Home
Philippines
 folksongs7
folksongs8
folksongs9
folksongs10
songs11
Philippines
folksongs2
folksongs3
folksongs4
folksongs5
folksongs6
|
|
|
|
 |
| Compiled by ERNIE TURLA, founder, KAPAMPANGAN CULTURAL HERITAGE SOCIETY, U.S.A. |
Table Of Contents: 
1. Salawayan
2. Ana Casaquit, Coyang Eddie
3. Aral
4. Macalunus-lunus
5. O Suguing Jose Abad Santos
6. Aguman Capampangan Medley
7. Aids Doesn't Matter At All
8. Ako Ay Nagtanim
9. O Atsi Cung Cai
10. Himno Fernandino
11. Ing Lugud Ning Indu
12. Anguiang Lagyu Cu Mu Man
13. O Caca, O Caca (medley)
14. Ing Awac
15. Selosa Rikiti-kiting
16. The Betamax Song
17. Casaquit Na Pala
SALAWAYAN 
Tune: Adios Muchachos Companeros (I Get Ideas)
Lalam ning maslag a bulan aniang sumpa ca
Sicsian da retang mabanglung rosa
Ngamu qng e ca magtacsil cabang mabie ca
Macanian cang sinumpa qng banal a sinta
At caibat mung sinumpang cabanalbanalan
Memun cu queca ban manintunan.
Balang iquit cung mangasanting a imalan
Piniali raca ba mung saganan.
Dapot dugu ing calma iniang balican daca
Belita ra canacu mequiasawa naca
Linasun me-ing pusu cu, pati na ing caladua
Ing sumpa mu cacu macanian mu pala
Nanan cu pa-ing bie cu, pete mu-ing paintungulan
Dios co, cuanan mu nacu anting camatayan
Maniaman pa canacu ing capainawan
Mamun nacu queca, salawayan!
Courtesy of Delfin T. Quiboloy, poet laureate
ANA CASAQUIT, KOYANG EDDIE
(as sung by Totoy Bato)
Ati na cu queni ing obra pibabatan cu
Mapali nang ciudad ning bansa ring Arabiano
Masaquit talaga ing manintun cang pera
Cacapal naca palad, maduduluc ca pa balat
Queng cacung panudtud, agad cung aisip
Milis na sa ing aldo ba cung agad macabalic
Ticnangan cu ing bisyu, alac, sugal at cigarillo
Ba cung macatipun, cailangan pibabatan cu
Ana casaquit, Coyang Eddie, ing miliari queng bie cu
Ana casaquit, Coyang Eddie, sabian mu nung nanu ing gawan cu
Asna cung catula sinulat ya ing cacung anac
Agad cung mebigla, tinulu ing cacung lua
Tatang muli naca, maligua muna sana
Ima cu melocu ya mumulangan naca, Tata
Agad cung minuli, bengi na aniang datang cu
Deng adua cung anac era nacu asicasu
Mata rang malutu, alus macapiac nala
Queng carelang gamat, tatalan lang marijuana
Atin pang masaquit, bigla cung migtaca
Deng adua cung anac obat ngeni atlu nala
Ing cacung asawa mequipag-lalaqui ya
Atin pang masaquit, dela ro ring cacung pera.
Ana casaquit, Coyang Eddie, ing miliari queng bie cu
Ana casaquit, Coyang Eddie, sabian mu nung nanu ing gawan cu
ARAL
(as sung by Totoy Bato)
Quecayu ating iparamdan, iti metung ya mung aral
Lalung-lalu na quecong magaral
Icami namang pengari lubus ing capanintunan
Aguiang manutang caming 5-6 era co patucnang
Yan sana anac dapat yung isipan
Bili qng buntuc quecong pamagaral
Malunus co sana careng pengari yung mangasaquitan
Aguiang rugung manutang lang tacalanan
E ra co buring tucnang pang magaral
Yan sana anac quecayung isipan ing casaquitan
Queta naman pu quecami
Atin cung casiping bale
Atin yang anac papagaral neng masalese
Aguiang rugung manutang ya iti
E ne buring tucnang queng clasi
Oneng caya rugu miliari, ala suerti
Misan a yaldo ing cayang tatang
Munta ya sana queng cayang pipagobran
Aquit ne ing anac nang papagaral
Careng "beer house" naman
Iti agad-agad neng pepaulian
Ing ca-"table" na tinuqui ya naman
Caras na bale ing cayang inang
Meyataqui ne man!
Oyan ing cacung paquisabe
Lalu na quecong anac ngene
Aguiang atin ya pang gatas labi
Malsinta ne
Ania sana anac dapat yung isipan
Ibili qng buntuc quecong pamagaral
Nung sacali ing mabiasa co man
Icong maquinabang
Ania sana anac dapat yung isipan
Payarian yu pang quecong pamagaral
Bayu co magbili queng bague a yan
Cataimican!
(Contributed by Frida Alejandrino, a schoolteacher
from Magalang, Pampanga.)
MACALUNUS-LUNUS
Basulto as sung by Totoy Bato
Macalunus-lunus ing bie rang delanan
Qng bagyu at uran, albug a malalam
Alus patingapun misan la mu mangan
Pauli na nitang uran e tutucnang
Uli na pu niti e pu calaraman
Ding tau qng baryu atilu qng dalan
Mipapagcuentu la ampong mipangutang
Nung nanu pin caya'ing masanting dang gawan
Qng pamisabi ra atin lang belacan
Mipapanagcat lang munta qng dasyunan
Manintun la sanang sucat dang apangan
Oneng asmung bilis danum qng Mangcatian
Aguiang asmung bilis danum a daralan
Ela micacunu carelang biltangan
Pigpilitan da pin, banca ra pintalan
Ban potang muli la atin lang daralan
Qng lugud na naman nitang mayupaya
Disyunan dong abias deng angang maluca
Tungalan lang pati, tuyu at tinapa
Agad dang pisanan, linipat qng sapa
Malagua't salita agad nia ping miras
Ita nang pengari careng cayang anac
Patau cong api e ta na papaluat
Ban deng capatad yu tucnang no ping quiquiac
Sinigpo yang matas itang inutus na
Macatiman ya pa cabang tatamban na
Saca ya bubulangus nanung sasabian na
Salamat pu Dios co, malutu na sana
Cabang tatamban na ing nasi queng calang
Deng apat nang wali macatanud langan
Nganing bungsung dile cuanan yo reng pingan
Ba ta nang asanduc 'guiang e pa menangnang
Aniang malutu na ita nang pamangan
Quinid da't inapag babo na ning dulang
Mipamulala cu cabilis dang mengan
Anti lang misabung manuc a balulang
Aniang cumabsi la at yari nong mengan
Lawen deng calderu ala ne pung laman
E ra ne guenaca ibpa rang ibatan
Ni aguiang ditac mu e pa mitaganan
Mipapanuldu la ampong mipaniancan
Nung ninu carela ing matalic mengan
Itang Mr.Mailu atyu cagulutan
Daramdaman na ngan itang pisasabian
Layun nong lepitan at ayan nong tiquian
Ninu man quecayu alang casalanan
Nung e la sa mete apalia tang tenam
Maniaman ta sa bie e ta sa macanian
Dapot macanian man quecata miliari
E co paisira lub, tanam tang patalugui
Nung lugud ya ing Dios acua tang misuerti
Acua nang magbalic nitang pangalugui
Canita mebaldug ing lua caring mata
Ing calunus-lunus ayatangalan da
Gulpi cung guinulut maco na cu sana
Quetang casaquitan e cu na abata
Pututan cu ne pa ing cacung istoria
Deti pung daramdam pota manangis la
Ining Mr. Condring tine mangabara
Pota malaus yang mapatad a inawa!
O SUGUING JOSE ABAD SANTOS 
Composer and Writer: Unknown
Additional Lyrics: Ernie Turla
O suguing Jose Abad Santos,
Pepacamal queng Pilipinas
Pepaquit mu ing tepangan
Tamu careng dayuhan.
Ica ing pepaquilala
Tune pamalsinta
Qng indung bansa.
Uliran ca caring sabla!
Nung anti ca careng cabalen tang aliwa,
Mequianib, migsamantala
Aligtas mu sang mayan ing quecang bie
Pero pinili mu-ing mate!
Abad Santos! Abad Santos! Abad Santos!
(The above song is dedicated to the greatest Filipino
martyr of this century, Jose Abad Santos - a man for all
seasons.)
AGUMAN CAPAMPANGAN MEDLEY
Arranged with additional lyrics by Ben Susi of Lubao
O ine ing quecang paintunan
Magnayun ca banda qng dayatan
Dasnan mu mismu qng calinan
Ding dalagang buquid a tutung cabalitan
Paca panyu lang balintawac
Ban e milugue ing carelang buac
Ing tapis da baliwag, paca suecus lang lalacad
Sibul ning Arayat crin ca mandilu
Iquit daca rugu mamarung malutu
Mamarung malutu, qng malino danum
Aplit cang tatabu, cabang acu naman
Cacarug cu salu.
Sasabian da apu, retang mamalita
Nung lumbug ne-in aldo, ala nang masala
Anta retang batwin ampon retang tala
E no wari sunlag queti munie sala
Dalumdum ning bengi iniang aquit daca
Papatac ing uran, banua matuling ya
Detang sablang batwin pesisalicut la
Ing sala ning quildap yang meguing sulu ta
Masala ya-ing bulan, pigqueran cung dicut
Carin ya linabas babaing malicut
Tutung mapangimut, simsam ne-ing pusu cu
E na cu miquimut.
AIDS DOESN'T MATTER AT ALL
Sung by Fred Panopio * Kapampangan version: Ernie Turla
Palsintan co, sabi ra malubac ca
Babai cang mababa sulagpo
Manuala ca sinopla co't inisnab
Queng uli mu, "I've been so madly in love"
Bilgar daca ania pin mebating cu
Ica canu pampam ca Olongapo
Pematacutan dacu queng saquit mu
Saquit a "aids" ibat careng 'mericanu
Refrain:
Porny, my love, you are still pure
Whoever you are, i don't mind at all
Because i love you, I just ignore
Don't worry aids doesn't matter at all.
Mig-hostess ca canu qng Angeles
At careng bar tinerac cang "topless"
Queyaltonan ca queng "boyfriend" mung 'Canu
Ing beit mu mestiso yang mulatu
Repeat refrain
Ing sabi ra puta cang patacal
Pepacasta ca canu careng dacal
Deng tinacman queca e mu no abilang
At ing ablas mica "aids" ca catawan
Repeat refrain
Pag indredus daca ngan deng tau
Mica pasari canu-ing landi mu
Aguiang malgarit ca e cu sicasu
At ing "aids" mu alang cuenta canacu.
Second refrain:
Ica ing bucud sinta cu
Ninu man ica, e bali cacu
Uling tutung caluguran daca
Ing "aids" mu bali alang cuenta cacu
Repeat refrain.
AKO AY NAGTANIM
(translated into Kapampangan by Ernie Turla)
Misan tinanam cung
Capirasung laya
Tinubu gandus ya
Memunga yang manga
Iniang sunquitan que
Malulut capaya
Digpa ya queng gabun
Malagung dalaga!
Burianan mu naco?
E cu bisa queca
Uling ica pala
Maracal ca nobia
Ating pag-aldoldo,
Ating pag-Domingo,
Atin pang pamiesta,
Atin pang pamascu!
O ATSI CUNG CAI
O atsi cung cai, mumuquiat qng cai
Mandala yang cai, lulanan nang cai
Pangaras na cai, mebaldug ya cai
Calulu ya-y cai, ala neng cacai
O atsi cung cai, mumuquiat qng cai
Mandala yang cai, lulanan neng cai
Pangaras na cai, mebaldug ya cai
Calulu ya-y cai, ala neng cacai
Calulu ya-y cai, ala neng cacai
(Contributed by Monico Pingul Jr. of Angeles)
HIMNO FERNANDINO
(Official hymn of the City of San Fernando)
Composed by Meynardo Lansangan
Written by Gernonimo del Rosario
1. San Fernando, balen cung tibuan
Dai cang mal, niting Capampangan
Mangatatag, biasa't matenacan
Kapanayan at sulu ning tagimpan.
2. Gintung butil ning berding dayatan
Ilang tanda ning licas mung yaman
Ding batwin mung keca mipamisan
Ilang kecang cawil at sandalan.
3. CORO:
Balen cung tibuan, San Fernando
Sale ning Capampangan, Ica ing bucud macasiduan
King salu cu maingat pecasimpan
Luid ca balen cung tune palsintan
4. (Inst. TONO l)
Fernandino, Lahi cang marangal
Dayang pantas ning liping aslagan
Mapuri ca at tune uliran
Sandigan at duyan king calayan.
5. (Ulitan CORO)
TALETE
Dangalan cu king uli mu
Ing mate cung Fernandino.
(Contributed by Dan del Rosario of Mabalacat, Pampanga.
Mr. del Rosario is information systems manager of the city of Portland)
ING LUGUD NING INDU
Alang cayanganan ing lugud ning indu
queca o penganac supling a tinubu
Anti ca mong sibul a malati tulu
a malino danum maniaman a tutu
Ica o penganac sucat mung ganacan
cabuctut naca pa tatanca na na ngan
Itang sablang bague a quecang cailangan
bang qng cabait mu e ca wasang-wasang
Atyu ca pa quilub atian nang indu mu
dacal nang pasaquit ing caya binie mu
Menganib yang mate qng pangabait mu
pauli ning saquit a e mu magcanu
Anac cang pasusuan e ditac a puyat
ing pibabata na uli ning quecang quiac
Aguiang mamangan ya bigla yang talacad
lalu't nung aquit na taca mamagdinat
Aniang malati ca quenu ca sinusu
at quenu la tacde reng quinandung queca
Ninu ing minuma mingatbang pisngi mu
ala't e aliwa nung e mu y indu mu
Potang masaquit ca tana ca mo quiquiac
ninu ing mumuna a queca lilingap
Ninu ing tatangis nung e ca cacayap
bucud nang indu mo tatangis magsalbat
Ibpa at indu mo tutung picabaluan
ing tutu lang martir qng capibabatan
Mayumung lugud da mayumung taguimpan
dapot ing ablas mu mapait nung misan
Potang matua nacang maina na catawan
carening tacde cu ica ing candungan
Ba cung macayablas queng quecang depatan
Indu, mal canaco queti qng sicluban
Datang ing panaun nung mirate na ca
acu ing tumanud queng siping mung cama
Acu ing mibata aguiang nanu pa'ita
anga qng cutcutan Indo yatad daca
Cacutcut mu Indo yacu muli na cu
layun cong lingunan detang capatad cu
Uling yacu na mu ing matuang licuan mu
ala na, ala na, o rugu, Indu co
Casaquit na Indo ning mamangulila
licuan mong anac mu queti qng masala
Nung aquit mu la mu quening cabilian da
atilu qng cubo mipapanangis la.
Contributed by Monico Pingul Jr. of Angeles
ANGUIANG LAGYU CU MU MAN
Ining album cung malda
ining pusu cung qui-quiacan
Buclatan me e ca magsilbat
catunculan, mu iti o Irang
Nung queca yang quelinguan
itang bie tang miralan
Lalam ning masalang bulan
cacu sinumpa ca Irang
Nung wari't quelinguan mu na
queca salamat sinta
Qng anguia mang migtacsil ca
pagnasan cung miuman ca pa
Dalagang quiquiacan cu
nanung depat mu cacu
Pigtacsilan me ing pusu cu
E na ca melunus cacu
Mamen cung catataulian
Ing bilin cu mu Irang
E me sana cacalinguan
anguiang ing lagyu cu mu man
(Repeat last 2 stanzas)
Contributed by Engr. Monico Pingul of Angeles
O CACA, O CACA
1. O cacang doncella
Maniaman a nasi
Nanu lang ulam mu
Pacsi lang cabasi
Sumubu yang wanan
Candut ya ing caili
Langut la reng ipan
Malating malati
2. Sasabian da Apu
Retang memalita
Nung lumbug yang aldo
Ala nang masala
Anta retang batwin
Ampo retang tala
E mo buring sunglad
Queti qng masala
3. Carin pu quecami
Balayan San Roque
Ating mitutula
Apat lang pulubi
Teterac ya'ing lumpu
Magcanta ya'ing pipi
Manalbe ya'ing bulag
Maquiramdam ya'ing maclac
4. O caca, o caca
San Fernando't Wawa
Betis at Baculud
Sacup ning Menila
Queta pu quecami
Dacal lang baluga
Malati't maragul
Biasa lang mamana
5. O cacang doncella
Panatulan daca
Pabusbus cang fuentes
Saca ca papurga
Nung lugud ya'ing Dios
Micacatawan ca
Manganac cang doctor
Magpari ya Roma
Nung sacasacali
E ca pa cumayap
Dinan dana camang
Mayumung dalayap
Atdung e mapait
Larang e maparas
Saca mu daldacan
Queng asung a biria
6. O 'yapu, o 'yapu
Cucutud cang cuayan
Mipalantican ca
Queng dangwe mituran
Alimbawa 'yapu
Sampagang tanaman
Tengaran ning aldo
Bigbugan ning uran
Contributed by Eleuterio Aguas of Sta. Ana, Pampanga.
Mr. Aguas says, "I learned these songs from my
grandparents, off and on, from l929 to l932."
ING AWAC
(The Raven)
by Ernie Turla
(This poem may be sung to the tune of a
basulto or polosa.)
Misan a cabengian / Misna qng lisangan
Bisni co reng awang / Ba cung mianginan
Ume na cu sanang / Magquera, matudtud
Iniang itang awac / Linub nia mu cabud
Misdan cung masolu / Quinarug cu salu
Pablasanang uling / Ya bulbul queng tuling
Babie yang quilabut / Anti ya mong punsu
Matilus ya tuctuc / Malucung ya cucu
Queng babo nang bultu / Andres Bonifacio
Carin ya migtronu / Cambe ra reng libru
Atatandanan cu / Bulan na ning Marzo
'Niang y Cesar Julio / E na mo sicasu
Dapot veinte uno / Yapa ing Febrero
Mig-valentine pamu / Canitang Sabado
'Nia ngacu queng lub co / Iti e milagro
At e supersticio / Pamaintagun mu
Agad queng aisip / Y Edgar Allan Poe
A liban nanaman / Niting susulagpo
Agpang queng cuento na / Pequibat na caya
Nitang awac aita / "Milalu, astuna"
Layun queng lepitan / "Pasing-tabi" ngaco
"Obat quian na ca mo? / E na ca sulapo?"
Mengapaquirut cu / Ing pequibat na mu
"Wacwac", ngana caco / Mengasdan na cu mu
Sabi ra reng matua / Ban e ca manunu
Ing e ca tutuldu / Careng e mu balu
Tinulu cu pawas / Biglang meliswas cu
Queng pangatacut cu / Matuling a multu
Dinimla cu quilub / Guinalgal cu intud
At alang patugut / Ing cacung quilabut
Queng arap nang Cristo / Tinguen queng rosario
"Exorcist" cu ngaco / Tabi que'ing demonio
Dapot ala murin / "Dios co, saupan yu cu!"
Lidlad que'ing ulas cu / At migculubut cu
Indat balang oras / Migwacwac ya'ing awac
Anga na niang miras / Ing sala ning abac
Dapot catali cu / Mipamulala cu
Ing catacutan cu / Biglang ala na yu
Neng queng camung baryu / At ala cang diaryu
Ala cang balita / Nung atin mang gulu
Apat nang domingo / A e cu magradio
Quebit co reng bayu / Bateriang seli cu
Minta cu queng mula / Ban maginbestiga
Bala cu mo sana / Ligtas nang talaga
Neng 'niang talanga cu / Iquit queng masolu
Quetang sanga na ning / Matuang pataclodyu
Quinarug cu salu / At mengilabut cu
Nanu caya rugu / Babie nang anunsyu
Diclut que ing radio / Inon queng matodu
Ing queng poder canu / Ya pin na'y Aquino!
People's Power canu / Anti ya mong bagyu
Bigsac ne y Marcos / At cayang gobiernu
Carin Honolulu / In-"exile" de canu
Ngeni mipaltutu / Upaya ring tau
Ing binie nang signu / Ning awac a multu
E pala matsura / Salamat na Dios co
Queng dalan linual cu / Pecagulait cu
Mayap a balita / Mabilug a yatu
Pesipalual la ngan / taung mecaramdam
Migpiesta carela / quinatmu ya'ing dalan
Buri queng cumbiran / Sa'ing awac pacanan
Ba ming pagmasusian / Iting caranasan
Dapot niang batyon que / Sulasulapo ne
At 'niang magbaybay cu / Quinindat ya cacu
SELOSA RIKITI-KITING
(Composed by the guitarist of Totoy Batu)
Nung papamilinan dacu
Queng cacung maguiguing darling
Ing buri cu itang e selosa
Aguiang mang e ya malagu
Queng selosa maralas ing gulu
Ciento por ciento ing saquit buntuc
Ing buri cu, e ya selosa
Oita ing buri cung nobia.
Nung acu naman ing mamili
Babaing maguing nobia
Buri cu pin itang selosa
Aguiang mang e ya malagu
Ing pamagselos, pamalsinta
Yng sabi ning cacung inda
Nung selosa ya'ing cacung hirang
Macahanda cu cayang pacasal.
Refrain:
Rikiti-kiting, rikiti-kiting
Capad que ing pane malambing
Rikiti-kiting, rikiti-kiting
Ing lawe na sana pane canacu
Rikiti-kiting, rikiti-kiting
Ing buri cu ing cacung hirang
Ing lawe na sana pane mung pane canacu.
Narration:
Martina, (oy)
Luguran mu cu mu,
ibie cu ing angang buri mu (aa?)
Nung buri mu television,
sali racang adua (aa?)
Nung buri mu coche,
sali raca, atlu (aa?)
Nung buri mu bale,
pagawa racang apat (totoo?)
Sing a guintu, relo, punseras,
Nung bisa na cang maco,
mabating na ca (ot baquit naman?)
Masiadu cang magastus!
Rikiti-kiting, rikiti-kiting
Nung macanian ca capalsinta
Rikiti-kiting, rikiti-kiting
Ay e maliari canacu ita
Rikiti-kiting, rikiti-kiting
Ing buri cu pin malambing
Dapot aliwa itang malambing
Canacu, uli ning bulsa cu.
Contributed by Frank Robles of Masantol, Pampanga
BETAMAX SONG
(as sung by Totoy Batu)
Neng maluncut ya y Ating cu, uling ala yu y Coya cu
Agud-aguran neing bacal na, mangatal ne siguru
At nung bigla ne mang datang, Agad na ne mong saganan
Atme tula, papacpac ya, bisa ya palang mituran
Nung gulpi ne mang salacban, ala yang gulat ditac man
Ya palang panenayan na, ing bandi nang tulisan
Qng capipildis-pildis na, qng wrong number ya misumpal
Bala na ning lalaqui, tiran ne original
Uli na nitang mau ya, e na ne linawe man
Nung nanu yang clasing busbus ing cayang tiran
Ambuc ambucan me ing pusad na
Paquiambuc me ing singit na
Nung nanu ya iti lasa, cacu Ito, sabian mu na
Ba cu namang apupulut ing quecang apiusu
O Coyang, sabian mu na canaco.
CASAQUIT NA PALA
(a Kapampangan folk song)
Casaquit na pala ning meyalang calma
Ing pisumpanan ta guilutan mung bigla
Pusu cu licuan me sugat na daraya
Nung apigunam ku ing caluncutan cu parating mamapa.
Anta yu nucarin cacu pengacu mu
Macatiman ca pa canacu tinangu
Linlangan miya pala ing malsintang pusu
Caibat meng liguran, pisaquit meng pete
Cambe nang mebigu.
Macanian man Irang e cu mamarsala
Ing bilin cu queca tandanan mu sana
Luguran meng maiguit, 'ting lugud cu queca
Ligaya ca sana babo nang candungan ning bayu mung sinta.
Stay tuned for more Kapampangan songs! Go to Volume 3 by clicking:
http://maxpages.com/kapampangan/folksongs3
|
|