crossing Leco ne ing cayang singsing Neng buri queng a-"meet" / ania sinigui cu At layun quitnan que lagyu 'Niang maca-inum ne / pigtapat nang ustu Sawa neng maninap canu Neng mau cung tula / ing panintunan cu Babaing macabie / ligaya cacu Queng salamin iquit que'ing / maticding lalaqui Ichurang maroc ya lawe Siga yang linapit / minta pilatan mi Buangis ing cayang tague Mabalbas ya lupa /anti neng iganti Bala cu mapaclud na cu Oneng mengalgal ya / dacal ing siguc na Oini, queng babai nga na: Refrain: Dugu naman Luz / ot mamaco ca? Apat lang anac ta / ala nang cualta Dacal nang pasaquit / arasan cu queng bie, Pero'iti mabayat dili Dugu naman Luz / ot mamaco ca? 'Niang cabang mamun ya / minorder cung whiskey Iquit queng biglang melati Banayad nang dimput / dela ing carga na Meco niang tahimic iti Neng asme calagung / linapit canacu Bala ra mesira na cu! Dapot pilit lulub / queng cacung balugbug Ing aclis ding cayang amanu: Repeat refrain INIANG MAMANICAN CU QUECA Lyrics: Ernie Turla O irang, atatandanan mu pa Iniang mamanican cu queca? Queng barcun macabante ya'y Tatang Atin ya pang boting tatalnan! 'Niang misan casampa cu queng eran Paid-paid na cung lepitan "Hoy mequeni, queni cata, caluguran Lucluc ca at oini ing inuman" Milabas ya'ing oras queng lasingan Mipatudtud cung amu niaman. (instrumental) ........................... ................................................ .......................................(alacac) .......................................(alacac) Biruan mung queng cang arapan co, irang Sinlag cang anting reyna queng leguan Dapot 'niang ume ra na cang uman Y Tatang tepus na cung bigla. Ya palang canacung a-uma! PALSINTAN DACA O IRANG Lyrics: Ernie Turla 1. Quetang cayang duyan qng ardin Queng busal da reng sampaga Matudtud yang atmu caniaman Ing ayan cung dalaga Chorus: Palsintan daca o, irang Palsintan daca o, irang Palsintan daca o, irang Palsintan daca o, irang Micacunu cung sabian caya Pota rugu mabigla ya Ania cabang matudtud ya pa Sitsit cung lubus caya: Repeat chorus Deng ayup magcanta lang maina E co mainge, bagya-bagya At bayu ya migising sana Apagtapat cu caya: Repeat refrain ****************************** 2. Quetang baryung binang masulud Maniaman ing pamanudtud Prescung ardin a masampaga Painawa ya'ing dalaga Refrain Masalilung careng tanaman Prescu ya quera queng duyan Cabang matudtud yang maniaman Chance cu na caya sabian: Repeat refrain Deng ayup ampo reng culiglig Maglawiwi lang malambing Ania magtapat na cu caya Bayu ya sa migising: Repeat refrain Magpaltitica cung lalacad Quimut cu bana-banayad Bang manatili ya queng tudtud At apasiag cu'ing lugud ALDO NING QUEQUENG CASAL  (author and composer: unknown) (the sad version) Pengacu ning cacung sintang cacung liguran Queng Domingo aldo na ning quequeng casal Mipalucsu ya'ing pusu cu queng tula't ligaya Micaul que pang adua bayu memun caya Aniang miras ing aldo ning quequeng tipanan Migayac at misulud cung pangcasal Bigung calma aniang miras cu lele altar ning pisamban Cacasal de ring aliwa'y Sintang Irang. (2X w/ ref.) Refrain: Sintang Irang ning bie co Ica ing mal canacu Nung miwale ca siping cu Ay mate cu! Nung sampaga caman sa, acu ing ambun Acung babie tula qng pusu paragul Potang maco nacu bigla cang magticum Qng tanque malanat Qng tanque malanat Mabaldug qng gabun! Refrain (2) The happy version Sinabi ning cacung irang e na malaus Queng Domingo ing aldo ning quequeng casal Anti yang mibagsac ing banua canacu Tinulu cu lua iniang damdaman cu Macanian man ing pusu cu sinicnangan na Linub cu sa para simba queng misa Lugud ning Dios, aniang miras cu lele altar ning pisamban Manaya yang casal cami'y Sintang Irang! Refrain: Sintang Irang ning bie co Ica ing mal canacu Nung miwale ca siping cu Ay, mate cu! Nung sampaga ca, acu mariposa cu Mumuma careng pisngi mung misnang banglu Qng uli ning sinta tang sacdal queng yumu Micabunga cata Micabunga cata Magcanta ya'ing yatu! Repeat Refrain (No.2 lyrics are new and by Ernie Turla) ATIN CU PUNG APALSINTAN (This folk aong or basultu has been contributed by Nelson Tanedo of Tarlac City) Atin cu pung apalsintan, carin ya pu Meycauayan Ipan nang bara ipan, anti ya mong wewe cuayan Macaticdo't, macatimpu, sisingalngal ing banglu Itang buldit nang sasabo, pipapaten de ring lango Itang arung nang matilus, anti ya mong parus-parus Maliari lang lual at lungub, atlung pulung babing dicut Ing balugbug nang malucung, anti yamong lidlad payung Maliari lang misalilung, atlung pulung babing capun Itang asbuc nang malapad, anti ya mong dayat malat Maliari lang lungad-lungad, atlung pulung coral a damulag Itang buwac nang macaba, atin ya mong cabang sapa Maliari la ngang manacla, ding tau ngan qng Menila. CASAQUIT NA PALA Kapampangan folksong Casaquit na pala ning e biasang canta Pilit-pilitan mu aplusan me'ing dila Neng sintunadu ca at balbal a suala Aguiang numanu ca e mia murin acua Sira ing pagasa. ARANA PARA QUENG REYNA NING OCASYUN (tune: John Denver's "Annie's Song" or "You fill up my senses") Kapampangan lyrics - Ernie Turla Obat deng mata mu Bubug la queng lino Daig do reng batwin Saslag que babo Tala lang mapundat Maningning queng hinhin Busilac cang rosas Inagtal queng ardin Ambun ding labi mu Basan mong pisngi cu Lua ra reng mata mu Bendisyun cacu Nanu ing sancan na Ot atyu ngan queca Ing angang birtud ding Angel qng banua Ica ing bagul ning Cacung pangisnawa Masamyu queng banglu Babie ligaya Queng pusung maluca Mamantabe diwa Angin cang saguiwa Pepepe tula Ay, calagu mo Mabungsul cu pusu Aquit daca pa mu Lwid cu cusuelu Ot mipapayid ya Ing cacung caladua Cabang magtumayla Cung pugue queca O reyna ning bie co Diosa ca queng leguan Cawangis me'y Venus Queng quecang timan Mequeni, Reyna co Aruan me'ing pusu cu Pota queng sigla na Ya'ing camate cu. MEKENI Tune: What Happened, Oh Marty Lyrics by Ernie Turla Mekeni, mekeni, ken katang Duyan keng gulut bale Mekeni, mekeni keng katang Luklukan king plaza manalbe Mekeni, mekeni, tuki kang Munta king pisamban At layun katang pakasal nung bisa ka Mekeni, mekeni, sinta! MAGBALIK KA SA (Tune: My Heart Cries For You) Lyrics: Ernie C. Turla Nung atyu ca Pampanga, puntan daca Nung atyu ca Zamboanga, tuquian daca Masqui nu ca pa carin, queng masala Tuquian daca o cacung sinta Refrain: Ing... ca...cung pusu Tu...tu...lu, ing lua na At ing... pa...qui...duang na Magbalic ca sa Alang cacuenta-cuenta Ing sancan na Queng e pami-caintindi Mebating ca Cabucas indat bengi, anggang abac E cu mipapatudtud queng quiac Repeat refrain ING CASAL (tune: La Novia, The Wedding) lyrics by Ernie C. Turla Acaquit cung queng cang siping cu Neng pipiac co rening mata cu Quen cata mong altar miagape Ing paninap cu migtagumpe Acaquit queng mitmu'ing pisambam Pamilia ta maglua queng timan At daramdaman que ing canta: Ave Maria.... Refrain: O cacung sinta, Acaquit cu na Datang ing aldo A casal cata Sana namu acu ing para queca Queca cu mu cabud Alang aliwa Ngeni naman queng taliri cu Pasulud meng singsing a guintu At titigtig ya ing organu: Ave Maria....Ave Maria QNG ULI MU (tune: Because Of You) lyrics: Ernie C. Turla Qng uli mu, pane yang magcanta Ing pusu cung mewili queng sinta Qng uli mu reng ngang batwin At ing bulan masala la Saslag la, para quecata Mabibie cu mu pin queng uma mu Ligaya banua ing queng siping mu Ing maluca cung bie mesaya ya, qng uli mu Qng uli mu. Instrumental - Mabibie cu queng lugud mu cacu Quen cung biga ustung uman mucu Qng uli mu mica-sancan ot caya mebie cu Qng uli mu. CALUGURAN DACANG MAS (tune Ku-u-wipo) lyrics by Ernie C. Turla Caluguran dacang mas Mas ngeni, mas quesa quetang napun Dapot culang queng bucas Ing cacung lugud queca Refrain: Lon mula reng sampaga Neng mibubucadcad la Macanian ing lugud cu Daragul cabang-caba Repeat main stanza ALANG CAYANGGANAN (tune: I Can't Stop Loving You) lyrics: Ernie C. Turla Alang cayangganan, ing lugud cu queca Tintu cu queng lub cu, 'guiang ala na ca Alang cayangganan, ing lugud cu queca Manatili ca pa murin, queng memoria Refrain: Detang oras, a milabas Atmo saya.... queng pusu cu Ing panaun a-ulu ne Mo caya'ining Pusung mebigu? Repeat main stanza ING LARAWAN NING CACUNG SINTA (tune: Portrait of My Love) by Ernie C. Turla Ing palsintan cu, ala yang larawan Warit ninu, caya naman Ing macapinta, queng metung a mutya Sacdal banua, ing leguan na. Deng caya manaquit, cacarug la pasaldangan Cailangan ya ing magaling a pintor Anti mo y Manansala para pintan ne ing Larawan na ning canacung sinta. TALAGANG PASCU NA (The Christmas Marching Song) Words and Music by Ernie C. Turla Lon yo queng dalan Deng mosicus neng magpaseu la E mu'apaglibe Ing sayang babie ra! Lon yo reng anac A manalbe tuqui-tuquian dala Neng ing tigtig da Tutung macayama! Refrain: Tara-ra-jin! Tan-ta-ra! Maglapo ing tula (softly) Cambe ning gracia (softly) Talagang Pascu na! Lon yo reng awang Atin la ngang parul queng arapan Ampong "Christmas lights" Talagang Pascu na! Kislap-kisplap la Queng "Christmas tree", color da miay'liwa Salang masigla Talagang Pascu na! Repeat refrain. Ania mag-marcha La reng pusu neng daramdaman da Ing makawiling Tigtig da reng banda! (loudly) Matning trumpeta Clarinete, trombon at saxopon Ing yabisa ra Talagang Pascu na! Repeat the first stanza. Fading out with a decrescendo on the last 2 lines (C) Ernie C. Turla Oct. 29, 2004 PASCUA NIN' DISPU Lyrics and Music: Ernie Turla Pascua nin' dispu Pascua nin' dispu Pascua nin' dispu Quecong sabla Apo, siclod cu Tatang, siclod cu Inda, siclod cu Queng gamat yu Refrain: Magsaya ta, ngening Pascu Quebaitan na, ning Guinu Aruy, caniaman Na ning calame At tibuc-tibuc Careng bale Misasagana Tamu queng dalan Pascua nin'dispu Nga tamu ngan ING SICRETU lyrics: Ernie Turla tune: The Secret as sung by Gordon MacRae Atin cung Balung sicretu Cuentu re reng Aduang tau Micalugud la At balu cu'ita Caluguran que At nobia ne Prumerung iquit que Micarugan na cu Ing leguan na Macayama E cu ayawat Nanung daptan cu? Apalsintan ne Ning pusu cu Refrain: At oyta ---- Ing sicreto E cu paniabian Masqui quenu Wa, palsintan que Cabang mabie cu Ing nobia ning Chocoran cu. TAIRAN CO RENG CAPATAD CU By © Dr. Udis Lord Pilipinas, metugmac ca Deng anac mu melumud que lua da Manangis la E megaral. Maquipus la Queng alwang bansa pamitin, pamaluan, mangamate Neng abalitan cu Mengilabut cu Mispac ya'y pusu cu. tairan daca, malacas cu. Caulan daca, enaca manangis Damayan daca. Bengi't aldo susulat cu. Bang dinan dacang colegio Magdoctor lang anac mu! Pulisan cu Ing lua yu. Talacad daca Bansa! DENG BALEN A KAPAMPANGAN tune: a totoy bato's polosa lyrics by Ernie C. Turla Malwat ta nong buring / myuman apasyalan Deng anggang sakup ning / labwad Kapampangan Anya ngeni-ngeni / ing kekatang gawan Manarkila tang van / libutan tala ngan. Magumpisa tamu / king balen ning Sasmuan Karin king paroba, / busal ning kailugan Karin la makukwa / reng dakal a asan Pikabalwan yayti / kareng kayang playsdan. Dalakit tang adwang / ilug king albugan Ing balen ning Lubao / yang kekatang dasnan Ken ne mang atbu'iti / at palayan dakal Karin ya misapwak / Dadong Macapagal. Magpasulung tamu / banda paralaya Ing dasnan tang balen / ing masayang Guagua Karin ya tubu ing / prumerung kardinal Y Rufino Santos / obispung marangal. Artistang Rogelio / idolo ring malda At Gloria Arroyo - anak no ning Baba; Yuzon, Tolentino - poetang balita At Senador Puyat - tubu la ngan Wawa. Kalagpas ta Betis / miras ta Bacolor Balen de reng watas / a matas a balor Crisostomo Soto / at Felix Galura Ila ring tanyag nang / poetang makudta. Ing Baculud ya ing / Athens ning Pampanga Ing minunang diling / "trade school" karin ya Meging kapital ne / ning kekatang bansa Inyang simsam de reng / British ing Menila. Ing tutuking balen / ya ing San Fernando Ya ing kapital na / ning probinsya tamu Meging kapital nya / namang Aguinaldu Kaybat ning Malolos - bigsak ding 'Mercanu. Syudad San Fernando / sikat ya neng Pascu Uling deng parul nang / pasigla keng yatu At kabalitan ya / naman neng Maleldo Kareng papapakung / makyapus kang Cristo Balyan ne ning martir / Jose Abad Santos Lugud na keng bansa / daya na minagus Balyan ne ning sentral - ya ing Pasudeco Gagawang asukal / neng aldo kakabyo. Magbanda tang wanan / banda king aslagan Balen Santo Tomas / kekatang labasnan Dasnan yang Apalit / karin ya'ing Sulipan Ya ing kusina ning / lutung Kapampangan. Magpabalag tamu / banda king mauli Miras ta Masantol / at king Macabebe Pugad do reng dakal / diling beteranu Na ning America - detang pensyonadu. Lahi lang matapang / matun keng labanan Ilang pengara ra / di Raha Soliman At kareng Castila / makanyan mu naman Pekigera rala / isla kabilugan. Magbalik ta ngeni / king norti papunta Minalin, San Simon / San Luis at SanTana Balwarti nang Taruc / at Heneral Hizon Tanyag lang bayani / da ring rebolucion. Balen nang Sinukwan / yapin ing Arayat Kalele ning bunduk / tanyag keng alamat Katalindikingan / ya pin ing Candaba Balyan nang Gallardo / sikat a poeta. Sake tang kabayu / lundag tang marayu Dane ning Zambales / Bunduk Pinatubu Baryu Sta. Cruz / lunsut ta Florida E la mikanlaut / balen Sta. Rita. Karin ya ing Basa / papunta king Porac Sumulung tang malwat / at miras ta king Clark Air Base ne kanita / bansang America Dapot ngeni naman / "economic zone" ya. Sulapo tang norte / ing Tarlac yang dasnan Peka-pangulu ning / labwad Kapampangan Karin ya ing tanyag / Hacienda Luisita Anti murin ing park / nang Maria Cristina. Magpabalag tamung / patililis kanu Miras ta Concepcion / balen nang Aquino Lumipat tang ilug / miras ta Magalang Sale ring poeta / ning Amanung Siswan. Mabandang albugan / dasnan taya'ing Capas Karin ya'ing O'Donnel / angganan ning "Death March" Kalagpas ta Bamban / paroba papunta Dau, Mabalacat / pasbul ning Pampanga. At ing Angeles yang / layun tamung dasnan Syudad a maragul / sentru ning kabyasnan Sandalan ding pantas / pugad ning kasayan, Tagimpan ne ngeni / ning balen tang tibwan! Ngeni tukyan taya / ing North Diversion Road Karas ta king S.M. / magkayli tang agad Miras ta Mexico / balen nang makamal Ning kekata ngeni / a dalo pandangal Rafael Maniago / pintor at poeta Babye mi kekayu'ing / kekeng panalala Sasaludu ke pu / keng kekong arapan Neng metung kong batwin / ning balen tang tibwan Kaswertyan ta naman / atyu y Mang Paing Lusuk keng tenakan / kekatang pagmayring Maldang makiramdam / ana tikdo ta ngan: Pasaganan tayang / matning palakpakan! Basultu babo ning Damulag: BLACKBELT Neng: Renato B. Alzadon Baintaung Tibu dimpa ne ning sinta Eya mipatudtud mengaslak ne mata; King kayang pamisip, agyang nuya munta, Larawan neng Biring itang makapinta. Misan king palenki king dimut a saglit Balamu Y Biring ya ing kayang ikit Ketang makagulut agad nang linapit At kabud na nia mu inapsal a buldit. Ing meapsal buldit biglang sinikad ne Miragsa ya'y tibung malim-alim male; Ing minie king back kick inyang balikdan ne Y Goryang blacbelter keng Judo Karate. MATUANG BAINTAU Neng: Renato B. Alzadon Maleldo, Y Kiku ya ing pun ning Puni At mika-pabasa---at mika-pangadi; Komo baintaung maki-tagle tikdi Apansinan ne ning dalaguitang Neni. Lub ning paruminggung pamiaga-aga mebaldug ya ta lub ining dumalaga; At asabi napin king mipnung ala-ala Sana mamasyal ya kanu king karela. Kaibat ning maleldo, kabag-kabag salu, Keta kari Neni memasyal ya'y Kiku; Oyan ing niaman ning baintaung suku Ing dinungut kaya, ing Imang mebalu. PUSITARA Neng: Renato B. Alzadon Y Popung metung ya karing butangeru Didiga kang Bebang king tindajan baryu; Uling dakal nyarin agawang perwisyu Nya panabakan ne bakas matuang Pedru. At misan Y Bebang migpusitara ya Kalagyu neng Popung itang atukyan na; Ining matuang Pedru talaga pung mua ya Ela makapanik king bale ku, ngana. Tikian nalang Popung ding tubud a tanak Kang Mang Pedru mismu yang minie king lamak Nume dela, ngana, ing kanakung anak? Nung e memulayi, metadtad yang tabak. Kalgaretang Kambing Neng Renato B. Alzadon Paka-gareta la ding sugu nang Bertu Manakut lang pale bubuntun king Patyu; Ngana nining Biling a anak nang Saryu Atin sang pulutan at saka Aneju. Oras ning paugtuan, sinugud neng tambing kabang lalangut ya maglabit ya'y Biling; Maski nanu klasing pulutan malasing apangan ku, ngana, puera mu keng kambing. Yang kambing, nan de mang samasan ilutu Ali ke apangan atmu ne ka-anggu; Belikdan ne kanian ning matuang miglutu Bileng, nanu ya yang kakanan mu, itu? SINTANG TUTU (True Love) by Tony M. Pena sukdul ning pusu ku 'nyang muna kang akit masikan keng duldul kinarug ku salu itang panamdam ku balu mu nung bakit uyung nang Kupido digpa ya ing pulu! e ku makatudtud, e ku makapangan mengaslak ku mata, takde ku meyayat umpisa lang linto dakal a daliawat lupa ku anti yang kamuting absikan! alus patingapun angga king pagkeran ika ing laman na kakung panimanman ing kakung pangaku king lagu mung tagle lagyu ku ibye ke, sinup ka king bale! ing maimut a napun tutu neng pinaku bigla neng simsam ing kanakung pangaku kaybat tong pikurus ding kekatang gamat miyawat ing sinta minuling alamat! ing lugud ku keka alang pamagbayu maski ka marayu atyu ka pa kaku maski al'wang bale ing keka misinup sulat mu't retratu kipkap ko't kinupkup! ing lugud ku keka king biga lalagpas panenayan mu ku ngeni mangaku ka potang ing inawa mapatlud ne bukas king kasumangid bye panintunan da ka! Bigsu Na Mu Neng Renato B. Alzadon Ing Konsejal Iru meangu ing bie na Atyu makaburul king mismung bale na; Dakal la ding taung babie galang kaya. Balang miapagan, maglutu lang baka. Ing baka, e paman melambut a laman Y Tikung Gilagid maniawad neng kanan; Linapas yang ditak ketang palambutan Saka ne inakmul mebaknal ya kanian. Penimid de atyan masuerti nyang tutu Linual ya ing karning inakmul nang Tiku; Kamasmas na, ngana, nu ko bigsu na mu--- Bigsu na ku pala tinuki kang Iru. To see the lyrics of the Philippine National Anthem in Kapampangan go to http://maxpages.com/kapampangan/folksongs5 To go back to page one: http://maxpages.com/kapampangan  |
 Sign Guestbook |
 View Guestbook |
| It is entitled KAPAMPANGAN SONGS | and Poetry | by Ernie Turla |
 ernieturla@yahoo.com |
||
|
. |
| Visitors: 05345 |