 |
 |
 |
 |
 |
 |
 |
 |
 |
 |
|
Philippines
folksong7folksongs8folksongs9Philippinesfolksongs2folksongs3folksongs4folksongs5folksongs6|
|
| KAPAMPANGAN FOLK SONGS |
 |
| compiled by ERNIE C. TURLA, president, Akademya ning Kapampangan International |
| ||||||
| Table of Contents: 1. Um...m Uma Mu 2. Magkanta Tamu Pu (basultu) 3. Mamulosa Tamu Pu 4. Mamulosa Tamu 5. Mamulosa King Hawaii 6. Pulosa ning Kobung-kobung 7. Aniang Malati Cu 8. Ing Manabuang a Lango 9. Kalgaretang Kambing 10. Paritak0ditak 11. Atut 12. Ligaya 13. Kakagli 14. Tagulele nang Atching Liling 15. Poesiang Makuyad 16. Macuyad 17. Dakal a Patayan 18. Pasi 19. Pasi 20. Pasing Malati 21. Tema 22. Paninap 23. Makiki-abwang Lango 24. Paquibat Qng Manabuang Lango 25. Maki-abwang Lango 26. Ing Lango Me-abuang 27. Ing Suldut 28. Ing Mequinis Suldut 29. Ing Yamuc 30. Atin Cu Pung Singsing (with English translation) UM...M UMA MU Tune: Kiss Me Quick Lyrics: Victor Bonifacio BOYS I. Um...m Uma Mu Macalaco pagal Balu mu ini sintang hirang Balang abac panintunan cu Ing uma’t caul mu cacu Ena sa magbayu-ing lugud mu II. Um...m misan aldo Ating cang acalinguan Uma mu e que icuang ticman Menasaquit ya ing pusu cu Qng umang acalinguan mu Miglipo-lipo ya-ing isip cu Chorus Nanu caya ing pamagculang At agawa cung casalanan Obat bigla mung acalinguan Umang pacamalan GIRLS I. Um...uma cu Qng menga-nga labasan Nung surian, mu’t pacatingiran Aduam pulung banuang milabas Ing lugud cu e mebawas E na ka mimisip bandi co II. Um...m uma cu Nung yang panintunan mu Gawan ta quilub na ning cuartu E ca mimisip lacuan mucu Sablang buri mu ibie cu E ca sa sasawa canacu Chorus E cu na dapat sabian queca Lugud at pacamal queca Labing nong atlu ding anac ta Culang lapa reta The following are Pulosas and Basultos: "MAGKANTA TAMU PU" neng Paing Makarine yata neng mapag naku man, Kabang ding aliwa ela pa miralan; Sige, bahala na kaku nang kapalan, Ini nang lupa ku basta Kapampangan! Makisulu ku pa king kekayug dulang, At makisiping ku Kampeon Kapampangan! Ba na kung lalu pang mabiasa keraklan, Galing nang Atching Tec bakung miyabuban! King kalat ning tuyu obat ne kanyaman. Aliwa ya lasa ketang amun naman; Potang misubu ya misamutang aslam, Ala yang kaparis king keang linamnam! Anya naman pala ing matikding Kang Mar, Neng mamulosa ya masikan ya andar Ganadu yang mengan king tuyung manangnang, Balu ku ne "secret" ning kayang gelingan. Ali mo?, balu ku atin nang kakayat, King labi na mismu ing wawa mangislap; I Kakang Renato tatanud makarap, King dulang ning watas ding bersung maninap! Gumato ta na pin king bigang maputi, Potang bilyanan no kwerdas ning kudyapi; Balang akalbit na, lantik ding taliri, Pagtumayla naka diwang makawili. Misaglulu ta pu kaniting pulosa, Makisulu ta na king dulang a mana; Karing nunu tamu keta pang minuna, Ing AMANUNG SISUAN pane tayang dala! MAMULOSA TAMU PU Kadwa nang agpang Ning Biseru E ku pu abatang e na magpang myuman Pablasang manyaman ining pisasabyan Panupaya yu pu't e apalabasnan Suglungan ke'ing kanta tamung pisusuluan Ining Mang Renato ikwa nang kinabsi King lepirut tuyu at mapaling nasi Nining Mamang Paing matindi taliri E mu pamangulis pati pamangati Lawen yu ikit ne ing kakung sikretu Buri kung kakanan neng ati ku kubu Metung nang gelingan keyang pamamistu Kabud linele ya't sinigi 'gyang kenu Anya kapatad Tec mimingat ka wali Ustung I Mang Paing linapit yang dili Antabayanan mu potang bandang tauli Gilis nang larawan ning lupa mu mayli Ining Mang Renato asaglawe na la Miyaliwang bage gamit king hacienda Ating dangwe kwayan gamit king asikan Batung piyangusan gamit king sakulan Iyang dangwe kwayan agyang dikut ya mu Marakal ya gamit kareng ortelanu Malyaring panagle apalya at opu Malyaring pamakud panyaplit biseru At nung bangalan me at saka pukpukan Malyaring ilubid bilang piguyuran Karetang garosang panyaka keng daran At plasigang paud garetang gulyutan Ing manyaman diling gamit na ning dangwe Yapin ing panyaplit kareng magbangenge O kareng baintau a masasalbayi At alang pakundang karetang babayi Ing batung pyangusan dakal ya rin gamit Kareng court basketbol malyaring pamitpit Ketang pun nang posti ban yang e talindik Potang 'tin mamyalung at manulung kaynip Ing masanting dili karetang gamit na Nyang pyangusan batu ing maging siduan ya Keng libutad ning ardin ning malagung rosa At padurutnan ding myaliwang sampaga Ay tuknangan ke pa ining kakung kanta Pota nukarin pa miras mipabanda Ining pisasabyan a misasangkutsa Pota sumawa la ding maldang babasa MAMULOSA TAMU Neng RBA Atno pangasanting ding lalto pulosa makatakam wawa ing nyaman da lasa, deti inapag do babo ning lamesa ding poeta tamu ampon poetisa. Lalkas ya gelingan pluma nang Mar Franco at ing diwa nang Tec matning magpatilo, at eya kukupas king pamagparayo ing melapupuring Rafaek Maniago. Deni pung mebanggit minunang menapag sukat la pung puryan king binye rang sipag at ing sipagan da yang anting managyag ban makyabe tamu king tulang mihayag. Inya karing malda, malapit marayu balu yu naman pu ing kekayung agyu nung atin kayu rin ditak a asuyu eyu na panayan awsan dako lagyu. Nga na ning dimdam kung kasebyan ding tanak e me kakalbitan yang taung e maklak, uling nung yang tau ustu ya pamalak makagyu ne kano itang sabing ditak. Inya, eku ne pin binang pakakaban talus yu neman pu ing buri kung sabyan, ikayu nang bala a mamilubluban isundu tane pu ing pamitambayan. Mamulosa king Hawaii Neng: Arnold D. Batul Misdan ku't metula kening kekong gawa Menulu ku wawa sisuan a siwala Kubit ku man dila mitmu ku mung tula Mag hula-hula pa karening pulosa Lawen me'yng bisero ing waling Mar Franco Tiktak ne asenso pangatas na grado Uling ding maestro kumpas-kumpas galo Anya ing siniro Sisuan yang malino Akakit ta ngan yan obat e ta tukyan Susubuanan do ngan dening Kapampangan King malating dulang lepag de ing kuran Agyu tang pikabsyan tuyu man ing asan Salamat pung dakal kekong babie bakal Kening pamangusal pusu'ng pakabural Ikeng mamagaral kekong papabusal Amanu tamung mal patantung pakamal O ! Pare kung Tiakbong ume na kang pakbong Kening ginulis da rening magtambubong Keni ka't salilung buri mung ibulung Asan a manyaman pritu lang galungung Anten-anten ku ne I pare kung Rolly Ban tabili ku ne't panyuglungan na ne E na ka marine e ka lilelele Pota luban de pa ding tau Cavite. "Pulosa ning Kobung-kobung" neng Paing Bisa kong mamyalung kakung kaluguran? Mitambak tang gabun anam a kasakmal. Ating kobung-kobung kakung atiglapan, Pibuknulan a bwak tane tayang dakpan! Makli tamung ting-ting palis ketang suluk, Saka taya sulut-sulutan king buntuk; Itang kobung-kobung a sala-salikut, Lunto ya rin pilit king kekatang sundut! Karing poesia nang Rheybert M. Montoya, Itang Neng Mumuran at Ing Panagkat na. Mesundut ku buldit mipa-atras bigla! Mipabalikid ku't migising ku diwa. Itang kobung-kobung a kakung panagkat, Para piyalungan ya a kaku merapat! Makatulala ku't matudtud, matulsak! Mipakde ku kabud king ting-ting metasak! Oyni ing milyare, ilud ku ne pamu, Ining pulosa ku para kekatamu; Maglabas tang agyam manuyab ta pamu, Saka ta manunyat, sundu yu ne rugu. ANIANG MALATI CU (author and composer: unknown) E cu pa quelinguan aniang malati cu Malati ca naman icang caquialung cu Maligaya cu bie queti babo yatu Uling balang saglit ati ca siping cu Lalam balag opu tibis na nitang lual Siping ning talaga lele ning talacsan Babo ning garosa 'tin catang pialungan Perang calapanti darapuc tong bican Itang bulung saguin quinua cung pengili Pilit cung lalala gagawan cung dase Oneng ica naman pilit cang lalawe Uling magtinda cang miayaliwang gule 'Tin catang pialungan picu ampong sintac Ninu mang masambut parusan teng terac Dapot yacu rugu mewala cung palad Pigtiririn mu cu saca cu tinerac Cabang teterac cu lulundag lulucsu Agnan ing sagacgac pacpac ding gamat mu E mu cu ticnangan angang mepagal cu Icua cung sinunga tinulu'ing pawas cu 'Tin catang pialungan e cu pa quelinguan 'Niang mamialung cata quing bale-balayan Gin'wa catang anac manica yang basan Cabang pagcanta que titerac mu ne man 'Niang miras ing bengi paintunan da na ca Ding quecang pengari uling mewala ca Pero era balu piniapuldung daca 'Nia sa ata ngeni pitu nong anac ta Ing Manabuang Lango rba 2007 Nanu ya man itang iquit cung quena mu qng wanan mung pago, masican ya bau, uling itang lango dimpa qng pago mu anti yang sisimsim cananggang mabanglu. Linapit cu queca dane cagulutan ining dimpang lango buri quiang abuangan iniang itabi que qng bana cang lacuan mesagquil yang baguia ing pago mung wanan. Atna ca calaguang meliquid qng gulut ing malating timan e me asalicut; inabuang cung lango buri quiang lumaut o'bat acu pa ing penagal mung candut? Kalgaretang Kambing Neng Renato B. Alzadon Karing mekisugung memuntun qng Patyu metung ne Y Biling a anak nang Saryu kaibat ning akutan buri na sa kanu ing atin pulutan at saka Aneju. Paugtuan miyapag, ginamal neng tambing kabang lalangut ya maglabit ya'y Biling: "Maski nanu ya mang pulutan malasing apangan que,abe, subali queng kambing." "Yang kambing, na'n de mang samasnan ilutu ali ke apangan atmu ne ka-anggu." Kanyan linawe ning matuang miglutu. "Bileng...., Nanu ya yang kakanan mu, Itu?" Paritak-Ditak rba--2006 Ing malagung Bebang pandak yang mataba piglolon neng Bentung a tau king Baba; ban e mabantilo, e ya memilagwa king paritac-ditac carin ne pin kinwa. Pigmulan neng Bentung king ditak a lambis, king ditak a dalo paniatang ning Byernis; pepatukyanan ne king ditak a apis king ditak a suyu at tampang padaplis.. Iniang kelambatan ing paritak-ditak meniampukaki yang lugud a e ditak; ing meguing bunga na ning suyu nang ditak Ing ikua nang Bentung ali ya mu ditak...! Atut Neng:RBA Ing atut nanu ya... ? Nanu ya ing atut...? Bague yang makislap..., mabanglu..., mabantut.... ! Makislap la atut ding batwin king babo..... Ya'ytang mananabung anting bulalako. Mabanglu ing atut da detang sampaga Lele mo keng arung ...., bawan-bawan mo pa. Dapot ining atut na ning kasiping ku Nan' ku man balakan..... , eke buri bau! Ligaya Neng RBA Deni pung miminum apansinan kula Ketang lalam bale karin pu mimi la. King metung a asias karin ya'y kong Sewu Ya ing ayimyan na matudtud a asu. King kaung ning asu misdan ya Y koya Bigsu nya mesagpang ing kayang LIGAYA. Mengapaurung ya king tukuran eran Ing karsisiliyu na, ena ne tinas man. Kakagli Neng RBA Y atsi kung Nora tiktak ya kasungguit Kukulaman de pu....., lalapad ya buldit. King kaganaka na ning kayang asawa Ot paki-paten ne....., eya mipainawa. Sabi nang tatang ku eya makukulam Inia kakanian ya, mamita yang MASLAM. Makanian mu pala ngakung makikulit Painuman yeng aslam baneng e magbuisit. Aba, casanting na ning dalit a ine dacal a salamat, aling chase navarre, ding anti carening macuyad a gale gawan ta nong gawan ba'tamung misane. Inia, O' capatad, ume na co queni gawa tang poesia a anti canini, macuyad, matimbang, at cawili-wili lalu na pa sana ding macapacaili. RBA Ing Tagulele Nang Atching Liling by Chasenavarre (a.k.a. Carolina Sicat Guanzon) Macaguiam la pu reng poesiang macuyad Malagua dong basan deng anac a edad E la pa larinung mamasang maluat Uling macuyad pa ing carelang sucad. Chorus: Macuyad, macuyad, macuyad, macuyad. Poesiang macayama ing cailangang gawan Poesiang mangasigla, magalang, matapang, Poesiang talapaduas ning amanung sisuan, Careng malililing maldang Capampangan. Chorus: Poesiang macayama, poesiang talapaduas. Panupaya yu pu ing cacung ayagcas Amanung matabsing, maparas, o malat, Tacut qng panaong malaso ya ugat Ing amanung sisuan qng dilang metabac. Chorus: Ing dilang metabac, melaso ya ugat. Macuyad, masigla, magalang, matapang Poesiang talasuyu ning amanung sisuan Matalic la caul careng cayanacan Ampong mangalingwang taung Capampangan. Chorus: O, O, O amanu cung sisuan, napun cang paninap a dapat tangisan? Poesiang Makuyad RDM Poesia, poesia, makuyad mu sana ining agawa ku, ba ku mung mabiasa king amanung sisuan, sumulat poesia e naman kailangan ing tutu pang biasa..! Ditak lang balu kung asabing amanu e na kuman tune poetang larinu maninigaral mu, ba 'kia mung asundu panga-kapampangan e kaku mituru..! King swerti ku naman, mekatupa ku rin biasang mamoesia kening pangabitin ikwa kung misabit king matibe banting matalik kung talan, misalangat ku rin..! RDM Macuyad rba 2007/09 Misan, menatsa cung batu qng danuman mangalating alun atmo dayu disnan. Misan, sinulat cung macuyad a poesia atme dayu disnan ing cabaldugan na. Nung misan yang bague atmu na cacuyad ya ing atmu timbang a e mu asucad. Dakal a Patayan RDM Nanung malilyari dakal a patayan banda king Mindanao pane ing labanan at ding mipatayan Pilipino noman bie ing makataya nanung maging sangkan..? Ing pali ning api lalung milalablab payapang memalen ila ring mangatiab e pimale-male bale ra mangatuag pamangabiayan da rugo mangalasak.. ! Ing balen nang Pedro asawa nang Maria ila ring magdusa ing mismung pamilya makanian na wari ing pamibie-bie ra ninu kaya abe... ing matbus karela..?... RDM PASI rdm Ginawa kung metung poesiang makuyad I RBA naman pitu no ka-agad makuyad ku sati pasi kung makupad dumurut yang bagya tane mipapadpad.. ! Suglungan ke sati subukan keng bagya ing durut ning pasi ba ne mang kumaba kabang mamialung ku miragdag ne kala ba mekaba ya naman kanakung pikudta..! Kalupa na naman arsisiu neng abak pakembut-kembut ka saka lakad-lakad palatuk ding bitis ampong kimbe gamat kumaba ing bie mu ing bilbil mabawas..! Nung e pa mo sapat ing bilis ning takbang kuna meng pasalsal, uniat meng balakang ita namang pawas damdaman mung lumwal pilasan mu malat, ketang kekang kanmuan..! Pasi rba 2007 Subuc na ca Caca, macaba ca sati macaba ca durut, matibe cang pasi. Metabas ca case qng matibe dutung inia atme santing ing quecang sabeung. Aguiang maganu ca e na ca mabicual cailian mu na lamu deng malating cunial. Nung atin mangangas a queca manumis cocorongcong lamu----PASI lang TITIRIS. Pasing Malati RDM Ay salamat namu misuglun ya pu. Ing pasi kung dimut malati karamput. Mabilis yang bubiung susiuk sasabeung. Deng aliwang pasi bisa no ping sigi. Kalbitan ke paku lundag ya keng kuku. Apanyingit ke pa kabang dudurut ya..! TEMA rdm Agyang nanan ku tang sumulat poesia ot' ala kung balung isuglung a tema ketang panaun ku alang kakarera miturung poesia, sumulat poesia..! PANINAP rdm Ing buri ku sana a kakung paninap mibantug ku sana, a poetang mayap oneng ing problema ing kakung pigagap dening asulat ku asna la kakuyad..! Makiki-abuang Lango, RDM O't metung pang sangkan, ing lango meabuang e wari tuklu ya king bage malanam Kanagang mabanglu e ya manukluanan manabuang ya mu pen o manianggayiran. .? O kakang baintau oyan ng dalaga Manenayang mapse karing kekang diga ena pala buri ing manaplus kaya lalu na king pago bage lingapngap ya..! Paquibat Quing Manabuang Lango Ning Biseru ¡Nia penagal daca qng mapinung candut Gewa me pang sangcan ing lango sisingut Nung e cu na balu ing tune mung imbut Ing sagquilan mu cu qng banda cung gulut Nung atin cang paque e mu sasalicut E mu na dadalan qng pagulutgulut Dalan mu queng digang casing yumung pulut Ban ing quecang nasa mibie at mitulut Oyan na cabalen, linto ne'ing Biseru ing Manabuang Lango tiran ne sicretu; ume na co queni, maquiabe na cayu sumulat tamu pung macuyad a bersu. rba Maki-abuang Lango RDM Ba mipatakan ya ing pusung maglumut Kaniting pakibat amanung malambut ding kayang ginale malumemeng daklut Amanu lang tune king pusu sinulput..! Ing menabuang lango panenayan taya Nung nanu pang sangkan ing gawa' na kaya Magtapat ne wari, o diretsa' ne sa Ing ena na gawan sagkilan neng bagya...! Maqui-abuang Lango, RDM Ninu cayang tune quecayu ing tutu Magsalitang tapat alang mipanuldu Qng pakandut-kandut timan pamanaru palwal yu nang agad ing sitsit ning pusu..! Ing penibatan na ning langong malicut Manabuang yang pusu sintang mapupuput Qng suluk ning salu tane yang maglumut Ngeni ipasyag yung lugud mangulaput.. ! Ing Lango Me-abuang Ning Biseru Nung magtapat ca mu, buri mu acua me Dapot gawan mu sa qng pacacalale Pablasang ing lugud nung tune’t dalise Mayaquit qng dapat masampat malale Ing mabilis gamat aguia man buri que E ne agad acua ing nasa na’t paque Dapot nung dalan me keng poesia’t gale Magcang ing miglumut queca ne mipase Ing Suldut Menalbe cung cine quetang bandang gulut Obat ating suldut a suldut nang suldut Qng casusuldut na acung mipalatut Lunus cu queng suldot mete ya qng bantut ArtDax Ing Mequinis Suldut Ning Biseru Aro mebistu ya y coyang Arturo Canitang bisyu na qng milabas aldo Obat balu nala ding suldut a lulto Nung e ya madalas qng sine dadalo Tune ping dapat na ning malating suldut Caring pacalucluc quiquet pasalicut Qng lumang luclucan ding sine mabuluc Ing pialben bomba, e mayap a usuc Ing Yamuc NingBiseru Ing yamuc cuntoru ing bengi lalalam Carin ya babangis carin neman bubwang Ligidligiran no deng buri nang quetan Samantalanan nong matudtud manyaman Ustung quinet neman qng manyaman tudtud Misan ya matampi mate nya mu cabud Nung misuerti neman ing tampi e tumud Micaduan ing bie na ning yamuc a matbud Casuerti munaman, ing napun suldut ya ngeni bacla ne man ing quecang atimpla, nanu ne man cuyug ing secret formula ot adiscubri mu qng bacla ya pala? rba ATIN KU PUNG SINGSING (the official Kapampangan folk song) with English translation by Ernie C. Turla Atin ku pung singsing - I (once) had a ring Metung yang timpukan - It was one with a precious stone Amana ke iti - I inherited it Kang indung ibatan - From the mother I came from Sangkan keng sininup - So I kept it very well King metung a kaban - In a hope chest (which we call "baul") Mewala ya iti, - But it somehow disappeared E ku kamalayan. - Without my awareness. Ing sukal ning lub ku - Oh, the heartaches I had (so endured) Susukdul king banwa - Soar up to the heavens above Pikurus kung gamat - My crossed hands (or, actually "crossed fingers" as when hoping for something) Babo ning lamesa - Laid on the table (supposedly in prayer) Ninu mang manakit - Whosoever would find King singsing kung mana - That ring I inherited Kalulung pusu ku - My poor heart Manginu ya keya. - Will just adore, if not worship, him. Deng polosang areni maliari la ngang pakitonu keng kantang, "Aniang Malati Cu". Click the YouTube below to hear the folk song performed by Ernie Turla and Victor Bonifacio: http://www.youtube.com/watch?v=H6mRngzSFKk |
 Sign Guestbook |
 View Guestbook |
| It is entitled KAPAMPANGAN SONGS | and Poetry | by Ernie Turla |
 ernieturla@yahoo.com |
||
|
. |
| Visitors: 01058 |