Home
Philippines
 folksong7
folksongs8
folksongs9
Philippines
folksongs2
folksongs3
folksongs4
folksongs5
folksongs6
|
| KAPAMPANGAN FOLKSONGS III |
 |
| Compiled by ERNIE C. TURLA of Lubao, Pampanga |
TABLE OF CONTENTS: 
1. ING BIE NA NING TAU
2. NANUNG CASALANAN
3. NUNG AGANACA CU
4. PIBATAN CU IROG
5. CABAYAT NA
6. PULOSA
7. O GLORIA
8. CAPAMPANGAN CU
9. BUNGANG BIABAS
10. MACAPAGAL
11. PAGMARAGUL QUE ING BALEN CU
12. MEQUENI QUENG SIPING CU
13. ING MANUC NANG PEDRO
14. ANIA MONG MALATI CATA
15. Y NINOY AQUINO (pulosa)
16. DENG BALEN A KAPAMPANGAN
17. CANIAMAN NA'T CASAQUIT NA NING MALSINTA
18. HIMNO KAPAMPANGAN
19. ARIA-PILAR (ING ANAC NING KATIPUNAN)
ING BIE NA NING TAU
written and composed
by Victor Bonifacio
I. Ing bie na ning tau
Cacu yang isipan
Macualta’t calulu
Metung puntalan
Obat casaquit na
Luguran yang calulu
Dapot ing makualta
Buri taya ngan
II. Mipapacaili cu
Quening cantang guewa
Pagcanta da cayu
Ba cayung tumula
Misan isipan cu
Lalu qng aguman
Pamisasan metung
Buring pairal
Chorus
Gugulisac cu
Quening canta cu
Burin pabalu
Lugud quecayu
E mu cacalinguan
Aguman Kapampangan
Malinis ya’t marangal
A dapat tuquian
III. Qng pamagmasid cu
Nung ini yang miral
Ala yang puntalan
Quecatang aguman
Sabian cu nang tutu
Ala sang magdamdam
Inanaquit tamu
Bawas-bawasan
IV. Macaba ta pa bie
Dapat tang isipan
Anac a tutuqui
Atin lang apusan
Pamicacalugud
Pamisasanmetung
Buri na ning Dios
Buri taya ngan
Chorus
Oini na ing wacas
Canta cung peninap
Lugud cu quecayu
E na magwacas {3 times}
NANUNG KASALANAN
Lyrics by Ben Susi
Nanu waring casalanan
Cabud mu nia quemuan
E cu balu nung nanung sancan
Camumua mu hirang
E na bala pibatan cu
Nung ya ing tula mu
Mapit mang anting atdu
Pilit alducan cu.
Lunusan, mu ne ing caladua
Ba neng, tumula't ligaya,
Dale na sana suliapan me
Caring quecang mata
Ining pusung bisang maquilaguyo queca
Patawad, o canacung Diosa
Nung micasala cu pin queca
Yulit cung ipagtapat mu na
Nung nanung sancan na.
NUNG AGANACA CU
Lyrics by Ben Susi
Nung aganaca cu, itang milabasan
Cacarug yang salu, Quiquilig ing laman
Nung acu mu irug, e cu casalanan
Ing calinguan daca, layun pagtacsilan.
Ngening quelinguan mu, Irog itang pengacu mu
Cacu sidsad pait, guewa cung mayumu
Mipala ca sana, Ya mung yaya yayaduan cu
Manaquit ca sanang, miguit pa canacu.
PIBATAN CU IROG
Lyrics by Ben Susi
Pibatan cu, Irog, ing me alang calma
Ing sumpa mu cacu quelinguan mung bigla
Licuan meng pusu cu sugat na daraya
Nung apigunam cu ining caluncutan
Parating mamapa.
Anta yu mo ngeni itang pengacu mu
A simpa mu iniang maili cang tinangu
Pirait mia pala ing malsintang
E na ca melunus queca ya guilutan
Ing tapat cung pusu
CABAYAT NA
Lyrics by Ben Susi
Cabayat nang tumulu Hirang
Ning lua cu qng capilan pa man
Dapot iniang ica ing liguran
Parati ra cang quiquiacan
Lalu't ngening apigunam cu
Ing queca pamacamal cu
Ali pin e ayamyam cu
Ing maluncut cang aquit cu.
Coro:
Inia sana o hirang
Isacwil mu ing calumbayan
Ganacan mu ati cu naman
Qng siping mu manandaman
At iti quecang asahan
Ing e raca cacalinguan
Ngeni't qng capilan pa man
Ica mu ing caluguran.
(Ben Susi is a former "tininti del barrio"
of Remedios, Lubao, Pampanga. For the tunes
of his songs you may contact him at jeivys14@yahoo.com)
 PULOSA
(An excerpt of a polosa sung by Totoy Bato)
Queti Pilipinas, sabian cu quecayu
Oyan mu ing cualta na ning Pilipino
Quetang pamaquiabe ing sabian cu queca
Ali me asali - e me asaling pera
Ania nung sacali, o Mr. Antonio
Ulitan que queca ing pasalamat co
Nanding iquit dacang, iquit cung prumeru
Balamu iquit que-y Senador Aquino
Dapot macanian man maldang maquiramdam
Dugo ining Mrs. na parangalan que man
Quening panaquit cu ngening caorasan
Tatalnan ne yata ing anac nang cambang
Obat nung sacali casanting nang myuman
Dugo niang anac yo sasabian quia naman
Masanting ya molde esposa mung irang
Atyu queng magmolde ing balu neng dalan
Dugo yang anac yu misna queng sintingan
Nung iwangis que pu artista rang ausan
Metung ya mu coyang e cu buri caya
Paldinatin ya mu uling maputi ya
Dapot macanian man itang quewangis na
Dugo niang anac yo anti mong artista
Ustung iquit que po rugo-ing capatad na
Ing ausan dang Baby ya pu-ing quewangis na
Anta e ca bisa, o Mr. Antonio
Iparam meng misan cacu yang anac mo
Gawan quia mung padrun iya ing lupan cu
Ba cung macagawa rugung simpatico
Dapot macanian man bibiru cu coyang
Nung daramdaman yu ngening caorasan
Ibalic cu ne pu quening cacung coyang
Cang Mr. Penaflor salamat nang dacal.
Contributed by Andro Camiling
O GLORIA
O Gloria, damdaman mu ing aclis na ning pusu cu
O Gloria, tingiran mu ing queca bengi't aldo
Adustan mu ining bie cu tayu rugu cacawa
Caniang lugud mu, o ligaya cu
Gloria, ipagcalam mu,
Ining queting labuad alang cabaldugan
Nung wari't ding lawe mu e mu cacu panabang
ing ligaya banua
Bayu cu sa camtan, yumu da ring labi mu yasang
pagnasan
Anguiang calulu ca anac na quing palgasa
Ticusan da man ding sabla itang quecang sarili
Caluca, ica mal cacu, miguit pa qng guintu
Nung tapat ya'ing lugud mu queca ya ing bie cu.
Contributed by Jun Pingul, Chicago, Il
BUNGANG BIABAS
Bala cu sa Bandi, caluguran mucu
Anti mo ring masetas tenam qng pusu mu
Aniang manaquit cang bungang sacdal queng yumu
Acung bungang biabas e mu ne sicasu
Narration:
"Aniang manaquit cang mansanas....ubas.... peras
Acalinguan mu ne ing biabas
Pero potang bisa cang magbulanglang
Aganaca mu ne ing biabas
E mu ne man abulanglang ing mansanas, eh
Uling macayaliwa ya lasa."
Nung quelinguan mu cu, nanu rugu-ing daptan
Quelinguan mu cu man, e cu pagsalbatan
Ing caluluncut na ning pusu't panamdam
Obat liguran me - saca me tebugan?
Courtesy of Bay Pingol of the Minalenians
MACAPAGAL
Tune: old Macapagal-for-president campaign song
Composer: unknown New Lyrics: Ernie Turla
Macapagal, ica ing tala
Saslag queti Kapampangan!
Macapagal ica'ing queng pusu
Da ring matua't cayanacan!
Macapagal, ica ing diwa
At taguimpan da ring malda,
Briliante cang taniag queng cabiasnan,
Ica'ing Gloria na ning Kapampangan!
Refrain:
Biba, Macapagal! Biba, Macapagal!
Biba, Macapagal! Biba, Macapagal!
Macapagal, ica ing daya
Na ning balen tamung tibuan!
Macapagal, ica ing sibul
Ning lugud at carangalan!
Macapagal, ica'ing pagasa
Na ning mabilug a bansa
Uliran ca, sugui ca at pantas
Ica'ing Gloria na ning Pilipinas!
Repeat refrain
Gloria Macapagal Arroyo,
Talasuyu ning gobierno!
Gloria Macapagal Arroyo,
Queng pasaldangan ding tao!
Gloria Macapagal Arroyo,
Nuan cang angel ibat Babo!
Atyu queng gulis palad at suerte
Qng icang tutuquing Presidente!
Repeat refrain twice
PAGMARAGUL QUE ING BALEN CU
Composition & Lyrics by Ernie Turla
Refrain:
Pagmaragul que ing balen cu
Ing mal cung balen a tibuan
Carin la mengabait deng
Bayani tang parangalan:
Anti mo ri Panday Pira,
Francisco Maniago,
Manalastas, Lacsamana,
Datu Bambalito!
Repeat refrain
Anti ri Padre Fajardo,
Aurelio Tolentino,
Yuson, Galura, Gallardo,
Crissostomo Sotto.
Repeat refrain
Anti ri Ninoy Aquino,
Jose Abad Santos,
Macapagal, Heneral Hizon,
At Cardinal Santos.
Repeat refrain
Pagmaragul que ing balen cu
At lubus queng pacamalan
Duyan de ring mangatapang
A bayaning mequilaban!
'Nia ing aldo ning bandera
Walu lang aslag na
Queng rebolucion abe la:
Tarlac at Pampanga!
MEQUENI QUENG SIPING CU
Mequeni queng siping cu
O cacung liguran
isitsit cu queca
Ing tune pacamal
Pisngi mung quisnang lagu
Catabas cang bulan
Mequeni tuqui ca quing hardin
Maglibang busal ding tanaman.
Refrain
Nung acu ing sampaga
Ica itang ambun
A didilig cacu
Balang gatpanapun
Iniang lacuan daca
Bigla cang migticum
Tanque mu mepanat
Tanque mu mepanat
Tanque mung melagas
Mebaldug qng gabun.
Folk song contributed by
Fely Bonifacio of Masantol, Pampanga
ING MANUC NANG PEDRO 
Tune: Basulto or Pulosa * Lyrics by Ernie Turla
Malutu ya palung ing manuc nang Pedro
Anti ya mong helmet masias a sumbrero
Buangis ya queng camua mabagsic ya tiru
Texas yang matapang pa quesa queng toru!
Queng bisyu ning cayang sugarul a amu
Queng apis, masahi, mesese yang ustu
Bayu ya mibulus mipractis ya pamu
Qng sucal Angeles caretang labuyu!
Niang prumeru neng lon ing cayang calaban
Agad neng detangan ning guiam queng bacbacan
Layun neng lepitan para atingiran
At caibat canita na ne segudsuran.
Ala neng sicasu queng pali na buntuc
Masias yang sagupa, lisic yang maniapuc
Sucdu-sucdu ya queng cayang pamanyigpo
Pablasang llamado, ya nang yang magbabo.
Ari ya mo wari caniting penandit
E me ayaguanta e bisang paigpit
Maticdi ya bicas, caya ngan ing mandu
Tatapang yang lacuas queng balang segundu!
Bulbul nang quiquintab magalsa qng tundun
Tanda ning sabic na queng pamaquisabung
Atras-abante ya queng pamamalabat
Catawan ning metung lalasa ya balat!
Queng lacas na't dagul e bisang cucurul
Alang patugut ing cayang pamanyapul
Masican yang dascul, dumali't mamomba
Aguiang durucal ne rungus queng lilyu na!
Anti yang ubingan sicsac queng camandag
Ustung tuctucan ne dacal ing mabalag
Agad talab iti queng cayang abihag
Manasaquit yang tal lumbag niang banayad.
Ing taring gaganu nang misna qng taram
Lalsut yang malalam neng tutud yang laman
At nung qng ebun ne iti atamacnan
Magus ya calaru't matda panimanman!
Caraniwan mu iti queng bie sabungero
Bista ma't mesambut e luncut y Pedro
Tatio agad ya ring myuman macasali
Para pamalipi o pagpintacasi!
ANIA MONG MALATI CATA
(with additional lyrics by Ernie Turla
Ania mong malati cata idad catang miquelangan
Carin queta lalam biabas carin cata mamialungan
Queng pamamialung tang aiti acalinguan tanang mengan
Berug na ca mong inang mu, quiniac ca quiniac cu naman
Seque ra ca mo iniang misan quetang sabac na ning luyus
Gugulait ca uling guguyud dacang matalustus
Mipaidpid cu at ica atabili mu ing cawat mu
Megasgas ca at mengalua tinyupan daca't inaru
Migbale-balayan cata, tata cu mo't ica-ing inda
Bali anac te mong duduyan pin, ing quecang manica
Oneng queng pangayuyu na, mebalag ya mo que lalam
Pinulut me mo't quinaul, quiniac ca't quiniac cu naman
Siniclod cata mong miagape qng altar quetang silid
Canuari mo ating paring maminditang macatulid
Bigla reng biclat ing pasbul ume ra na ca sang uman
Mepalmura catang ustu quiniac ca't quiniac cu naman
Caluat na na ne pero balamu ita napun pamu
Aguiang 'niang tinacas catang pusitara qng pangulu
Ing indredus canita micalat mabilug a baryu
Dapot ala nong agawa neng catlu ne-ing queng atian mu!
Y NINOY AQUINO
(as sung by Totoy Batu)
Y Ninoy Aquino iti picabaluan
Quecayu sabian cu ing binang maranun
Quetang milabasan minunang panaun
Ya pa ing mig-mayor balen ning Concepcion
At iti pablasang miqui pusung mayap
Ing panugali na panlub yang masampat
Quecayu sabian cu ing bie nang milabas
Yang vice gobernor balen na ning Tarlac
Macalunus-lunus ing bie nang Aquino
Quetang milabasan bulan ning Agosto
A beynti unu ya aldo yang Domingo
Ing quematayan nang Senador Aquino
Aniang paten de pu'ing maganacang tau
Aniang patipa ya quetang areplanu
Buclat yo ring T.V. pati na ring radio
Ing angang balita cang Ninoy Aquino
Aniang burul da ne'ing maganacang tau
Carin qng pisamban qng Sto. Domingo
Ing memaril caya pilit deng papalto
Itang Rolly Galman dininan deng casu
Aniang milabas na ing mapilan aldo
Queng pangamate ning maganacang tau
E pu calaraman ding caya dinalo
Para aquit dia mu'ing banque nang Aquino
Aniang aquit da ne banque nang Aquino
E no maibug tacbang bitis da ring tau
Aniang aquit dane anyo nang Aquino
Dios co ot macanian, berilan de -ing tau
Aniang lacad dane qng darechung dalan
Papunta na queting centrung Capampangan
Deng cayang cabalen selubungan de ngan
Lalabas a saquen ala nang midalan
Cabang lalacad de libutad ning dalan
Taung mamantabe pisasabian de ngan
At ngarang sasabe quetang cagulutan
Beril de'y Aquino, alang casalanan
Cabang tatacbang de libutad ning dalan
Macalunus-lunus ing cayang tigtigan
Bacas na ning lua yu, e yu camalayan
Bayan Pilipinas cayang panamdaman
Y Ninoy Aquino tutung picabaluan
Qng tune yang martir qng bie casaquitan
Deng 'gang Pilipino pasayangan de ngan
Qng pangamate na tau yang marangal
Aniang miras na ya queng cayang cutcutan
Balen ning Concepcion liguran nang lugal
Deng malugud caya, pupulai la ngan
Saca gugulisac libutad ning dalan
Ing gugulisac da at ngarang sasabi
Caganacang tao obat berilan de
Mequibat ya'ing metung at nganang sinabe
Pero bayani ya cayang pangamate
Malaguat salita at layun deng balic
Paquisabing mayap maganacang pari
Dasan nang pisamban layun patucnang de
Banque nang Aquino para pagmisa re
Cabang pagmisa re queti Capampangan
Tau qng Bulacan manenaya no man
Aslag na ning aldo at capalipalian
Angang sacripicio pibabatan da ngan
Aniang ilual dane carin qng pisamban
At layun linacad matulid a dalan
Aniang miras na ya parti ning Bulacan
Taung manenaya misara ya'ing dalan
Malaguang salita, lupang Capampangan,
Aniang yatad da ne queng cayang cutcutan
Deng ngang estudiante alang memagaral
Miabe-abe la ngan cayang cagulutan
Aniang malapit ne queng cayang cutcutan
Taung mamantabe maluncut no datang
Dugu reng buntuc da yatna re ing canuan
Ing lua rang mamagus tutuntun qng dalan
Aniang ilub da ne quetang cutcutan na
Taung mamantabe memanangis nala
At nga rang sasabi quetang cabilian na
Ninoy, bayani ca - "'Di ka nagiisa!"
Contributed by Candy Ramirez & Cris Yumul of
Concepcion, Tarlac
DENG BALEN A KAPAMPANGAN
(tune: "Macalunus-lunus")
lyrics by Ernie C. Turla
(dedicated to Dr. Evangelina Hilario Lacson who visited
the Aguman Capampangan N.W., U.S.A.
(Nov. 21-28, 2000) in Portland, Oregon, and established
the Akademyang Kapampangan U.S.A. (AKUSA) there
and proclaimed it as a pilot club in the USA for AKKAP.)
Maluat ta nong buring / myuman apasialan
Deng anggang sacup ning / labuad Capampangan
Ania ngeni-ngeni / ing quecatang gawan
Saque La Mallorca / libutan tala ngan.
Magumpisa tamu / qng balen ning Sexmoan
Carin qng paroba, / busal ning cailugan
Carin la macucua / reng dacal a asan
Picabaluan yaiti / careng cayang plasdan.
Dalaquit tang aduang / ilug qng albugan
Ing balen ning Lubao / ya'ing quecatang dasnan
Quen ne mang atbu'iti / at palayan dacal
Carin ya misapuac / Dadong Macapagal.
Magpasulung tamu / banda paralaya
Ing dasnan tang balen / ing masayang Guagua
Carin ya tubu ing / prumerung cardinal
Y Rufino Santos / obispung marangal.
Artistang Rogelio / idolo ring malda
At Gloria Arroyo - anac no ning Baba;
Yuzon, Tolentino - poetang balita
At Senador Puyat - tubu la ngan Wawa.
Calagpas ta Betis / miras ta Bacolor
Balen de reng watas / a matas a balor
Crisostomo Soto / at Felix Galura
Ila ring taniag nang / poetang macudta.
Ing Baculud ya ing / Athens ning Pampanga
Ing minunang diling / "trade school" carin ya
Meguing capital ne / ning quecatang bansa
Iniang simsam de reng / British ing Menila.
Ing tutuquing balen / ya ing San Fernando
Ya ing capital na / ning probincia tamu
Meguing capital nia / namang Aguinaldu
Caibat ning Malolos - bigsac ding 'Mercanu.
Ciudad San Fernando / sicat ya neng Pascu
Uling deng parul nang / pasigla queng yatu
At ustung Maleldo / ya ing cabalitan
Careng papapacu / queng curus mu naman.
Balian ne ning martir / Jose Abad Santus
Lugud na queng bansa / daya na minagus
Balian ne ning central - ya ing Pasudeco
Gagawang asucal / neng aldo cacabio.
Magbanda tang wanan / banda qng aslagan
Balen Santo Tomas / quecatang labasnan
Dasnan yang Apalit / carin ya'ing Sulipan
Ya ing cucina ning / lutung Kapampangan.
Magpabalag tamu / banda qng mauli
Miras ta Masantol / at qng Macabebe
Pugad do reng dacal / diling beteranu
Na ning America - detang pensionadu.
Lahi lang matapang / matun queng labanan
Ilang pengara ra / ri Raha Soliman
At careng Castila / macanian mu naman
Pequiguera rala / isla cabilugan.
Magbalic ta ngeni / papunta qng babo:
Minalin, San Simon / San Luis at Mexico
Iti lugal de ri / Luis Taruc at Hizon
Metung a heneral / na ning rebolucion.
Caibat ing Sta. Ana / cambe ning Arayat
Calele ning bunduc / taniag queng alamat
Catalindiquingan / ya pin ing Candaba
Balian nang Gallardo / sicat a poeta.
Ngeni lundag tamung / marayung-marayu
Dane ning Zambales / Bunduc Pinatubu
Baryu Sta. Cruz / lunsut ta Florida
E la micanlaut / balen Sta. Rita.
Carin ya ing Basa / papunta qng Porac
Sumulung tang maluat / at miras ta qng Clark
Air Base ne canita / bansang America
Dapot ngeni naman / "economic zone" ya.
Sulapo tang norte / ing Tarlac yang dasnan
Peca pangulu ning / labuad Kapampangan
Carin ya ing taniag / Hacienda Luisita
Anti murin ing park / nang Maria Cristina.
Magpabalag tamung / patililis canu
Miras ta Concepcion / balen nang Aquino
Lumipat tang ilug / miras ta Magalang
Sale ring poeta / ning Amanung Sisuan.
Mabandang albugan / dasnan taya'ing Capas
Carin ya'ing O'Donnel / anganan ning "Death March"
Calagpas ta Bamban / mauli papunta
Dau, Mabalacat / pasbul ning Pampanga.
At ing Angeles yang / layun tamung dasnan
Ciudad a maragul / centru ning cabiasnan
Sandalan ding pantas / pugad ning casayan,
Taguimpan ne ngeni / ning balen tang tibuan!
Carin la reng taniag / a unibersidad
Na ning quecatamung / probinciang macamal
Carin qng A.U.F. / migpropesora ya
Ing quecata ngeni / a dalo pandangal!
Doctor Evangelina / Hilario-Lacson
Sasaludu que pu / queng quecong arapan
Ico ing magdala / queng maslag nang sulu
Ning pagmaragul tang / sabing Kapampangan.
Y Dr. Lacson ya'ing / pecamatas diling
Autoridad na ning / amanu tang sisuan
Maldang maquiramdam / ana ticdo ta ngan
Pasaganan tayang / matning palacpacan!
(Note: an apostrophe between two vowels indicate a diphthong
- meaning, they are pronounced as one syllable.)
CANIAMAN NA'T CASAQUIT NA NING MALSINTA
Words and Music by Victor Bonifacio
Atin cung pilsintan a Capampangan
Atne pu calagu queng piarapan
Oneng ing saquit na, dacal ya pu beluan
Ining sintingan cu, e sapat qng leguan.
Guewa cu ing sablang dapat gawan
Quening dalagang cacung pilsintan
Carug na ning salu, pilit yang daratang
Queng panlalawe cu buri nacu naman.
Refrain:
Ay ay ayayay, ay ay ayayay
Ay ay ayayay, caniaman na't casaquit na
ning malsinta!
Lecasan cu-ing lub cu at memanican
Qng bale ning cacung apalsintan
Lawen-lawen quia mu, at suglap-suglapan
Mipapasno ne pu ining paquiramdam.
Miras na ing oras at lacuan cu ne
Ing dalagang cacung apalsintan
A-isip-isip cu at balac-balacan
Aguiang ditac mu man ala cung simbitlan.
Repeat refrain
(Victor Bonifacio is the new music director
of the Aguman Capampangan Northwest USA.)
HIMNO NING KAPAMPANGAN
Kapampangan misapwak,
King legwan na ning alaya
Gabun ding pantas at marangal
Sibul ning lugud at ning tepangan
Batis ning katalarwan
At panamdam makabalen.
Ligaya mi ing mye payapa
King malugud mung kandungan.
Refrain
Kapampangan, sale ning legwan
Ika ing sandalan ning catimawan
Kilub ning pusu mi
Atin kang dambana
Lwid ka, lwid ka
Palsintan ming Kapampangan!
Lwid ka, lwid ka
Palsintan ming Kapampangan!
Repeat refrain
ARIA PILAR (ING ANAC NING KATIPUNAN)
(from the CD package, Ing Pamalsinta
Quetang Milabas/Alang Dios)
Ay! Guinu cung Dios
Malunus naca quening dusa,
Birhen Santa maliquid ca
Qng bili ning mengulila.
Balicdan me ining banque
Macalangan quening dase,
Tulutan mung micutcut ne
Macalunus ya panasque.
Dapot macanian man
E na amusingan
Ining capurian capilan man
Qng capilan man
Iti susumpa cu
Qng bigung banque mu
Pacam....
For the next page, just click:
http://maxpages.com/kapampangan/folksongs4
For some Kapampangan Christmas carols, click:
http://maxpages.com/pasko/pasko2
|
|