 |
 |
 |
 |
 |
 |
 |
 |
 |
 |
|
Philippines
folksongs7folksongs8folksongs9folksongs10songs11Philippinesfolksongs2folksongs3folksongs4folksongs5folksongs6|
|
| KAPAMPANGAN FOLK SONGS (BASULTOS & POLOSAS) |
 |
| COMPILED BY E.C. TURLA |
| ||||||
| Contents: 1. Atlantic City 2. Ing Tandang Nang Ticuc 3. Mr. Byasa 4. Ing Makisake 5. Pamanalik Kuldun 6. Metung a Baintau 7. Berong, Pilan Nala...? 6. Tuku 7. Panggising 8. Mequiliti 9. Singitan 10.Bombay Ya Pala! 11.Andres de Saya 12.Ala Ping Gulu 13.Makasadya Na! 14.Magaling! Magaling! 15.Macho Kinet Ne Ning Asu Atlantic City Neng Renato B. Alzadon Baltimore--2007 Ding kasiping bale--- Y Elmer at Nancy--- maralas lang mame king Atlantic City; agpang mo karela matas la diskarti inya makanyan lang manyambut parati. Pangaras keng sugal, nanu tang balu ku...? Makanyan ya naman ining kayabe ku. Ing balu kung pyalung yang "Rami" keng kantu o kaya "Tres Syete" neng lame keng baryu. Misan, king abluk da dening miyasawa, king Atlantic City, mebisa keng minta. sweldu lang pabulan ding kekaming dela ban karing Casino paki-parapinta. Busal ding makislap a pigawang batwin million dollar jackpot kaku yang apansin, king lub ku dinalan magkang swerti ke pin inarapan ku ne itang slotch machine Telan ku ne kanyan ing balamu kambyu abit-abitan keng antimong mangambyu, pakiramdaman ke ing kurug ning rolyu antimong gitarang kakapkapan tonu. Aba, nung misan pin turan ke taginting balamu ustu ya panga-abit bagting, kanyan no manabu maglagutuk tabling dening perang pilak a matni kalaksing. Indat damdaman ke ing matning kalantug sasyo ya king tula ing salu kung kakdug, ken ku na dagdagan ding kakung babaldug magkang itang jackpot turan ke balugbug. King pangalukluk ku, o'bat kelambatan kabud nala mimin ding sweldung pabulan, ining pangalambut ken ku na damdaman megatpanapun na ali ke pa mengan. Pintan keng abe ku nung nuya dinungut ing sloth machine na tiktak ya king kaymut, e binang miglambat ala neng a simut detang panaya na mimin lang megigut. Ing e ku pa buri 'nyang muli na kami magbiba la king bus di Elmer at Nancy ing roleta kanu ikwa re diskarti puhunan dang dela sinambut lang tripli. King pangasambut mi, ibat na kanita e na ke tinuki karing miyasawa, ing katuliran mi indat managkat la pangaras keng sugal e ke rugu byasa. Agpang mo karela maralas lang tutud inya kareng hotel karin no matudtud, nanu man sabyan da e ra ke aguyud sapat ne ing misan mengalambut ke tud. At misan a aldo kabud-abud na mu dening miyasawa mamun lang dumayu ketang kapatad nang Elmer king marayu karin no pa kanu maki-sulut pa mu. Kanyan mi abalu king dening myasawa mesilu lang ustu king pamanyugal da ing carelang bale misanla ya pala e ra ne ayatbus, inia mesaklit ya.. Salamat king Ginu, e ke meyamuyut karening myasawang king sugal meyuyut at salamat ketang misan ke dinungut king Atlantic City, e kami sinambut. Ing Tandang Nang Ticuc rba-March 2008 Abac pang maranun ing Tandang nang Ticuc atmu ne casiglang mamamagpalpatuc: "Isabung yu na cu", nganang manulawuc, " magaling cung dili caring anggang manuc!" Dela ne ping Ticuc ini nang manuc na keta king sabungan.... ya ring pasabung ya; inyang isicad de, ing acarungut na ing mecatapitung ganarul a matwa. Caybat na ning sicad, ing manuc a tandang cucurucutuc yang atmu na cayabang; " Pusta mo ngan Amu pera mung inutang agyu ke yan Amu---matwa yang Balulang." Inyang ing bitis na sabitan deng tari king cayabangan na lalu yang misubi; " Caren mung tayid cu", nganang mamayani, "ing matwang Balulang mapatad ya laji." " Lalu na pa ngeni maki-tari cu pa bitasang ala yang ilaban ing matwa, inya sana, Amu, ulitan cu keca ipusta mu nongan darala mung pera." Penwalan neng Ticuc ing misapin-sapin a cayabangan na ning magmamagaling; ding anggang pera na pista na no man pin e ne mengitagan metung mu man cusing. Kilub ning arena, caybat ning tuctucan ding tari ding manuc leco ro caluban, ing Tandang nang Ticuc canyan ne mipasdan king ikit nang tari ning cayang calaban. " Amo, talnan mu cu, e mu cu bibili nung ibugnus mu cu pilmi cung mulayi... balacu acu mu.....", nganang sibi-sibi, "ot ing calaban cu....'tin ya namang tari....!" Mr. Byasa rba-08-M Atin cung a-roomate, bala na byasa ya... Pangaras keng bale, nanu'tang balu na? Mamalengki na cu at maglutu cu pa... Den mu man sang pinggan wasan nala sana. Misan ing guewa cu, detang cayang pinggan e co pecalinis caybat cong sebunan; inyang mangan cami magreclamu ne yan.... O't lalasang sabun ing cayang cacanan? Ining Mr Byasang e byasang makyabe tutung e ne buri ing caya cu binte: "ban e na ca mangan lasang sabun, abe, den mu mang pinggan mu, wasan mu la case." Ing Makisake rba-2008 Tutung e cu buri neng magmaneju cu yang makikisake dinan na cung mandu; "Bilisan meng bagya, e ca mamirenu lampasan me itang mabagal a awtu." Misan king cotsi cu atin mekisake intasang balamu ing saken bandi ne: "magbanda cang cayli---magwanan ca, abe, itucnang me pa ken, sali cung tinape." Cabud caculdas na agad cung sinabi: "Ken na ca pa abe, manabat cang taxi; ing pamagmaneju nung tula me iti, o'bat e ca saling sarili mung cotsi?" Pamanalik Kuldun Basultu neng RBA Magmalagintu na ing kadua tang bili palakayang silbag a disnan ning pali; kanyan no man datang ibat king Mauli dagis a maniale king tangke rang pikli. Ding ibat Los Banyos, tubud ning Kabyasnan ngara king ding salut dapat lang gisanan inia ing pacsa ra buri dong lasunan binawal tala mu, ban ero taginan...! Mipamulala la! Ngata mung sinabi: "E kayu makyalam problema mi ini; agyang pilan salut a anti kareni agyu ming labanan...! E ke mamulubi...! " Ngara dening biasang dinatang king baryu manalik tang kuldun dumanup ta kanu; deni kanung salut, daguis a perwisyu, ing siran da reni, emu mamagkanu. Dening mangabiasa kanian no magmintis e ra kata balu galing at kilatis; subali king dakal ta abias at mais nananu nalamu dening pindang daguis...! Matuang Baintau Neng: Renato B. Alzadon Maleldo, Y Kiku ya ing pun ning Puni At mika-pabasa- --at mika-pangadi; Komo baintaung maki-tagle tikdi Apansinan ne ning dalaguitang Neni. Lub ning paruminggung pamiaga-aga mebaldug ya ta lub ining dumalaga; At asabi napin king mitmung ala-ala Sana mamasyal ya kanu king karela. Kaibat ning maleldo, kabag-kabag salu, Keta kari Neni memasyal ya'y Kiku; Oyan ing niaman ning baintaung suku Ing dinungut kaya, ing Indang mebalu. Berong, Pilan Nala...? Neng Renato B. Akzadon 2006 "Berong, pilan nala ding anak mu, itu..?" "Ma'p a kapalaran adua nala, Apu. At ing kabyayan mi manawa-nawa pu makatipun ke pa agya sang ditak mu." "Berong, ding anak mu pilan nala pala...?" "Di'pa na ning mayap, apat nala, Bapa at ing pamibie-bie medyu pasakit na magtipid na kami, magkulangan ke pa." "Berong, pilan na la ding anak yung Sitang...?" "Di'pa ning kamute anam nala, Tatang. agyang nang' kayud mi e ke makalutang malulumud kami king dakal a utang." "Berong, pilan nala ding anak mu, Itung...?" "Sawing kapalaran, walu nala, Inkung. At king kasakitan maibug kung galeung matutuliru kung masisira tumbung." "Paring Berong, pilan nong anak mu ngeni...?" "Inagpa ning alte, apulu no, Pari. Ba't naman mo e ku magdipa' ning alti magbuktut ne naman ing kekang kumari...!" TUKU Neng Renato B. Alzadon Tuko! Tuko! Tuko! Babo na ning cwayan at na ca casiglang magbandu na naman, ipamalita mu king meto capuluan king biasa cang diling matas a ukyatan. Sulung gulisac mu king biasa cang dili ala cang capante keting yatung iti, sulung, pangaya mung dapat cang mapuri ulining beluan mung alang acayanti. Sulung, gulisac mu king ba'nang abalu ning meto balayan beluan mung milalu--- pero, capamu na, nung dacal ca balu o'bat e me ata balu man ing SUNU...! PANGGISING neng Paeng O Cacang Lilibeth a mecatapilan? ing e raca dimdam keti king ugnayan manibatan ketang tawling sagacgacan carin king bale nang Rey bandang Sindalan..! Matenacang Arnold, maticding poeta ipagmaragul mi ing kecang panatba sabic nong mamasa dening kekeng mata caring amanu mung picudtang pulosa..! Ica naman Tiakbong manibat San Diego capilan no lunto ring kecang amanu picabalwan murin tutung ucupadu keng pamagpamilya munang iyareglu..! A I Louis pala, deng kecang poesya paninintunan ming macabasa sana ding amanung siswan balu mong irima pibala-balangcas mung bersu at lira..! O I Cacang Ed naman, nananu ca pa ken balu cu ing sabo, pane meng babanten e me buring dimla, ban e mipaburen ing amanung beytan, kecata yang sesen..! I Cang Rey T. naman cabang gugogo ne ing sabo keng curan, tatacman tang pane cabang mapali ya, kecata nang sabe keng pamanyangcap nang Capampangang tune..! O ing Cabangsang Mike, lage mu no sana retang titinda mung pandasal malasa miyaliwa lapad, sucad ampong caba ating malatictic, ampo pang mataba..! Cang Tony manatba naca man sana ne deng kecang capatad oreni magsane Indung Capampangan a macasalale king kecang panyulat at pamanantabe. .! Oyan na I Romy king cayang dalusung yang pambatu tamu carin king Capitol mapali ya datang agnan ing curacul pasalamat tamu ing caya miyucul..! I Cacang Pidung pu, manatba ya rin yan potang paynawa yang linigo king playsdan detang bangus carin, tilapyang asanan peboreyt nong ulam, almusal, apunan..! Oyan ing pagasa ning Balen tang sinta Indung Capampangan, cultura misalba paglage nong Jayson ding bayung ideya ban ing Capampangan, papanatilyan ya..! E ta no myuman pang sucat pangalbitan Di Bern at Cang Carlos ampong Jose Roman king sipag da ngening mapse cawatasan subucan tang tagal, ba tang e malakwan..! O Cacang Mar Franco, balu mi na naman ing malasakit mu king amanung siswan neng misan bisi ca carin king asican dapot ing pulosa, e me palampasan.. ! Lililiwan kya naman pu y Don Pablu Cambe ning bagsic nang gagamit laticu Paniglon ku ing cayang camua at tapang Careng managalug pero Kapampangan I Mang Ernie Turla, picabalwan na pu ing buri nang tema, ken mu pung amanu alang aliwa pa, taneng peka-sentru ing amanung siswan, misalba ya mu pu..! Ing pambatu tamu, poeta ning balen I Cacang Renato cayang sasagesen deng yamuc at lango, pusa, ane, oren caylangan lang banten, e ta la paburan..! Ikeng Atsing Josie pareu keng pintor Deng pinsil ming dala anti lang tirador Tiradolan miya'ing dipa ne ning alti Ban keng pamanyupil patugut ne iti Anti ing amanung kecatang tatamban pisopan-sopan yang api palablaban Agyang tingting yamung keng dapug silaban macaragdag ne pu king amanung siswan..! Detang e metungge, lagyu keting pacsa dapot paynawa lang anting mamatucba macyabe tamu pung makikiyambula keng gugogo sabo a picacatula.. ! Mequiliti by Arnold Batul O coya cung Paeng lalaquing masanting Icua cung migising qng cacabatingting Ning quecang seingsing qng mewalang singsing Maclac que ma’t duling mayntun pilingpiling Aduang calapanti binie nang Cong Centi Dila cung meculti anac cu’ng malati Mebatubalani binit alang pacli Icuang mequiliti singit cu’t culani Hihi hihi hihi ! haha haha haha! Metula que queca tilauc mung sinta Binggit mo ngan pala anac at mangatua Pemalatuc da la dening maquinilia ‘tin pabucal sabo e ra man gugogo Malapad dang pago bulyon pati lango Lele ning lababo ‘tin bisang salambo Basucbasuc silyo Canyaman! ing culyo Icong mamicudta matula queng bina Gyang nanu yang pacsa maglasa yang tula Lalam ning talaga danum alang bula E ya manimutla malino ya sala Metung e mu tigquil Don Pablung sapingil Lulual la reng pangil istung yang manggigil Dilang ating cutil ngilngil na lang ngilngil Queng pangasapingil ‘gyang alang salupil Oreng gendeng gendeng oreng gendeng gendeng Balacang queca lang igiling’t iquending Buntuc man mequiling balat man menuling Quecatang ibiling salitang malambing Ban e ya cumalpa Sisuan tang Salita Ibat ya cang Inda tutung menaruga Tutulu na ing lua queng sobra cung tula Pulosang pigampa ipasa cu ne pa! Ban detang aliwa e no man sa mimua Qng yagpang dang tula queni qng taldawa Mangayat ku wawa at damdam pa mu sa Biclat mung salitaaaaaa. ..mayumu qngggggg.... .Diiiilaaaaaaaa! !!.... Singitan Ibat king Paningit nang RBA Linele ya’y Popung king abe na bale Oneng ing babayi, e bisang PALELE, “ATIN CUNG BISITA”, guincas nang malale, “simungit na ca mu king siping tang bale”. Menusig ya’y Popung. Dacal lang saguli Ding meco linabas, bayu ya miyuli; Dapot cauli na, gagalgal ya labi Atmu ne capagal king pamamulayi. “O’ nanung milyari?” kitang ning abe na, “bigsu na cu pete ning lalaki”, Ngana, “A bante na cami, inia ing guewa na Penagal na cu king purosung palang na.” “Ninung siping bale waring singitan mu ?” “O’casi Y Mareng, asawa nang Darmu.” “Nung Y Darmung Dagul ya ing amanuan mu, Aba, ali ya man dapat MAGRECALAMU.” “Sabian mu cang Darmu”, nganang migaligit Nining asawa nang medyu mangapingkit, “ A nung macanian ya ugaling papakit, Ustung icang ala, E NE MACASINGIT.” MAILI TA PA! neng Romeo S. Rodriguez BOMBAY YA PALA Mimua ya ing boss nitang sindikatu, karetang taua'nang ating dalang tau, kutang na, "Obat pin 'yan ing kinwa yu, mekad itamu pa kaya maperwisyu?" Mekibat ya i Jess, "Anya kinwa miya, nung limang milyun mu manakitan kaya, anya agad-agad, kontakan ta naya, ing kayang asawang ngeni manenaya." Sinaping ne ning boss itang mengamanu, "Angga ngeni buguk, eka pa migbayu, kalwat mu na keti, yang kamulalan mu, yapa ing pairal, byasa ka pa kaku?" "Wapin akakit ku lupa yang makwalta, bikas ning talakad ampong pamiblas pa, Ing eku mu balu uli ping Bombay ya, Baka baldugan pa ing ramson'g ibye na." -o-o-o-o-o-o- o-o- ANDRES DE SAYA Mikit la i Andi ampo na i Poldu, king metung anak mikumparing buu, lambat dang e mikit atlung banwang ustu, kilub ning restawran melaus lang megtu. kabang mamangan la diretsu ing kwentu, mipagbida la pa keng karelang tau, lalu na inyang king alak mekasargu, metalas la dila king pamangamanu. Kanyan ya mangutang i Poldu kang Andi, "Under de saya ka sasabyan da pari", uling sadya na lang mipamiru deti, Tiniman ya'y Andi, tinimang malati. "Ing tutu na pari, pekibat nang Andi, "Ban eke mipate ning kekang kumari, aku itang sunud nung pareu ke buri, nung eke pareu, aku namang tuki." -o-o-o-o-o-o- ALA PING GULU Limampulung banwa malagwang milabas, detang miasawa milugud lang lakwas, labing adwang anak meyari lat miras ketang pagnasan dang masanting a bukas. Anya mitangka lang maragul a tau, king anibersaryong ika limampulu, ngara ban kanita agyang detang apu, miratang lang sabla ketang salu-salu. At ketang programa aliwang bisita, mekapangutang la king lalaking matua, "Nanu ing sikretu, mebiasang mibata, pilang pulung banwa king kekang esposa." "Ngana simpli mu yan sagut king kutang mu, anggang ena buri, ya ing daraptan ku. E bisang mamipi o kaya maglutu, aku na ing gawa ban ala nang gulu." -o-o-o-o-o-o- o- MAKASADYA NA Aldo ning Dominggu, migpasyal ya'y Duman, bale ning kumpari atyu banda Dungan, bigla yang migbayu salubung nang timan, king makasimangut nang kumparing disnan. Kutang na kang Pedru, "Nanu ing milyari, kamamaranunan anti kang melugi?" E wari at dapat ing pane kang mayli, Uling masese ya ing kakung kumari?" "Ing balita ku pin, dagdag na pang Duman, karas na ning bengi ala kang ganakan, tsinelas, padiama, ulas at ulunan, karatang mu bale makasadya no ngan?' "Tutu ngan pin ita, "nganang migsalita, ning kumparing Pedru a mesira tula, "Karas ku king bale, ni paynawa ala, ita nang pipyan ku yang ibye nang sarya." MAGALING, MAGALING, PUEDE NAKONG LUMUAL neng Romeo S. Rodriguez Kaybat nang dinurut Director ning Mental, karetang pasyente'ng malyari nang lumual, inaus ne'ng guardia't keyang inutusan, sunduan no ring atlu a kayang palagyuan. karas da ri Pedro, Juan ampo'y Tulume, tunggal-tunggal na lang kitnan masalese, nung deti malyari nong lumual a tune, kening pangalub da a anting pasyente. Minuna neng kitnan, itang pekamatua, Pedro Perdigones a itang lagyu na, "Sabyan mu na kaku ninu'ng kekang Tata, kanita malagwa ing makalual naka." "Direk", nganang Pedro, "Ana'kupang tune," I Tatang ku maluat ku neng katu bale, anya e malyaring iya kalinguan ke, ing aus da kaya i Tonyong Bulate." Tinangu ya'y Direk 'tsaka ya sinenyas, "Magaling na ka pin, 'nya bukas a bukas, makauli naka pabalik Las Pinyas, pakisabi ku mu ena ka magwaldas." Ing kadwa nang kitnan i Juan de Cordova, maki lahing Isik, ibat Isabela, Ing diretsung kutang nung nanung obra na, Bayu ya melaus king Mental midala. Ing balu ku pu Dok bayu ku memuting, at dela ra keni ba kung magpagaling, kilub na ning gubat karin magkaingin, bukud mananaman, mangawa kung uling", "Malyari na ka ping magbalik kekayu", ngana ning Director kabang tangu-tangu, "Ing payu ku keka enaka paylangu, ban ene matumbuk yang arung mung pangu". Kaybat inaus ne itang pekatauli, ing edad na yata ustung trenta'y nuebi, timan-timan ya pang linapit manene, kitang nang Director, "Ika i Tulume?" At tinangu neman itang taung kitnan, bagya pang dinuku anti mong paggalang, "Balu ku Tulume, hilig mung magaral, at "history ya pa paboritu naman." Meragul ya mata't mengapamulagat, ketang kayang dimdam, megising ya uyat, suglung ning Director, "Nung iyang pakibat, ustu ya king kutang, palual da kang agad". "NINU ING KEKATANG PAMBANSANG BAYANI?" kutang ning Director, kilait nang matni, Dapot menahimik antimong mangadi, itang taung kitnan meyalangan bili. Pilan mu rin itang minutung milabas, ita nang Tulume ala yang ayagkas, anya ing Director bigla yang meliswas, detang atyu kuwartu ila nang inarap. Mengamus la buntuk detang asulyapan, ala ring mekibat, ere balu galang? o inyang ituru buri kayang sabyan, Iko di Tulume, sabe mig absent ngan. Ngeni ding mamasa ampong makiramdam, balu kung balu ye pakibat king kutang, eyu ne bulalag ban eku sambitlan Magaling, magaling, pwede nakong lumuwal. (Pasensya nakayu biru ya mu pu ini...RSR) MACHO, KINET NE NING ASU! neng Romeo S. Rodriguez Misan midalan ya ketang eskinita, ing metung a macho, mahilig pumorma, mengapamulagat maragul nang mata, inyang akit naya malagung dalaga. Ba'nya mung pansinan ampong akasabi, linapit mengutang anti mong melili, dikil ketang asung at'yu banda tauli, e kalautan king babaing mesabi. "Itang kekang asu, eya manget kaya, nung dumalan ku man tune yang payapa?" Libru nang babasan ni ene man beba, miling ya'ng dalaga, ni pakialam ala. Mebusit ya'ng macho king eya mepansin, buri nang ipakit lupa nang masanting, miraragli nya mu a anting mebitin, linakad palapit king asung matuling. Kabud kalapit na sigpang ne ning asu, makabural salu a mapormang machu, king tikma'nang iti mig U TURN yang ustu, belikan ne ing "chicks" mamasa pang libru. "Sabi mu e manget asu mung sisesen, Obat kadalan ku eke man alelen, memigsu no tinggal ding adwa kung olen, o mekad pati pa makaba kung bolpen." "Asu ku e manget king bale melakwan, ngana ning dalagang alang pikakunwan. "At yang asung iyan a kekang amanuan, ninung makibandi, ala ku ping belwan!" For more songs, go to: http://maxpages.com/Kapampangan/folksongs10 Ing Cacung Bangungut Basultu neng rba Misan,Y Sheriff Death cacu dinatang ya Divine Summon ne man ing cayang darala 'nang acarapat cu? Tinuki cu caya para munta carin king Supreme Court banua. Cabang ken keng biga sinabi na cacu magsadya cung defense, judgement day ke canu; ating Prosecutors, ilang munie review king maroc at mayap cung guewa king yatu. Pangaras mi carin manaya ne ing Judge pacalucluc no ding Jury nang alagad; atin Prosecutors a pacatalacad cabud milucluc cu migmula nong agad. Dening Prosecutors balu rang pengalcal ing anggang mali cung atmu na caracal, aduan dang parusa, caibat na ning trial, yatsa da cu canu king larung bubucal. Cabud mica chance cung ticdo magdepensa ing tambing cung kitang, nanung evidence da ngacu nung ala lang witness at prueba alang macasabing guewa cung talaga. Canian dane ilual itang Television melino yang screen caibat nang mi-turn on, at ing macasulat peca introduction |
 Sign Guestbook |
 View Guestbook |
| It is entitled KAPAMPANGAN SONGS | and Poetry | by Ernie Turla |
 ernieturla@yahoo.com |
||
|
. |
| Visitors: 00577 |