Philippines
 folksong7
folksongs8
folksongs9
Philippines
folksongs2
folksongs3
folksongs4
folksongs5
folksongs6
|
| KAPAMPANGAN FOLKSONGS ALBUM |
 |
| COMPILED BY ERNIE TURLA WITH THE HELP OF THE STARS ABOVE |
Note: MIDIs of the following songs
as well as those in the other pages
are made available to those who buy the
book, Kapampangan Songs and Poetry.
Contents: 
1. Ing Aldo Ning Quequeng Casal
2. Atin Cu Pung Singsing
3. O Caca, O Caca
4. Kapampangan Cu
5. Queta Pu Quecami
6. Aruy, Catimias Na Nitang Dalaga
7. E Ca Mamaco
8. Ating Saug A Malati
9. Ing Balen Cung Licuan
10. Philippine National Anthem
11. Ba, Kapampangan Cu Yata!
12. Kapampangan, Mipacde Ca
13. Marcha Kapampangan
14. Aniang Malati Cu
15. Rosita
16. Ing Matuang Dalaga
17. O Matas A Banua
18. Ing Ugali Ring Dalaga
19. Malagung Capilas Bulan
ING ALDO NING QUEQUENG CASAL 
(author and composer: unknown)
Pengacu ning cacung sintang cacung liguran
Queng Domingo aldo na ning quequeng casal
Mipalucsu ya'ing pusu cu queng tula't ligaya
Micaul que pang adua bayu memun caya
Aniang miras ing aldo ning quequeng tipanan
Migayac at misulud cung pangcasal
Bigung calma aniang miras cu lele altar ning pisamban
Cacasal de ring aliwa'y Sintang Irang. (2X w/ ref.)
Refrain:
Sintang Irang ning bie co
Ica ing mal canacu
Nung miwale ca siping cu
Ay mate cu!
Nung sampaga caman sa, acu ing ambun
Acung babie tula qng pusu paragul
Potang maco nacu bigla cang magticum
Qng tanque malanat
Qng tanque malanat
Mabaldug qng gabun!
Refrain
(Contributed by Andro Camiling)
 ATIN CU PUNG SINGSING
Atin cu pung singsing
Metung yang timpucan
Amana que iti
Qng indung ibatan
Sancan queng sininup
Qng metung a caban
Mewala ya iti
E cu camalayan!
Ing sucal ning lub cu
Susucdul qng banua
Picurus cung gamat
Babo ning lamesa
Ninu mang manaquit
Qng singsing cung mana
Calulung pusu cu
Manginu ya caya!
O CACA O CACA
O caca, o caca
Cabalat papaya,
Sabian mu nang patas
Nung e na ca bisa
Refrain:
Queta man quecami
Dacal lang baluga
Mangayap la queca
Biasa lang mamana!
(Note: The above folksong has its
own tune and is different from Atin
Cu Pung Singsing)
 CAPAMPANGAN CU
(tune: Bayan Ko * lyrics: unknown)
Ing balen cung Capampangan
Sale ning leguan at dangalan
Paraiso ne ning cabanalan
Luclucan ning catuliran
Mibait la qng candungan na
Ding bayani ampong biasa
Balen co uliran ca
Lalam ning bandera
Ica ing sibul ning sipagan
Qng pamipalto pagcabiayan
Balen cang cuta ning tetagan
At sandalan ning catimawan
Capampangan a palsintan cu
Sicdulan na ning pangatau
Pagmaragul cu
Ing acu Capampangan cu!
Courtesy of Monico Pingul Jr. of Angeles
QUETA PU QUECAMI
(author and composer - unknown)
Queta pu quecami, misnang datun
Lalung lalu na, neng gatpanapun
Ala cang apansin, nung e ring sasarul, aaayy...
A tuqui-tuquian da retang mangamaru ampong maglipactung
Catacap ning silim,.... mataimic
Ala cang damdaman, nung e sunis
Suala retang ayup at sualang culiglig, aaayy...
Macabague quetang luncut ning capuluan lawiswis ring batis
Bandang ganingaldo, masaya na
Caretang magpastul, qng cainge ra
Atin nang daralit, atin nang cacanta, aaayy..
Babo ring damulag carin da lilimbang ing malucang bie ra
Bandang ganing aldo masaya na
Caretang magpastul, qng cainge ra
Atin nang daralit, atin nang magcanta, aaayy...
Pasyuc-pasyuc la pa babo ring damulag a papastulan da
Babo ring damulag carin mu lilibad ing calulung bie ra
(Contributed by Tess Z. Camiling, Pasadena school teacher)
ARUY!
(author and composer - unknown)
1.
Aruy, catimias na nitang dalaga!
Lawen que pa sa nung ninu ya!
Piquiling-quiling ne itang buntuc na
Puntuc-salicap maibug manabu ya!
Aniang aquilala cu ya
Ing malagung Pisiang pala!
A anac nang Indang Juana
Bibincang nasi'ng tinda na.
Caya cu pa sa icutang
Nung bisa ya ping pautang
"Aguiang guisangan mu na
Ing lugud cu queca dacal"
-enseragon!
2.
Aruy, caticdi na nitang baintao
Lawen que pamu nung ninu mo!
Pipapalatuc no reng sapatus na
Queng quintab da maibug masilo ca!
Aniang aquilala cu ya
Ing paliquerung Pol pala!
A anac nang Mamang Beltu
Limpia bota ya queng cantu
Buri co sang pa-"shine" caya
Reng "high heels" cu 'guiang mal la pa
"Atse, queng leguan mung yan
E ca sucat mamayad man!"
-tararajin!
3.
Aruy, calagu na nining anac da!
Lawen cu ne mua, nung ninu ya!
Pi-arimunding-munding neng gamat na
Queng labit na pihung mayama ca!
Aniang aquilala cu ya
Ing anac cung Eileen pala!
A quiquilican cu ngeni
Malagu ya pin mong dili
Buri re mong pamalainan
Detang macualta qng dalan
Oneng, e pu magsilbi
Atin neng nobyung principi!
-tararajin!
(last 2 parts by Ernie Turla)
E CA MAMACO, E MU CU LALACUAN
(author and composer - unknown)
(Throughout the Spanish regime in the Philippines,
Pampangan fighters who were often praised by the
kings of Spain for their bravery were sent to
Mindanao to fight against the Moros. They have
been immortalized in "curiros" and "comedia" with
their famous line: "Qng leon o tigre e cu tatacut,
queca pa?". This is the story of one.)
E ca mamaco, e mu cu lalacuan
E ca tatangis magbalic cu naman
Pangaras cu quetang ayan cu
Sulatanan daca, O Bandi co!
Queng bagyus ning pati-pati
Queng mismung cacung daya
Sumulat cu queca, Bandi
E ra ca calinguan cabang caba!
(note: second stanza by Ernie Turla)
ATING SAUG A MALATI
(Tune: Gigolo & Gigollete)
(lyricist: unknown)
Ating saug a malati
E mabasa e malangi
Parati reng pipandiluan,
parati reng pipandiluan
Detang manandaman pali
Quetang pampang nang macapadurut
Mengacapal na ing dicut
Balang tumalas tatalbug,
balang tumalas tatalbug
Sasaca lang mangalambut
Quetang cayang talimunduc
Menga tubuanan neng lumut
Carin do acacua bini,
carin do acacua bini
Garapata ampong suldut
Itang cacung sinambitla
Queting liguran tang bansa
Aguiang masias cang sagupa,
aguiang masias cang sagupa
Lambut carin panga baguia
Itang cacung sinambitlan
Queti balen Capampangan
Aguiang nanan meng tarucan,
aguiang nanan meng tarucan
Mate naca e me dasnan
Acu na sana ing cuintas
Queng salu mu sapad-sapad
Ba cu na lang asasalat,
ba cu na lang asasalat
Detang aduang mansanitas
Acu nasa-ing meguing tabu
Qng arap mu andu-andu
Ba cu nia mung abibiru,
ba cu nia mung abibiru
Maluat mu nang catutubu.
 
ING BALEN CUNG LICUAN
Old Kapampangan Tune * New Lyrics by Ernie Turla
Atatandanan que'itang balen cung licuan
Bista't marayu ya, e que acalinguan
Carin cu mibait, meragul, milsinta
Ing pangayanac cu, carin cu guinasta.
Caibat ning queluatan mig balic-bayan cu
Masaya ngan ing disnan cung pamibiebie
Iquit cu ing cayamanan tamung atbu
At ing guintung pale saslag qng marangle!
Cabusadu cu ngan ing palele-lele
Deng angang calsada, ing plaza't palenque
Pisamban, escuela, deng ilug at tete
E ra cu alili, ba, balen quia ta iti!
'Niang macasaque cu pang ibat Menila
Abatiawan cong damulag qng taldawa
At deng memayutputan-bungang tanaman
Cambe ring masayang papaspas a cuayan!
Caras cu qng balen magpiesta pa pala
Deng bandang mosicus, uy, magpaseu la
Mangalagung dalaga pesilague la
Maniabit lang cuintas gawang sampaguita!
Iniang caculdas cu selubungan dacu
Reng caquilala cung e mengalinguan cacu
Meyama cung ustu lubus pilubluban
At layun guinato queng caligayahan!
Ngening caorasan ati nacu naman
Queng caduang labuad a canacung sintungan
Dapot itang balen a cacung ibatan
Quen yang queng pusu cu, e que acalinguan!
 LAND OF THE MORNING
translated into Kapampangan
by Ernie Turla
Balian ning leguan, Perlas na ning aslagan
Lugud mi queca, Daya mi cacawal
Balen ming tibuan, Pugad daring bayani
E re alusub, Ing nuan mung lugal!
Queng asul mung banua, dagat, bunduc
Tutyup ing taguimpan
Acaquit ming saslag queng biga ing
Gloria ning calayahan
Deng batwin at aldo ning quecang
Bandera atmo sala
Tanda no ning diwa at tagumpe
At deti e la matda
Malagung labuad a quecaming palsintan
Queng candungan mu caligayan
Nia patia sinupil daca o piglocu
Subu mi'ng bie mi qng uli mu.
 BA KAPAMPANGAN CU YATA
Lyrics: ERNIE TURLA * Music: Erasmo Sarmiento
Refrain: Ba, Kapampangan cu yata!
Maguing queng leguan!
Maguing queng timan!
Ba, Kapampangan cu yata!
Maguing queng nanu man paita!
Other options for "leguan" and "timan":
galing - santing; tabas - piblas; canta - sinta;
gastus - quilus; sebian - beluan; cutis - linis;
tapang - yabang; lagu - lutu; alac - terac;
lacad - talacad; sabung - pialung; suala - sigla
1. 'Nia pagmaragul cu / ing Kapampangan cu
E cu ipamalit / ing pangatau cu
Aguiang nu man carin / Kapampangan cu rin
Titibuc na iti / ning pusu cu!
2. Maglapo queng casna / ing quening pusu cu
Tutu cung pangaya / lahing amana cu
Mayabang nacu pa / nung pamayani cu
Careng sabla ing Ka / pampangan cu!
3. Queng sabi at dapat / paglualu cong tapat
Ing balen cung tibuan / at amanung sisuan
Nung ating cucutang / queng cacung ibatan
Alistu cung sabian / Kapampangan!
4. Pagmasabal que ing / balen cung ibatan
Paquipate que -iti / masqui caninu man
Nanu nia ing tatac / dareng pipumpunan
"Queng leon o tigre" / yang casebian!
5. Talacad taya ing / quecatang bandera
Itang Kapampangan / queti qng sicluban
Paquit ta ing atin / tang pamisanmetung
Paslag taya sala / ing Aguman
6. Gulait tamu ngan / ba tamung maramdam
Itang Kapampangan / taniag queng tepangan
E ta ya paburen / mibagsac ing balen
Pagdependi taya / caninu man!
7. Bilang taguimpan na / ning quecatang balen
Magprisigui tamung / mitbit queng dangal na
Uling ya ing diwa / na niting aguman
A tinatag da ring / Kapampangan!
8. Pampangueno cung tal / duquit quilub at lual
Pagmayring cu iting / nobling pangalahi
Nung e mu pin sanang / macarine sabian
Itang Kapampangan / ding "number one"!
KAPAMPANGAN, MIPACDE CA!
Old Kapampangan Folksong * New Lyrics: Ernie Turla
Kapampangan, mipacde ca!
Probincia cang capuri-puri queng bansa.
Ing lugal mung quequeng tibuan
Masaplala ya queng atbu at palayan.
Cabalitan ya'ing bunduc mu
Nung nu sasalingalngal ing quecang banglu
Carin ya sinlag a leguan
Ing meguing leyenda mung Mariang Sinucuan.
Kapampangan mipacde ca!
Luid la reng pipumpunan ming menimuna
Uling cibilisadu la
Queng patag at e queng bunduc la sinalta.
Suguing Principe Balagtas
Miglacbe ya, queng pampang mu ya miparas
Tinasac ne ing tandus na
At sicluan ne ing gabun mu queng lagyu na.
Kapampangan, mipacde ca!
E ne matda ing sulu mu queng historia
Parti naca ning cayarian
Nang cagalang-galang a Raha Soliman.
Ninu wari queng Menila
Sinacoru 'niang luban de ring Castila
Nung e reng que Macabebe
Sinabac nang Bambalito ing cayang bie.
Kapampangan, mipacde ca!
Queng edad icang probinciang pecamatua
Pinorma racang exactu
Quetang mil cinco siento setenta unu.
Cayagnan me ing Menila
Matua ne mang diling ciudad a megawa
Ing sacup mung teritoryu
Anga canita qng bunduc Carabalyu.
Kapampangan, mipacde ca!
E ne lumbug ing batuin mu cabang-caba
Panday Pira, palipi me
At y Francisco Maniago a rebelde.
Icang queng Morus mengaya
"Queng leon o tigre", nga mung migsalita,
"E cu tatacut, queca pa?"
Macanian cang meguing taniag caring malda!
Kapampangan, mipacde ca!
Panatag na ca cabilian queng historia
Icang poder ning Espana
Qng uli mu reng barangay mitipun la.
Icang mequilaban Morus
Ica ing migdependi queng Intramorus
Qng uli mu'ing labuad tamu
Misampulung ya at meguing metung nia mu.
Kapampangan, mipacde ca!
Queng dagat deng Dutch at Insic simbut mula
'Nia dengal de'y Lacsamana
At 'nia magpiesta tang "Naval" balang banua.
Iniang mecua ya'ing Menila
Careng Inglis, ing capital milipat ya
Qng Baculud, Kapampangan
Anac mung Manalastas yang mequilaban.
Deng Castilang memahala
Pinuri raca tapang quetang ari ra
Uli mu migtagumpe la
Dapot 'niang migdimitir ca mibagsac la.
Kapampangan, mipacde ca!
Pagmaragul mi ing ambag mu queng bansa
Abe racang menimuna
Reng mig-rebolucion laban qng Espana.
Atyu na cang macamarca
Careng aslag ning aldo na ning bandera
Atyu na ca queng memoria
Inimpluencian me cursu ing historia
Kapampangan, mipacde ca!
Macaruquit na ca lagyu queng historia
Queng "Death March" mequi-marcha ca
Deng Hucbu mu careng Hapon linaban la.
Atin na cang presidenti
Chief Justice, heneral, martir at bayani
Cardinal mu yang prumeru
Sale raca reng dacal a pensionadu.
Kapampangan, mipacde ca!
Hardin ding ilang-ilang at sampaguita.
Deng cuintas mung agagawa
Mangaras lang mititinda qng Menila
Ing lutu mu cabalitan,
Ica ing peca capital queng pamangan.
Deng furniture mung gagawan
Miraras la U.S.A. careng tindahan.
Mipacde ca, Kapampangan!
Ica'ing estrella ning bansang cabilugan
Lon ta na mu neng magpascu
Ala lang capara tindag deng parul mu.
Anti murin neng maleldo
Queng pamagmasusi queng lasa ning Guino
Deng queng curus papapacu
Dadaiwan dong alben mabilug a yatu.
Kapampangan, mipacde ca!
Balicdan mo reng anac mung sasagupa
Magbiba lang alang patna
Maniampucaque la puri't lugud queca.
Indung balen sabian mu sa
Macasadia cami at layun magcusa
Mie anti queng quecang nasa
Paquipatlalu raca honor queng bansa.
Refrain (sung after every 2 stanzas):
Magluid ca't magwagui!
Marangal ca lahi!
 MARCHA KAPAMPANGAN
Old HMB Song * Additional Lyrics: Ernie Turla
Refrain:
Catatagan, qng pamaquilaban 
Qng lagyu ning balayan
Guniatan yu, capilan man
Tara na maquilaban tana!
Miwagwag ya ing bandera ning labuad tang pacamalan
Walu la reng aslag ning aldo metung ya'ing Kapampangan
Bitbitan ta'ing carangalan, paquipate ta'ing catutuan
Gulait tang miagnan-agnan: Biba! (pek bung)
Miwagwag ya ing bandera ning balen tang Kapampangan
Cambe naning pamagtagumpe ta queng angang labanan
Tandanan taya'ing casebian, leon o tigre, o ninu man
Ala tamung catacutan! Biba! (pek bung)
Mipacde ya espirito ing balen tang Kapampangan
Cambe naning casaquitan quecatamung pibabatan
Magpacatatag tamu ngan, qng lagyu na ning balayan
Gulait tang miagnan-agnan: Biba! (pek bung)
 ANIANG MALATI CU
(author and composer: unknown)
E cu pa quelinguan aniang malati cu
Malati ca naman icang caquialung cu
Maligaya cu bie queti babo yatu
Uling balang saglit ati ca siping cu
Lalam balag opu tibis na nitang lual
Siping ning talaga lele ning talacsan
Babo ning garosa 'tin catang pialungan
Perang calapanti darapuc tong bican
Itang bulung saguin quinua cung pengili
Pilit cung lalala gagawan cung dase
Oneng ica naman pilit cang lalawe
Uling magtinda cang miayaliwang gule
'Tin catang pialungan picu ampong sintac
Ninu mang masambut parusan teng terac
Dapot yacu rugu mewala cung palad
Pigtiririn mu cu saca cu tinerac
Cabang teterac cu lulundag lulucsu
Agnan ing sagacgac pacpac ding gamat mu
E mu cu ticnangan angang mepagal cu
Icua cung sinunga tinulu'ing pawas cu
'Tin catang pialungan e cu pa quelinguan
'Niang mamialung cata quing bale-balayan
Gin'wa catang anac manica yang basan
Cabang pagcanta que titerac mu ne man
'Niang miras ing bengi paintunan da na ca
Ding quecang pengari uling mewala ca
Pero era balu piniapuldung daca
'Nia sa ata ngeni lima nong anac ta
(Contributed by Monico Pingul Jr. of Angeles City)
ROSITA
Tumula ca l'yag cu, 'ti cu qng siping mu
Yang ganacan mu, ining pusu cu
Ala nang banding mal, nune ing pacamal
Sarili me irang, ining sisimpan
E ca maluncut e ca tatacut
E ra ca lacuan sinta, nining cacung panirug
Aguiang pang datang, ing sigwa'tluncut
Cambilan daca, alang capicacunuan
Quening canacung lugud
Contributed by Monico Pingul Jr. (Angeles City)
ING DALAGANG MATUA
Ing dalagang matua, nung ya pa'ing malsinta
ing caya pang timan, pigagawan napa
Nung magpolbu ne man, catmuan ne'ing lupa na
at ing cayang buac ipa-ringlet ne pa
Lumacad qng dalan atlu ya capacli
e bisang magobra palayo taliri
Maniabing malambut qng ba reng aburi
ing lihim nang sinta yang cayang pangadi
Contributed by Monico Pingul Jr. of Angeles City
O MATAS A BANUA
'Niang misan a bengi, iquit dacang quiquiac
Menalbe cang cine macaternong rosas
Sinabi cu queca lacbang cang banayad
Pequibat mu cacu, pequibat mu cacu pangisnawang saldac.
Canita ing lulam selicut no't ticpan
Detang marcang batwin ampong marcang bulan
Biglang sinalisi malacas a uran
Pinaid ning angin, pinaid ning angin banda qng aslagan.
Queca que patuncul ing matas a banua
Tungi co reng batwin, pacuintas co queca
Pisian que itang bulan, gawan queng corona
Iputung que queca, iputung que queca malagung dalaga!
Gawa racang duyan qng bigang maputi
Ing gawan cung tali itang pinanari
At pabante raca caretang bayani
Jose Abad Santos at Ninoy Aquino
Lahi lang comangui!
Contributed by Ben Susi of Lubao, Pampanga
ING UGALI RING DALAGA
Ing ugali ring dalaga
Ecu no man tutorusan
Paca-cloreti la reti
Paca-lipstick la pa labi
Atuan mula e ra ca pansin man
Ing labi ra pitu ne carangan
Ing lupa ra asne caslam
Sexy no man qng catawan
Ot baquit pu mipacanian
Ngeni ata baligtaran
Ding babaing mangatapang
Managal la qng pung dalan
Macapagmulalang sabian
Obat ngeni mipacanian
Ding babaing mangatapang
Mimura la queng pung dalan
Nung bisa cang maquiasawa
Munta co pu Sta. Rita
Carin dacal lang dalaga
Managcat lang pusitara
Nung e ye pu balung puntan
Ing bale nang Sebyung Tandang
Ati yu pu qng tribunal
Calele ne ning pisamban
Contributed by Monico "Jun" Pingul of Angeles City,
former music director, Aguman Capampangan MW USA
MALAGUNG CAPILAS BULAN
Malagung cacung palsintan
Sulu ning bie cu, sintang hirang
Ing dulum cacung cabilian
Quecang aslagan ban mipaldan
Sampagang tutung mabanglu
Binang maningning yang cule mu
Queca ya-ing caladua cu
Bandi meng lubus, susumpa cu.
Malagung capilas bulan
Matang mapundat maglalawe
Batwin ca ngening cabengian
Ing pusu cu aslagan me
Ing bie cu macapanaya
Qng caburian mu banding sinta
Queca ya'ing caladua cu
Bandi meng lubus susumpa cu.
Matang mapundat cacu minihag
Ica'ing reina na ning caladua
E me sa pabustan
Queca yang saguipan.
Malunus na ca quening bili na (2x)
Ning malsinta.
Contributed by Dan del Rosario and
Geronimo del Rosario through
the tape of the Sapni nang Crissot
For more Kapampangan songs, click:
http://maxpages.com/kapampangan/folksongs2
|
|